- Home
- Career
- மொத்தம் 7 மாற்றங்கள்.. 2025-ல் பள்ளிகள் இப்படித்தான் இயங்கும்! பெற்றோர்கள் அவசியம் தெரிஞ்சுக்கோங்க.
மொத்தம் 7 மாற்றங்கள்.. 2025-ல் பள்ளிகள் இப்படித்தான் இயங்கும்! பெற்றோர்கள் அவசியம் தெரிஞ்சுக்கோங்க.
CBSE புதிய விதிகள் 2025: அட்டெண்டன்ஸ் முதல் தேர்வு முறை வரை... மாணவர்கள் கட்டாயம் தெரிந்து கொள்ள வேண்டிய 7 அதிரடி மாற்றங்கள்!
CBSE மத்திய இடைநிலைக் கல்வி வாரியம்
மத்திய இடைநிலைக் கல்வி வாரியம் (CBSE) 2025-ம் ஆண்டில் கல்வி முறையில் மிகப்பெரிய மற்றும் வரலாற்றுச் சிறப்புமிக்க மாற்றங்களைக் கொண்டு வந்துள்ளது. மாணவர்கள் வெறுமனே மனப்பாடம் செய்து எழுதுவதை விட, பாடங்களைப் புரிந்து படிப்பதையே இந்த மாற்றங்கள் நோக்கமாகக் கொண்டுள்ளன. தேர்வு பயத்தைக் குறைக்கவும், மாணவர்களின் மனநலனை மேம்படுத்தவும் கொண்டு வரப்பட்டுள்ள அந்த 7 முக்கிய மாற்றங்களை இங்கே விரிவாகக் காண்போம்.
1. 75% வருகைப்பதிவு இல்லையென்றால் தேர்வு எழுத முடியாது
2025 முதல், பொதுத்தேர்வு எழுதும் மாணவர்களுக்கு 75% வருகைப்பதிவு (Attendance) கட்டாயமாக்கப்பட்டுள்ளது. பள்ளிக்குத் தொடர்ந்து வராத மாணவர்கள் மற்றும் 75 சதவீதத்திற்கும் குறைவான வருகைப்பதிவு கொண்ட மாணவர்கள் பொதுத்தேர்வு எழுத அனுமதிக்கப்பட மாட்டார்கள். மாணவர்கள் ஆண்டு முழுவதும் வகுப்புகளில் ஈடுபாட்டுடன் இருப்பதை உறுதி செய்யவே இந்த அதிரடி விதிமுறை.
2. வருடத்திற்கு இரண்டு முறை பொதுத்தேர்வு
மாணவர்களுக்கு ஒரு மகிழ்ச்சியான செய்தி! 2026 கல்வி அமர்வு முதல், 10-ம் வகுப்பு மாணவர்கள் வருடத்திற்கு இரண்டு முறை பொதுத்தேர்வு (Board Exams) எழுதும் வாய்ப்பைப் பெறுவார்கள். இது மாணவர்களின் தேர்வு அழுத்தத்தைக் குறைப்பதோடு, முதல் முயற்சியில் மதிப்பெண் குறைந்தால், இரண்டாவது முயற்சியில் அதை மேம்படுத்திக்கொள்ள ஒரு வாய்ப்பாக அமையும்.
3. கேள்வித்தாள் முறையில் மாற்றம்: மனப்பாடம் எடுபடாது
இனி புத்தகத்தில் இருப்பதை அப்படியே மனப்பாடம் செய்து எழுதினால் மதிப்பெண் பெற முடியாது. புதிய தேர்வு முறையில், மாணவர்களின் சிந்திக்கும் திறன் மற்றும் தர்க்கரீதியான அறிவை (Logic and Competency) சோதிக்கும் வகையிலான கேள்விகள் அதிகம் இடம்பெறும். நடைமுறை வாழ்க்கையில் கல்வியை எப்படிப் பயன்படுத்துவது என்பதற்கு இது முன்னுரிமை அளிக்கும்.
4. அடிப்படை கணிதம் படித்தவர்களும் இனி ஸ்டாண்டர்ட் கணிதம் எடுக்கலாம்
முன்பு 10-ம் வகுப்பில் 'பேசிக் மேக்ஸ்' (Basic Maths) எடுத்த மாணவர்கள், 11-ம் வகுப்பில் கணிதப் பாடத்தைத் தொடர முடியாது என்ற நிலை இருந்தது. ஆனால் இப்போது, 10-ம் வகுப்பில் பேசிக் மேக்ஸ் எடுத்திருந்தாலும், 11-ம் வகுப்பில் 'ஸ்டாண்டர்ட் மேக்ஸ்' (Standard Maths) எடுத்துப் படிக்கும் வாய்ப்பை சிபிஎஸ்இ வழங்கியுள்ளது. இது மாணவர்களுக்குக் கூடுதல் நெகிழ்வுத்தன்மையையும், எதிர்காலக் கல்வி வாய்ப்புகளையும் அதிகரிக்கும்.
5. எம்.சி.க்யூ மற்றும் கேஸ் ஸ்டடி கேள்விகள் அதிகரிப்பு
புதிய தேர்வு முறையில், கொள்குறி வினாக்கள் (MCQs), கேஸ் ஸ்டடீஸ் (Case Studies) மற்றும் பத்தியைப் படித்துப் பதிலளிக்கும் கேள்விகள் அதிகரிக்கப்பட்டுள்ளன. பாடத்தின் கருத்துருவை (Concept) மாணவர்கள் எவ்வளவு ஆழமாகப் புரிந்து வைத்துள்ளார்கள் என்பதைச் சோதிக்கவே இந்த மாற்றம் செய்யப்பட்டுள்ளது.
6. ஒவ்வொரு மாணவருக்கும் 'அப்பார்' ஐடி (APAAR ID) கட்டாயம்
'ஒரே நாடு, ஒரே மாணவர் அடையாள அட்டை' திட்டத்தின் கீழ், அனைத்து சிபிஎஸ்இ மாணவர்களுக்கும் 'அப்பார் ஐடி' (APAAR ID - Automated Permanent Academic Account Registry) கட்டாயமாக்கப்பட்டுள்ளது. இது ஒரு டிஜிட்டல் அடையாள அட்டை. இதில் மாணவர்களின் மதிப்பெண்கள், சான்றிதழ்கள் மற்றும் கல்விச் சாதனைகள் அனைத்தும் ஒரே இடத்தில் சேமித்து வைக்கப்படும்.
7. மாணவர்களின் மனநலத்திற்கு முக்கியத்துவம்
படிப்பைத் தாண்டி மாணவர்களின் மனநலனிலும் (Mental Health) சிபிஎஸ்இ கவனம் செலுத்துகிறது. கல்விச் சுமையால் ஏற்படும் மன அழுத்தத்தைக் குறைக்கப் பள்ளிகளுக்குச் சிறப்பு வழிகாட்டுதல்கள் வழங்கப்பட்டுள்ளன. பள்ளிகளில் மாணவர்களுக்கான ஆலோசனை (Counseling) மற்றும் மன அழுத்த மேலாண்மை வகுப்புகளை நடத்த அறிவுறுத்தப்பட்டுள்ளது.
