FIFA : மெஸ்ஸியின் ஹாட்ரிக்கில் சுருண்டது அல்ஜீரியா; உலகக்கோப்பையில் அர்ஜென்டினாவுக்கு அமோக தொடக்கம்!

Argentina vs Algeria : உலகக்கோப்பை பட்டத்தை தக்கவைக்கும் முயற்சியில் அர்ஜென்டினா அணி தனது முதல் போட்டியில் அபார வெற்றி பெற்றுள்ளது. கேப்டன் லியோனல் மெஸ்ஸியின் ஹாட்ரிக் கோல்களால், அல்ஜீரியாவை வீழ்த்தியது.

Image Credit : Getty

Argentina Beat Algeria

கேன்சஸ் சிட்டி: உலகக்கோப்பை சாம்பியன் பட்டத்தை தக்கவைக்கும் பயணத்தை அர்ஜென்டினா அணி ஒரு கனவு போல தொடங்கியுள்ளது. கேன்சஸ் சிட்டியில் உள்ள ஆரோஹெட் ஸ்டேடியத்தில் நடந்த விறுவிறுப்பான போட்டியில், கேப்டன் லியோனல் மெஸ்ஸியின் ஹாட்ரிக் கோல்களால், அர்ஜென்டினா 3-0 என்ற கோல் கணக்கில் அல்ஜீரியாவை வீழ்த்தியது. ஆட்டத்தின் 17, 60, மற்றும் 76-வது நிமிடங்களில் மெஸ்ஸி கோல் அடித்து அசத்தினார். இது மெஸ்ஸியின் கேரியரில் முதல் உலகக்கோப்பை ஹாட்ரிக் ஆகும்.

மெஸ்ஸியின் சாதனைப் பயணத்தில் இது ஒரு மைல்கல் போட்டியாக அமைந்தது. இந்த போட்டியில் களமிறங்கியதன் மூலம், 38 வயதான மெஸ்ஸி, ஆறு வெவ்வேறு உலகக்கோப்பைகளில் விளையாடிய உலகின் முதல் ஆண் வீரர் என்ற வரலாற்று சாதனையை படைத்தார்.

Image Credit : Getty

VAR-ம் ஆஃப்சைடு கோல்களும்!

ஆட்டம் தொடங்கியது முதலே இரு அணிகளும் அதிவேக தாக்குதலில் ஈடுபட்டன. போட்டி ஆரம்பித்த ஆறாவது நிமிடத்திலேயே லியோனல் மெஸ்ஸி பந்தை அல்ஜீரியாவின் வலைக்குள் தள்ளினார். ஆனால், VAR சோதனையில் அது ஆஃப்சைடு என அறிவிக்கப்பட்டது. அடுத்த சில நிமிடங்களில், அதாவது ஒன்பதாவது நிமிடத்தில், அல்ஜீரியாவின் ஃபாரெஸ் சைபி ஒரு கோல் அடித்தார். ஆனால், நடுவர் அதையும் ஆஃப்சைடு என்று அறிவித்தது ஆட்டத்தில் பரபரப்பை கூட்டியது.

Image Credit : Getty

மெஸ்ஸி மேஜிக்

ஆட்டத்தின் 17-வது நிமிடத்தில்தான் ஸ்டேடியத்தையே அதிர வைத்த முதல் கோல் பிறந்தது. மிட்ஃபீல்டர் ரோட்ரிகோ டி பால் கொடுத்த ஒரு அருமையான த்ரூ-பாஸை பெற்ற மெஸ்ஸி, அல்ஜீரிய தற்காப்பு வீரர்களை எளிதாக கடந்து பாக்ஸிற்குள் நுழைந்தார். பின்னர், அவர் அடித்த ஒரு கிளாசிக் ஷாட், அல்ஜீரிய கோல்கீப்பர் லூக்கா சிடானை பார்வையாளராக மாற்றி, கோல் போஸ்டின் மேல் வலது மூலையில் பாய்ந்தது. இந்த கோல் மூலம், அர்ஜென்டினாவுக்காக உலகக்கோப்பையில் கோல் அடித்த மிக இளம் வயது வீரர் மற்றும் மிக வயதான வீரர் என்ற இரட்டை சாதனையை மெஸ்ஸி படைத்தார்.

Image Credit : X/Argentina

இரண்டாம் பாதியிலும் மெஸ்ஸி அலை

முதல் பாதியில் ஒரு கோல் முன்னிலையுடன் இருந்த அர்ஜென்டினா, இரண்டாம் பாதியின் தொடக்கத்திலேயே தனது முன்னிலையை அதிகரித்தது. அல்ஜீரியாவின் தற்காப்புப் பிழையை தனக்கு சாதகமாகப் பயன்படுத்திய மெஸ்ஸி, தனது இரண்டாவது கோலை அடித்து அணியின் வெற்றியை உறுதி செய்தார் (2-0). சிறிது நேரத்திலேயே, பாக்ஸிற்கு வெளியே இருந்து ஒரு கிரவுண்டர் ஷாட் மூலம் கோல் அடித்து தனது ஹாட்ரிக்கை நிறைவு செய்தார். இதன் மூலம், 16 கோல்களுடன், ஜெர்மனியின் மிரோஸ்லாவ் க்ளோசின் உலகக்கோப்பை அதிக கோல்கள் சாதனையை சமன் செய்தார். மேலும், உலகக்கோப்பை வரலாற்றில் ஹாட்ரிக் அடித்த மிக வயதான வீரர் என்ற சாதனையையும் மெஸ்ஸி தன்வசப்படுத்தினார்.

அல்ஜீரியா கடும் சவாலை கொடுத்தாலும், மெஸ்ஸியின் அபார ஆட்டம் மற்றும் கோல்கீப்பர் எமிலியானோ மார்டினெஸின் சிறப்பான தடுப்புகளால் அர்ஜென்டினா வெற்றி பெற்றது. தியாகோ அல்மாடா மற்றும் ரோட்ரிகோ டி பால் ஆகியோர் நடுகளத்தில் ஆட்டத்தை கட்டுப்படுத்த, அல்ஜீரியாவின் கோல் அடிக்கும் முயற்சிகள் அனைத்தும் அர்ஜென்டினாவின் தடுப்புச்சுவரில் மோதி சிதறின. பந்து கையாளுதல் (53%) மற்றும் பாஸ்கள் (583) ஆகியவற்றில் அல்ஜீரியா முன்னிலையில் இருந்தும், அவர்களால் கோல் அடிக்க முடியவில்லை. இந்த போட்டியில் ஒரு முறை கூட நடுவர் மஞ்சள் அல்லது சிவப்பு அட்டை காட்டவில்லை என்பது ஒரு சுவாரஸ்யமான விஷயம். இந்த வெற்றியின் மூலம், இத்தாலி (1934, 1938) மற்றும் பிரேசில் (1958, 1962) அணிகளுக்குப் பிறகு, உலகக்கோப்பையை தக்கவைக்கும் மூன்றாவது அணி என்ற வரலாற்று சாதனையை நோக்கி லயோனல் ஸ்கலோனியின் அர்ஜென்டினா தனது முதல் அடியை வெற்றிகரமாக எடுத்து வைத்துள்ளது.