20 ஆண்டு ஹோம் லோனை வெறும் 10 ஆண்டாக குறைக்கும் மியூச்சுவல் பண்ட் சீக்ரெட்..
சொந்த வீடு வாங்க ஆசையா? ஆனால், ஹோம் லோன் EMI நினைத்தால் பயமாக இருக்கிறதா? கவலை வேண்டாம். மியூச்சுவல் ஃபண்ட்ஸ் மூலம் கடனை வேகமாக அடைத்து, லட்சக்கணக்கான ரூபாய் வட்டியையும் மிச்சப்படுத்தலாம். அது எப்படி என்று இங்கே பார்க்கலாம்.
சாமானியர்களின் வாழ்நாள் லட்சியம்
சொந்தமாக ஒரு வீடு வாங்க வேண்டும் என்பது நம்மில் பலரின் கனவு. இதற்காக 15 முதல் 20 ஆண்டுகள் வரை EMI கட்டுபவர்களும் இருக்கிறார்கள். ஆனால், சரியாக திட்டமிட்டால், வீட்டுக் கடனை விரைவாக அடைத்து, கூடுதல் லாபமும் பெறலாம் என நிதி நிபுணர்கள் கூறுகின்றனர்.
ஹோம் லோன் எடுக்கும் முன் செய்ய வேண்டியவை
வீட்டுக் கடன் வாங்குவதற்கு முன், உங்கள் வேலை பாதுகாப்பைப் பற்றி யோசிப்பது முக்கியம். திடீரென வேலை பறிபோக வாய்ப்புள்ளது. எனவே, ஒரு அவசர கால நிதி (Emergency Fund) அல்லது மியூச்சுவல் ஃபண்ட் போர்ட்ஃபோலியோவை தயாராக வைத்திருப்பது நல்லது. உதாரணமாக, 70 லட்சம் ரூபாய் மதிப்புள்ள வீடு வாங்க விரும்பினால், முன்கூட்டியே ஒரு கோடி ரூபாய்க்கு மியூச்சுவல் ஃபண்ட்ஸ் உருவாக்கி வைத்தால், எதிர்காலத்தில் வேலை போனாலும் கவலைப்படத் தேவையில்லை.
குறைந்த காலமா அல்லது நீண்ட காலமா (Tenure) எது சிறந்தது?
வட்டி குறையும் என நினைத்து பலர் 15 ஆண்டுகளிலேயே கடன் வாங்குகிறார்கள். ஆனால், 20-25 ஆண்டுகள் போன்ற நீண்ட காலத்திற்கு கடன் வாங்குவதே புத்திசாலித்தனம். காரணம், வீட்டுக் கடன் வட்டி விகிதம் சுமார் 8.5% முதல் 9% வரைதான் இருக்கும். இது மற்ற கடன்களை விடக் குறைவு. 15 வருட EMI-க்கும், 20 வருட EMI-க்கும் உள்ள வித்தியாசத் தொகையை மியூச்சுவல் ஃபண்டில் முதலீடு செய்ய வேண்டும்.
மியூச்சுவல் ஃபண்ட் மேஜிக்
உதாரணமாக, 50 லட்சம் ரூபாய் கடனுக்கு, 15 வருட EMI சுமார் ₹49,000. அதே 20 வருட EMI சுமார் ₹43,000. இரண்டிற்கும் உள்ள வித்தியாசம் ₹5,800. இந்தத் தொகையை, 12% வருமானம் தரும் ஒரு நிஃப்டி இன்டெக்ஸ் ஃபண்டில் 15 வருடங்களுக்கு முதலீடு செய்தால், உங்களுக்கு சுமார் ₹32 லட்சம் கிடைக்கும். அப்போது, அந்தப் பணத்தைக் கொண்டு மீதமுள்ள கடனை அடைத்த பிறகும், உங்கள் கையில் ₹11 லட்சம் மிச்சமிருக்கும்.
மியூச்சுவல் ஃபண்டுகளில் முதலீடு
கையில் கூடுதலாகப் பணம் கிடைத்தால், உடனடியாக கடனை அடைப்பதை விட, அதை மியூச்சுவல் ஃபண்டுகளில் முதலீடு செய்வதன் மூலம் அதிக வருமானம் ஈட்டலாம். மேலும், ஓய்வூதியத்திற்காக சேமித்த பணத்தை, உணர்ச்சிவசப்பட்டு வீடு வாங்கப் பயன்படுத்த வேண்டாம் என நிதி நிபுணர்கள் எச்சரிக்கின்றனர்.
வணிகம் (Business Ideas in Tamil), வங்கிகள் (Banking News), நிதி, இந்திய பொருளாதாரம் , உலக சந்தை, பங்கு சந்தை, முதலீடு உள்ளிட்ட பல்வேறு தகவல்கள் மற்றும் சமீபத்திய நிதி செய்திகள் அனைத்தையும் ஏஷ்யாநெட் தமிழ் நியூஸில் படிக்கலாம்.
