- Home
- Business
- Vegetable Price Today: சமையல் செலவு மீண்டும் அதிகரிக்கிறதா? வெங்காயம் முதல் தக்காளி வரை இன்றைய காய்கறி விலை நிலவரம்!
Vegetable Price Today: சமையல் செலவு மீண்டும் அதிகரிக்கிறதா? வெங்காயம் முதல் தக்காளி வரை இன்றைய காய்கறி விலை நிலவரம்!
சென்னை கோயம்பேடு மற்றும் கள்ளக்குறிச்சி உழவர் சந்தையில் காய்கறிகளின் விலை என்ன? சின்ன வெங்காயம், பெரிய வெங்காயம், தக்காளி, உருளைக்கிழங்கு உள்ளிட்ட காய்கறிகளின் விலை நிலவரத்தைப் பாருங்கள்.

விலை நிலவரத்தை தெரிஞ்சுக்கிட்டு காய்கறி வாங்க போங்க.!
சென்னையில் காய்கறிகளின் விலை உயர்வு குடும்ப பட்ஜெட்டில் மீண்டும் தாக்கத்தை ஏற்படுத்துகிறதா? சின்ன வெங்காயம், பெரிய வெங்காயம், தக்காளி, பச்சை மிளகாய் உள்ளிட்ட அன்றாட சமையலுக்குத் தேவையான காய்கறிகளின் விலை நிலவரத்தை இல்லத்தரசிகள் உன்னிப்பாகக் கவனித்து வருகின்றனர். குறிப்பாக, கடந்த சில நாட்களாக சில காய்கறிகளின் விலையில் ஏற்ற இறக்கங்கள் காணப்படுவதால், சந்தைக்குச் செல்லும் பொதுமக்கள் விலையை ஒப்பிட்டுப் பொருட்களை வாங்க வேண்டிய நிலை ஏற்பட்டுள்ளது.
இன்றைய கள்ளக்குறிச்சி உழவர் சந்தை விலைப் பட்டியலின்படி, தக்காளி முதல் தரம் கிலோ ரூ.35-க்கும், இரண்டாம் தரம் ரூ.30-க்கும் விற்பனை செய்யப்படுகிறது. சின்ன வெங்காயம், பெரிய வெங்காயம் உள்ளிட்ட முக்கிய காய்கறிகளின் விலையும் கவனம் ஈர்க்கும் வகையில் உள்ளது.
கோயம்பேடு சந்தையில் வெங்காயம் விலை அதிர்ச்சி!
சென்னை கோயம்பேடு மொத்த காய்கறி சந்தையில் வெளியான சமீபத்திய விலை நிலவரத்தின்படி, பெரிய வெங்காயம் கிலோ ரூ.57 முதல் ரூ.68 வரையிலும், சின்ன வெங்காயம் ரூ.75 முதல் ரூ.88 வரையிலும் விற்பனை செய்யப்படுகிறது. தக்காளி ரூ.30 முதல் ரூ.35 வரையிலும், உருளைக்கிழங்கு ரூ.35 முதல் ரூ.42 வரையிலும், பச்சை மிளகாய் ரூ.70 முதல் ரூ.83 வரையிலும் விற்பனையாகிறது. இவை சந்தை விலைப் பட்டியலில் குறிப்பிடப்பட்டுள்ள விற்பனை விலை வரம்புகளாகும்.
குறிப்பாக சின்ன வெங்காயத்தின் விலைதான் பொதுமக்களைக் கவலைப்பட வைத்துள்ளது. கோயம்பேடு சந்தையில் சின்ன வெங்காயம் கிலோ ரூ.220 வரை உயர்ந்ததாகவும், வழக்கமான வரத்து குறைந்ததே இதற்குக் காரணம் என்றும் வியாபாரிகள் தெரிவித்துள்ளனர். மழைக்காலத்தில் வரத்து பாதிக்கப்படுவது விலை உயர்வுக்கு ஒரு காரணமாகக் கூறப்படுகிறது.
மற்ற காய்கறிகளின் விலை நிலவரம்
கோயம்பேடு சந்தையின் விலைப் பட்டியலின்படி, கேரட் ரூ.39 முதல் ரூ.46 வரையிலும், பீட்ரூட் ரூ.36 முதல் ரூ.43 வரையிலும், பீன்ஸ் ரூ.46 முதல் ரூ.55 வரையிலும் விற்பனை செய்யப்படுகிறது. அவரைக்காய் ரூ.48 முதல் ரூ.57 வரையிலும், கத்திரிக்காய் ரூ.39 முதல் ரூ.46 வரையிலும், வெண்டைக்காய் ரூ.32 முதல் ரூ.38 வரையிலும் உள்ளது.
