EPF : மாதம் ரூ.10,750 EPF-ல் போட்டால் 25 ஆண்டுகளில் ரூ.1 கோடி! ஆனால் இந்த ஒரு தவறு செய்தால் பெரிய இழப்பு!

EPF : மாதம் ரூ.10,750 EPF-ல் தொடர்ந்து சேமித்தால் 25 ஆண்டுகளில் ரூ.1 கோடி வரை சேர வாய்ப்புள்ளது. ஆனால் வேலைக்கு இடையில் நீண்ட இடைவெளி வந்தால் ஓய்வுகால சேமிப்பு கணிசமாக குறையலாம். எப்படி? முழு கணக்கு இதோ!

Image Credit : Chatgpt

மாதம் ரூ.10,750... 25 ஆண்டுகளில் ரூ.1 கோடி?

சம்பளம் வாங்கும் பலருக்கும் ஒவ்வொரு மாதமும் சம்பளத்தில் இருந்து பிடித்தம் செய்யப்படும் PF தொகை பெரியதாகத் தெரியாது. ஆனால் அதை நீண்ட காலத்துக்கு தொடர்ந்து சேமித்தால், அதற்கு கிடைக்கும் வட்டியுடன் சேர்ந்து ஓய்வுகாலத்தில் கணிசமான தொகையாக மாறும்.

ஒரு கணக்கீட்டின்படி, ஊழியர் மற்றும் நிறுவனத்தின் EPF பங்களிப்பு சேர்த்து மாதம் ரூ.10,750 தொடர்ந்து செலுத்தப்பட்டு, ஆண்டுக்கு 8.25% வட்டி கிடைக்கும் என்ற அனுமானத்தில் சுமார் 24–25 ஆண்டுகளில் ரூ.1 கோடியை நெருங்கலாம். இங்கே முக்கியமான விஷயம் மாதம் செலுத்தும் தொகை மட்டும் அல்ல. பல ஆண்டுகள் தொடர்ந்து சேமிப்பதும், அதற்கு கிடைக்கும் வட்டியும் மீண்டும் வளர்வதும்தான்.

இதையும் படிங்க : Health Insurance : ரூ.25 லட்சமாக உயர்த்தப்பட்ட மருத்துவ காப்பீடு! யாருக்கு கிடைக்கும்? எப்படி விண்ணப்பிப்பது?

Image Credit : X

PF பணம் எப்படி வளர்கிறது?

EPF-ல் ஊழியரின் பங்களிப்பு பொதுவாக அடிப்படை ஊதியத்தின் 12% ஆக இருக்கும். நிறுவனமும் தனது பங்களிப்பை செலுத்துகிறது. ஆனால் நிறுவனத்தின் முழு பங்களிப்பும் ஒரே கணக்கில் சேராது; அதில் ஒரு பகுதி ஊழியர்களின் ஓய்வூதியத் திட்டத்துக்கும் செல்கிறது.

அதனால், சம்பளத்தில் இருந்து பிடிக்கப்படும் PF தொகையை மட்டும் பார்த்து “இவ்வளவுதானா?” என்று நினைக்கக்கூடாது. பல ஆண்டுகள் தொடர்ந்து பணம் சேரும்போது, ஏற்கனவே சேர்ந்த தொகைக்கும் வட்டி கிடைக்கும். அந்த வட்டியும் தொடர்ந்து கணக்கில் சேருவதால், காலம் செல்லச் செல்ல வளர்ச்சி வேகமாகும். இதைத்தான் கூட்டு வட்டி வளர்ச்சி என்று சொல்லலாம்.

இதையும் படிங்க : Vijay-Ajith : அஜித்துக்கு பச்சைக் கொடி காட்டும் விஜய்! லண்டன் கார் ரேஸில் காத்திருக்கும் சம்பவம்!

Image Credit : stockPhoto

3 ஆண்டுகள் வேலை இடைவெளி வந்தால் என்ன ஆகும்?

இங்குதான் பலருக்குத் தெரியாத முக்கியமான விஷயம் இருக்கிறது. ஒருவர் 25 ஆண்டுகள் தொடர்ந்து EPF-ல் பங்களிப்பு செய்தால், மேலே கூறிய அனுமானத்தின் அடிப்படையில் சுமார் ரூ.1 கோடி கிடைக்கலாம். அதே நபர் 3 ஆண்டுகள் வேலை இடைவெளி எடுத்தால் அந்த காலத்தில் புதிய EPF பங்களிப்பு இருக்காது. ஏற்கனவே கணக்கில் இருக்கும் பணம் அப்படியே இருக்கும்; ஆனால் அந்த 3 ஆண்டுகளில் சேர வேண்டிய புதிய பணமும், அந்தப் பணத்திற்கு அடுத்தடுத்த ஆண்டுகளில் கிடைக்க வேண்டிய வட்டியும் இல்லாமல் போகும்.

