கார் முதல் டிராக்டர் வரை… மக்கள் அதிகம் வாங்கி குவித்த வாகனம் எது தெரியுமா?
2025 டிசம்பர் மாதத்தில் இந்தியாவின் வாகன சில்லறை விற்பனை 26.64% உயர்ந்துள்ளது, இதில் கிராமப்புற சந்தைகளின் பங்களிப்பு அதிகமாக உள்ளது. இந்த வலுவான வளர்ச்சி 2026-ஆம் ஆண்டிற்கும் ஒரு நல்ல தொடக்கமாக அமைந்துள்ளது.
டிசம்பர் 2025 வாகன விற்பனை
2025 டிசம்பர் மாதத்தில் இந்தியாவின் வாகன சில்லறை விற்பனை எதிர்பாராத அளவுக்கு வலுவாக உயர்ந்துள்ளது. Federation of Automobile Dealers Associations (FADA) வெளியிட்டுள்ள புள்ளிவிவரங்கள் இதை உறுதி செய்கின்றன. அந்த தரவுகளின்படி, டிசம்பர் மாத கார் சில்லறை விற்பனை கடந்த ஆண்டை விட 26.64% உயர்ந்து 3,79,671 யூனிட்களாக பதிவாகியுள்ளது. குறிப்பாக, நகரங்களை விட கிராமப்புற சந்தைகளில் தேவை அதிகமாக இருந்தது. கிராமப்புறங்களில் கார் விற்பனை 32.40% உயர்ந்த நிலையில், நகர்ப்புறங்களில் இந்த வளர்ச்சி 22.93% மட்டுமே. இதன் மூலம், தனிநபர் வாகனங்களுக்கான தேவை மெட்ரோ நகரங்களைத் தாண்டி வேகமாக பரவி வருவது தெளிவாகிறது.
2025 முழு காலண்டர் ஆண்டை எடுத்துக் கொண்டால், மொத்த வாகன சில்லறை விற்பனை 9.70% உயர்ந்து 44,75,309 யூனிட்களாக உள்ளது. இதில் கிராமப்புற சந்தைகள் முக்கிய பங்கு வகிக்கின்றன. கிராமப்புறங்களில் விற்பனை 12.31% உயர்ந்த நிலையில், நகர்ப்புறங்களில் 8.08% வளர்ச்சியே பதிவாகியுள்ளது. இது, இந்திய ஆட்டோமொபைல் துறை மெட்ரோ அல்லாத சந்தைகளின் மீது அதிகமாக சார்ந்திருப்பதைக் காட்டுகிறது.
கார் விற்பனை உயர்வு
அனைத்து வாகன பிரிவுகளிலும் வளர்ச்சி காணப்பட்டதாக FADA தலைவர் சி.எஸ். விக்னேஷ்வர் தெரிவித்துள்ளார். 2025-ல் மொத்த ஆட்டோ சில்லறை விற்பனை 2,81,61,228 யூனிட்களாக இருந்தது, இது கடந்த ஆண்டை விட 7.71% அதிகம். முதல் பாதியில் விற்பனை மந்தமாக இருந்தாலும், செப்டம்பர் மாதத்திற்கு பிறகு ஜிஎஸ்டி 2.0 காரணமாக வாகன விலை குறைந்தது, நுகர்வோர் நம்பிக்கை உயர்ந்ததும் விற்பனைக்கு ஊக்கம் அளித்தது. டிசம்பரில் மட்டும் மொத்த ஆட்டோ விற்பனை 14.63% உயர்ந்து 20,28,821 யூனிட்களை எட்டியது. இந்த மாதத்தில் வர்த்தக வாகனங்கள் 24.60%, மூன்று சக்கர வாகனங்கள் 36.10%, இரு சக்கர வாகனங்கள் 9.50% மற்றும் டிராக்டர்கள் 15.80% வளர்ச்சியைப் பதிவு செய்தன.
மேலும், மாற்று எரிபொருள் வாகனங்களுக்கான தேவை தொடர்ந்து உயர்ந்து வருகிறது. 2025-ல் பயணிகள் வாகனங்களில் 21.30% சிஎன்ஜி வாகனங்களாகவும், 3.95% மின்சார வாகனங்களாகவும் இருந்தன. டிசம்பர் மாதத்திலும் இதே போக்கு தொடர்ந்தது. இரு சக்கர, பயணிகள் மற்றும் வர்த்தக வாகன பிரிவுகளில் மின்சார வாகனங்களின் பங்கு அதிகரித்துள்ளது, சிஎன்ஜி வாகனங்களும் தனது இருப்பை வலுப்படுத்தியுள்ளது. ஒட்டுமொத்தமாக, 2025 ஆண்டு வலுவான தேவை மற்றும் உயர்ந்த நம்பிக்கையுடன் முடிவடைந்துள்ளது. இது 2026-க்கும் நல்ல தொடக்க அறிகுறியாக பார்க்கப்படுகிறது.