முருங்கைக்காய் ரூ.77 முதல் ரூ.91 வரையிலும், குடைமிளகாய் ரூ.50 முதல் ரூ.59 வரையிலும், பாகற்காய் ரூ.44 முதல் ரூ.52 வரையிலும் விற்பனையாகிறது. பூண்டு ரூ.155 முதல் ரூ.183 வரையிலும், இஞ்சி ரூ.149 முதல் ரூ.176 வரையிலும் உள்ளது.
கள்ளக்குறிச்சி உழவர் சந்தை இன்றைய காய்கறி விலைப் பட்டியல் – நவம்பர் 20
நவம்பர் 20ஆம் தேதி கள்ளக்குறிச்சி உழவர் சந்தையில் வெளியிடப்பட்ட விலைப் பட்டியலின்படி, காய்கறிகளின் விலை விவரம் பின்வருமாறு உள்ளது.
தக்காளி தரம் 1 கிலோ ரூ.35-க்கும், தரம் 2 ரூ.30-க்கும் விற்பனையாகிறது. சின்ன வெங்காயம் ரூ.50 முதல் ரூ.80 வரையிலும், பழைய சின்ன வெங்காயம் ரூ.100-க்கும் கிடைக்கிறது. பெரிய வெங்காயம் தரம் 1 ரூ.70, தரம் 2 ரூ.60 என்ற நிலையில் உள்ளது. உருளைக்கிழங்கு ரூ.35–40, பச்சை மிளகாய் ரூ.60, கேரட் ரூ.70, பீன்ஸ் ரூ.80, பீட்ரூட் ரூ.50, முட்டைக்கோஸ் ரூ.40, காலிஃபிளவர் ரூ.35–40 ஆகியவை விற்பனை செய்யப்படுகின்றன.
வெண்டைக்காய் ரூ.40, கத்திரிக்காய் ரூ.40–70, அவரைக்காய் ரூ.80–110, முருங்கைக்காய் ரூ.90, பூண்டு ரூ.220, இஞ்சி ரூ.100 ஆகியவை உள்ளன. மேலும் புடலங்காய் கிலோ ரூ.40, பீர்க்கங்காய் ரூ.50, பாகற்காய் ரூ.60–70, முள்ளங்கி ரூ.60, கொத்தவரை ரூ.50, சுரைக்காய் ரூ.13–15 என்ற விலையில் கிடைக்கின்றன.
கீரை வகைகள் ஒரு கட்டுக்கு ரூ.10 என்ற நிலையில் விற்பனையாகிறது.பழங்களில் பூவன் வாழைப்பழம் ரூ.40–50, பப்பாளி ரூ.35–40, கொய்யா ரூ.80, எலுமிச்சை கிலோ ரூ.200 என்ற விலையில் விற்பனை செய்யப்படுகிறது.
கடந்த வாரத்துடன் ஒப்பிடும்போது என்ன மாற்றம்?
கடந்த வாரத்தில் கோயம்பேடு சந்தை விலை விவரங்களுடன் ஒப்பிட்டுப் பார்க்கும்போது, சின்ன வெங்காயம், பெரிய வெங்காயம், தக்காளி உள்ளிட்டவற்றின் விலையில் மாற்றங்கள் ஏற்பட்டுள்ளன. தரம், வரத்து, விற்பனை நேரம் ஆகியவற்றைப் பொறுத்து விலையில் வேறுபாடு இருக்கலாம்.
இல்லத்தரசிகள் கவனத்திற்கு!
மழைக்காலத்தில் காய்கறிகளின் வரத்து பாதிக்கப்படும்போது விலை உயர வாய்ப்புள்ளது. குறிப்பாக சின்ன வெங்காயம், பூண்டு, முருங்கைக்காய் போன்றவற்றின் விலை குடும்பங்களின் சமையல் செலவில் தாக்கத்தை ஏற்படுத்தக்கூடும். எனவே, சந்தைக்குச் செல்வதற்கு முன்பு அன்றைய விலையை விசாரித்து, தேவையான அளவு மட்டுமே வாங்குவது குடும்ப பட்ஜெட்டைச் சமாளிக்க உதவும்.
குறிப்பு: கோயம்பேடு விலைகள் சமீபத்திய சந்தைத் தகவல்களின் அடிப்படையிலும், கள்ளக்குறிச்சி விலைகள் நவம்பர் 20ஆம் தேதி வழங்கப்பட்ட உழவர் சந்தைப் பட்டியலின் அடிப்படையிலும் தொகுக்கப்பட்டுள்ளன. இரு சந்தைகளின் விலைகளும் ஒன்றாக இருக்க வேண்டிய அவசியமில்லை.
வணிகம் (Business Ideas in Tamil), வங்கிகள் (Banking News), நிதி, இந்திய பொருளாதாரம் , உலக சந்தை, பங்கு சந்தை, முதலீடு உள்ளிட்ட பல்வேறு தகவல்கள் மற்றும் சமீபத்திய நிதி செய்திகள் அனைத்தையும் ஏஷ்யாநெட் தமிழ் நியூஸில் படிக்கலாம்.