அதனால் 25 ஆண்டுகளுக்குப் பதிலாக 22 ஆண்டுகள் மட்டுமே பங்களிப்பு செய்தால், இதே கணக்கீட்டில் ஓய்வுகாலத் தொகை சுமார் ரூ.76.6 லட்சமாக குறையலாம். அதாவது, சுமார் ரூ.24.9 லட்சம் வரை வித்தியாசம் ஏற்படலாம். இதற்கு காரணம் வேலை இடைவெளியில் செலுத்தாத தொகை மட்டும் கிடையாது. அந்தத் தொகை அடுத்த பல ஆண்டுகளில் உருவாக்கியிருக்கக்கூடிய வட்டியும் சேர்ந்து போய்விடுகிறது.

இதையும் படிங்க : Suitcase : வெளியூர் கிளம்பும்போது சூட்கேஸ் சக்கரத்தில் டேப் ஒட்டுங்க! இதுக்கு பின்னாடி இப்படியொரு காரணமா?

Image Credit : X

இன்னும் கொஞ்சம் அதிகமாக சேமித்தால்?

EPF-ல் வழக்கமான பங்களிப்புக்கு மேலாக, தகுதியுள்ள ஊழியர்கள் தன்னார்வ வருங்கால வைப்பு நிதி (VPF) மூலம் கூடுதல் தொகையை செலுத்த முடியும். உதாரணமாக, மாதம் ரூ.10,750 EPF பங்களிப்புடன் கூடுதலாக ரூ.6,000 செலுத்தினால், மொத்த மாத பங்களிப்பு ரூ.16,750 ஆகும்.

இதேபோல் 25 ஆண்டுகள் தொடர்ந்து செலுத்தப்பட்டு, ஆண்டுக்கு 8.25% வட்டி கிடைக்கும் என்ற அனுமானத்தில், மொத்தத் தொகை சுமார் ரூ.1.58 கோடி வரை செல்லலாம். ஆனால் VPF-க்கு நிறுவனமும் அதே அளவு கூடுதல் பங்களிப்பு செய்ய வேண்டும் என்ற கட்டாயம் இல்லை. கூடுதல் தொகையை செலுத்துவதற்கு முன், உங்கள் சம்பளம், மாதச் செலவுகள் மற்றும் பிற முதலீடுகளை கருத்தில் கொள்வது முக்கியம்.

இதையும் படிங்க : Rahu-Ketu Transit : ராகு-கேது பெயர்ச்சியில் உருவாகும் துர்க்கையின் அருள்! 4 ராசிகளுக்கு பொன்னும் பொருளும் குவியும்!

Image Credit : Gemini AI

EPF-ல் பெரிய பலன் என்ன தெரியுமா?

EPF-ன் மிகப்பெரிய பலம் நீண்ட காலம் தொடர்ந்து சேமிப்பது. மாதம் செலுத்தும் தொகை சிறியதாக இருந்தாலும், 20–25 ஆண்டுகள் அதை தொடர்ந்து வைத்திருந்தால் வட்டியின் மூலம் தொகை கணிசமாக வளர முடியும். அதே நேரத்தில், வேலை இடைவெளி, PF பணத்தை முன்கூட்டியே எடுத்துக்கொள்வது போன்றவை நீண்டகால வளர்ச்சியை பாதிக்கலாம்.

எனவே சம்பளத்தில் PF பிடித்தம் செய்யப்படுகிறது என்பதுடன் நின்றுவிடாமல், உங்கள் EPF கணக்கில் எவ்வளவு சேர்கிறது, நிறுவனத்தின் பங்களிப்பு எவ்வளவு, VPF தேவையா, ஓய்வுக்கால இலக்குக்கு இது போதுமா என்பதையும் அவ்வப்போது பார்த்துக்கொள்வது நல்லது.

குறிப்பு : மேலே உள்ள ரூ.1 கோடி, ரூ.76.6 லட்சம், ரூ.1.58 கோடி போன்றவை 8.25% ஆண்டு வட்டி மற்றும் குறிப்பிட்ட காலத்துக்கு தொடர்ந்து பங்களிப்பு செய்யப்படும் என்ற அனுமானத்தின் அடிப்படையிலான எடுத்துக்காட்டு கணக்குகள். உண்மையான EPF வட்டி மற்றும் விதிகளுக்கு ஏற்ப இறுதித் தொகை மாறலாம்.

இதையும் படிங்க : Housework : வீட்டு வேலைகளை சீக்கிரம் முடிக்கணுமா? இந்த 7 பழக்கங்களை முயற்சி பண்ணிப் பாருங்க!