- Home
- Business
- PF சந்தாதாரர்களுக்கு ஜாக்பாட்.. இனி பணத்துக்கு 'நோ' வெயிட்டிங்.. ஆட்டோமேட்டிக் செட்டில்மெண்ட் வந்தாச்சு!
PF சந்தாதாரர்களுக்கு ஜாக்பாட்.. இனி பணத்துக்கு 'நோ' வெயிட்டிங்.. ஆட்டோமேட்டிக் செட்டில்மெண்ட் வந்தாச்சு!
ஒரு பிஎஃப் கணக்கில் தொடர்ந்து 36 மாதங்களுக்கு எந்தப் பங்களிப்பும் வரவில்லை என்றால், அது செயல்படாத கணக்காகக் கருதப்படுகிறது. பொதுவாக, 55 வயதுக்குப் பிறகு ஓய்வு பெறுபவர்களின் கணக்குகளில் புதிய பங்களிப்பு வராது.
PF சந்தாதாரர்களுக்கு குட்நியூஸ்
கோடிக்கணக்கான ஊழியர்களுக்கு EPFO ஒரு நல்ல செய்தியைச் சொல்லியுள்ளது. பல ஆண்டுகளாக க்ளெய்ம் செய்யப்படாத பிஎஃப் பணத்தை, உறுப்பினர்களின் வங்கிக் கணக்கிற்கு நேரடியாக மாற்ற EPFO தயாராகி வருகிறது. இதற்காக, ஒரு புதிய ஆட்டோ செட்டில்மென்ட் முறையை அறிமுகப்படுத்தியுள்ளது. இதனால், உறுப்பினர்கள் எந்த விண்ணப்பமும் நிரப்பத் தேவையில்லை.
சுமார் 5,200 கோடி ரூபாய் நிதி
EPFO புள்ளிவிவரப்படி, லட்சக்கணக்கான பிஎஃப் கணக்குகள் தற்போது செயல்படாத நிலையில் உள்ளன. அதாவது, கடந்த 3 ஆண்டுகளாக இந்தக் கணக்குகளில் எந்தப் பரிவர்த்தனையும் நடக்கவில்லை. இவற்றில் உள்ள ஆயிரக்கணக்கான கோடி ரூபாயை உரியவர்களுக்குச் சேர்க்கும் நோக்கில், முதல் கட்டமாக ஆதார் சரிபார்க்கப்பட்ட சுமார் 8.1 லட்சம் கணக்குகளை சரிசெய்ய உள்ளனர். இவற்றில் சுமார் 5,200 கோடி ரூபாய் நிதி உள்ளது.
ஆட்டோ செட்டில்மென்ட் அம்சம்
EPFO இந்தத் திட்டத்தைப் படிப்படியாக செயல்படுத்தும். முதலில், ரூ.1,000 அல்லது அதற்கும் குறைவான பேலன்ஸ் உள்ள கணக்குகளுக்கு ஆட்டோ செட்டில்மென்ட் வசதி வழங்கப்படும். சமீபத்தில் நடந்த மத்திய அறங்காவலர் குழு (CBT) கூட்டத்தில் இந்த முன்மொழிவுக்கு ஒப்புதல் கிடைத்தது. உறுப்பினர்களின் KYC மற்றும் வங்கி விவரங்கள் சரியாக இருந்தால், பணம் நேரடியாக டெபாசிட் செய்யப்படும். இந்த பைலட் திட்டம் வெற்றி பெற்ற பிறகு, பெரிய தொகை உள்ள கணக்குகளுக்கும் இது விரிவுபடுத்தப்படும்.
க்ளெய்ம் செய்யப்படாத நிதிகள்
EPFO-விடம் உள்ள தரவுகளின்படி, க்ளெய்ம் செய்யப்படாத நிதிகள் மிகப்பெரிய அளவில் உள்ளன. சுமார் 14,000 கணக்குகளில் ரூ. 5 லட்சம் அல்லது அதற்கு மேல் உள்ளது. 38,000 கணக்குகளில் ரூ. 1 லட்சம் முதல் ரூ. 5 லட்சம் வரை உள்ளது. 41,000 கணக்குகளில் ரூ. 50,000 முதல் ரூ. 1 லட்சம் வரை உள்ளது. அக்டோபர் 2017-க்குப் பிறகு EPFO-வில் சேர்ந்த உறுப்பினர்களுக்கு இந்த ஆட்டோமேட்டட் முறையில் முன்னுரிமை அளிக்கப்படும் என அதிகாரிகள் தெரிவித்துள்ளனர்.
செயல்படாத கணக்குகள் எத்தனை?
ஒரு பிஎஃப் கணக்கில் தொடர்ந்து 36 மாதங்களுக்கு எந்தப் பங்களிப்பும் வரவில்லை என்றால், அது செயல்படாத கணக்காகக் கருதப்படுகிறது. பொதுவாக, 55 வயதுக்குப் பிறகு ஓய்வு பெறுபவர்களின் கணக்குகளில் புதிய பங்களிப்பு வராது. ஆனால், 55 வயதுக்குட்பட்ட உறுப்பினர்களின் கணக்குகளில் 58 வயது வரை வட்டி வரவு வைக்கப்படும். பிப்ரவரி 2026 நிலவரப்படி, நாடு முழுவதும் 31.8 லட்சம் செயல்படாத கணக்குகளில் மொத்தம் ரூ.10,181 கோடி நிதி உள்ளது. இவற்றில் 7 லட்சம் கணக்குகள் 20 ஆண்டுகளுக்கும் மேலானவை.
PF சந்தாதாரர்கள் என்ன செய்ய வேண்டும்?
உங்கள் பழைய பிஎஃப் கணக்கில் பணம் இருந்தால், இந்த வசதியைப் பெற சில விஷயங்களைச் செய்ய வேண்டும் என EPFO அறிவுறுத்துகிறது. முதலில், உங்கள் UAN எண்ணை ஆக்டிவேட் செய்ய வேண்டும். உங்கள் ஆதார் எண், பிஎஃப் கணக்குடன் இணைக்கப்பட்டிருக்க வேண்டும். மேலும், வங்கி விவரங்கள் (IFSC கோட், கணக்கு எண்) சரியாக அப்டேட் செய்யப்பட்டுள்ளதா என்பதை EPFO போர்டல் அல்லது உமாங் (UMANG) ஆப் மூலம் சரிபார்க்கவும்.
வணிகம் (Business Ideas in Tamil), வங்கிகள் (Banking News), நிதி, இந்திய பொருளாதாரம் , உலக சந்தை, பங்கு சந்தை, முதலீடு உள்ளிட்ட பல்வேறு தகவல்கள் மற்றும் சமீபத்திய நிதி செய்திகள் அனைத்தையும் ஏஷ்யாநெட் தமிழ் நியூஸில் படிக்கலாம்.
