லெவல்-2 ADAS பாதுகாப்புடன் புதிய ஹெக்டர்.. 2026 மாடல் எப்படி இருக்கும்?
2026 எம்ஜி ஹெக்டர் மாடல், 2025 இறுதியில் ஃபேஸ்லிஃப்ட் அப்டேட்களுடன் அறிமுகமாகும் என எதிர்பார்க்கப்படுகிறது. இன்ஜின் தேர்வுகளில் மாற்றம் இருக்காது, ஆனால் வெண்டிலேட்டட் பின் இருக்கைகள் போன்ற புதிய அம்சங்கள் சேர்க்கப்படலாம்.
2026 எம்ஜி ஹெக்டர்
2026 மாடல் எம்ஜி ஹெக்டர் (எம்ஜி ஹெக்டர்) இந்தியாவில் 2025 டிசம்பர் 15 அன்று அறிமுகமாகும் என எதிர்பார்க்கப்படுகிறது. 2019-ல் எம்ஜி மோட்டார் இந்தியாவில் அறிமுகப்படுத்திய முதல் எஸ்யூவி ஹெக்டர் ஆகும். பிராண்டின் அடையாளத்தை உருவாக்கிய இந்த மாடல், சமீப காலங்களில் கடும் போட்டி காரணமாக விற்பனையில் சிறிது பின்னடைவை சந்தித்துள்ளது. இதனை மாற்றும் நோக்கில், 2026 ஹெக்டர் அப்டேட் மூலம் மேலும் பிரீமியம் நிலைக்கு நகர்ந்து, வாடிக்கையாளர்களின் கவனத்தை மீண்டும் ஈர்க்க எம்ஜி திட்டமிட்டுள்ளது. இந்த அப்டேட் முக்கியமாக ஃபேஸ்லிஃப்ட் மாற்றங்களை மையமாகக் கொண்டுள்ளது.
எம்ஜி எஸ்யூவி
வெளிப்புற தோற்றத்தில் பெரிய முன்பக்க கிரில், புதுப்பிக்கப்பட்ட முன் மற்றும் பின் பம்பர்கள் ஆகியவை இடம்பெறும். குரோம் ஆக்சென்ட்கள் தொடர்ந்து வழங்கப்படும், மேலும் LED ஹெட்லாம்ப் மற்றும் டெயில்ட் அமைப்புகளில் சிறிய மேம்பாடுகள் இருக்கும். கூடுதலாக, புதிய வடிவமைப்புடன் 19-இன்ச் அலாய் வீல்களும் வழங்கப்படலாம், இதனால் ஹெக்டரின் சாலை முன்னிலையும் கம்பீரமாக மாறும். உட்புறத்தில் பெரிய மாற்றங்கள் இல்லாவிட்டாலும், கேபினின் உணர்வை புதுப்பிக்கும் வகையில் புதிய அப்ஹோல்ஸ்டரி மற்றும் வண்ணத் தேர்வுகள் அறிமுகமாகும் என எதிர்பார்க்கப்படுகிறது.
எம்ஜி ஹெக்டர் ஃபேஸ்லிஃப்ட்
பெரிய டச் ஸ்கிரீன் டிஸ்ப்ளே தொடரும் நிலையில், இன்ஃபோடெயின்மென்ட் இன்டர்ஃபேஸில் மென்பொருள் அப்டேட் வழங்கப்படலாம். இதன் மூலம் பயனர் அனுபவம் மேலும் மென்மையாகவும், நவீனமாகவும் மாறும். அம்சங்களின் அடிப்படையில், 2026 எம்ஜி ஹெக்டர் தற்போதைய வசதிகளை தக்கவைத்துக்கொண்டு, சில புதிய மேம்பாடுகளுடன் வரும். பனோரமிக் சன்ரூஃப், டிஜிட்டல் இன்ஸ்ட்ரூமென்ட் கிளஸ்டர், ஆம்பியன்ட் லைட்டிங், வயர்லெஸ் சார்ஜிங், பவர்டு டிரைவர் சீட் மற்றும் ஏர் பியூரிஃபையர் போன்ற வசதிகள் தொடரும். கூடுதலாக, வெண்டிலேட்டட் பின் இருக்கைகள் போன்ற புதிய அம்சங்களும் சேர்க்கப்பட வாய்ப்புள்ளது.
எம்ஜி ஹெக்டர் அப்டேட்
பவர்டிரெய்ன் பகுதியில் பெரிய மாற்றங்கள் எதிர்பார்க்கப்படவில்லை. 1.5 லிட்டர் டர்போ பெட்ரோல் இன்ஜின் 141 bhp சக்தி மற்றும் 250 Nm டார்க் வழங்கும்; இது மேனுவல் மற்றும் CVT கியர்பாக்ஸ்களுடன் கிடைக்கும். 2.0 லிட்டர் டர்போ டீசல் இன்ஜின் 167 bhp சக்தி மற்றும் 350 Nm டார்க் உற்பத்தி செய்யும், இது 6-ஸ்பீட் மேனுவல் கியர்பாக்ஸுடன் மட்டும் வழங்கப்படும். பாதுகாப்பு அம்சங்களில் ஆறு ஏர்பேக்குகள், 360 டிகிரி கேமரா, லெவல்-2 ADAS உள்ளிட்டவை தொடரும்.
