- Home
- Career
- நீட் மாணவர்களே உஷார்! இதை செய்யலன்னா அப்ளிகேஷன் "ரிஜெக்ட்".. என்டிஏ விடுத்த அதிரடி எச்சரிக்கை!
நீட் மாணவர்களே உஷார்! இதை செய்யலன்னா அப்ளிகேஷன் "ரிஜெக்ட்".. என்டிஏ விடுத்த அதிரடி எச்சரிக்கை!
NEET UG 2026 நீட் 2026 விண்ணப்பதாரர்கள் ஆதார் மற்றும் சாதிச் சான்றிதழைப் புதுப்பிக்க என்டிஏ அறிவுறுத்தியுள்ளது. விண்ணப்பம் நிராகரிக்கப்படுவதைத் தவிர்க்க இதைச் செய்யவும்.
NEET UG தேர்வர்களுக்கு என்டிஏ விடுத்த முக்கிய எச்சரிக்கை
இளங்கலை மருத்துவப் படிப்பிற்கான நீட் நுழைவுத் தேர்வை (NEET UG) நடத்தும் தேசியத் தேர்வுகள் முகமை (NTA), தேர்வுக்குத் தயாராகும் மாணவர்களுக்கு மிக முக்கியமான அறிவிப்பு ஒன்றை வெளியிட்டுள்ளது. 2026-ம் ஆண்டிற்கான நீட் விண்ணப்பப் படிவத்தைப் பூர்த்தி செய்வதற்கு முன்பாக, மாணவர்கள் தங்கள் ஆதார் அட்டை, மாற்றுத்திறனாளிகளுக்கான அட்டை (UDID) மற்றும் சாதிச் சான்றிதழ்களை (EWS/ SC/ ST/ OBC-NCL) உடனடியாகப் புதுப்பிக்குமாறு என்டிஏ அறிவுறுத்தியுள்ளது. விண்ணப்பங்கள் பிற்காலத்தில் நிராகரிக்கப்படுவதையோ அல்லது குளறுபடிகளையோ தவிர்க்கவே இந்த நடவடிக்கை எடுக்கப்பட்டுள்ளது.
ஆதார் அட்டையில் என்னென்ன மாற்றங்கள் தேவை?
ஜனவரி 5 அன்று வெளியிடப்பட்ட என்டிஏ அறிக்கையின்படி, மாணவர்களின் ஆதார் அட்டையில் உள்ள விவரங்கள் துல்லியமாக இருக்க வேண்டும். குறிப்பாக மாணவரின் பெயர், பிறந்த தேதி (10-ம் வகுப்பு சான்றிதழில் உள்ளபடி), புகைப்படம், முகவரி, பாலினம் மற்றும் பயோமெட்ரிக் தகவல்கள் சரியாக அப்டேட் செய்யப்பட்டிருக்க வேண்டும் என்று தெரிவிக்கப்பட்டுள்ளது. இதில் ஏதேனும் பிழை இருந்தால் உடனே திருத்தம் செய்வது அவசியம்.
சாதி மற்றும் மாற்றுத்திறனாளி சான்றிதழ்கள்
இட ஒதுக்கீடு கோரும் மாணவர்கள் தங்கள் சான்றிதழ்கள் செல்லுபடியாகும் நிலையில் உள்ளதா என்பதை உறுதிப்படுத்த வேண்டும். SC, ST, OBC-NCL மற்றும் EWS பிரிவு மாணவர்கள், தங்களின் சான்றிதழ்கள் நடப்பு விதிமுறைகளுக்கு உட்பட்டு, புதுப்பிக்கப்பட்ட நிலையில் வைத்திருப்பது கட்டாயமாகும். அதேபோல், மாற்றுத்திறனாளி மாணவர்கள் தங்கள் சான்றிதழ்களைத் தகுந்த காலாவதி தேதிக்குள் புதுப்பித்து வைத்திருக்க வேண்டும்.
பாடத்திட்டம் வெளியீடு மற்றும் அதிகாரப்பூர்வ இணையதளங்கள்
இதற்கிடையில், தேசிய மருத்துவ ஆணையம் (NMC) 2026 நீட் தேர்வுக்கான பாடத்திட்டத்தை வெளியிட்டுள்ளது. இயற்பியல், வேதியியல் மற்றும் உயிரியல் பாடங்களுக்கான தலைப்புகள் என்சிஇஆர்டி (NCERT) 11 மற்றும் 12-ம் வகுப்பு பாடத்திட்டத்தின் அடிப்படையில் இருக்கும் என்று தெரிவிக்கப்பட்டுள்ளது. மாணவர்கள் கூடுதல் விவரங்களுக்கு nta.ac.in மற்றும் neet.nta.nic.in ஆகிய இணையதளங்களைத் தொடர்ந்து பார்வையிடுமாறு கேட்டுக்கொள்ளப்படுகிறார்கள்.
கடந்த ஆண்டு நிலவரம் என்ன?
கடந்த ஆண்டு (2025) நடைபெற்ற நீட் தேர்வில், பதிவு செய்த 22.76 லட்சம் மாணவர்களில், சுமார் 22.09 லட்சம் பேர் தேர்வெழுதினர். இதில் 12.36 லட்சம் மாணவர்கள் மருத்துவப் படிப்பில் சேரத் தகுதி பெற்றனர். பொதுப் பிரிவினருக்கான கட்-ஆஃப் மதிப்பெண்கள் கடந்த முறை குறைந்திருந்தது குறிப்பிடத்தக்கது.
