- Home
- Auto
- சிஎன்ஜி சந்தையில் மஹிந்திராவின் என்ட்ரி! ஆட்டம் காணப்போகும் மாருதி, டாடா கோட்டை! அப்படி என்ன ஸ்பெஷல்?
சிஎன்ஜி சந்தையில் மஹிந்திராவின் என்ட்ரி! ஆட்டம் காணப்போகும் மாருதி, டாடா கோட்டை! அப்படி என்ன ஸ்பெஷல்?
Mahindra XUV 3XO CNG: இந்தியாவின் சிஎன்ஜி கார் சந்தையில் போட்டியை அதிகரிக்க, மஹிந்திரா நிறுவனம் தனது பிரபலமான XUV 3XO எஸ்யூவியின் சிஎன்ஜி வேரியன்ட்டை அறிமுகம் செய்யத் தயாராகி வருகிறது.
சிஎன்ஜி கார்கள்
சிஎன்ஜி (CNG - Compressed Natural Gas) கார்கள் தற்போது இந்தியாவில் பெட்ரோல் மற்றும் டீசல் விலையேற்றத்திற்கு ஒரு மிகச்சிறந்த மாற்றாக உருவெடுத்துள்ளன. நடுத்தர மக்களுக்கு மைலேஜ் மற்றும் சேமிப்பு என இரண்டு விதத்திலும் இது கைகொடுக்கிறது. ஆகையால் அதிகளவிலான பொதுமக்கள் சிஎன்ஜி காரை விரும்ப ஆரம்பித்துள்ளனர். இந்நிலையில் சிஎன்ஜி கார் சந்தையில் தற்போது மாருதி சுஸுகி, டாடா மோட்டார்ஸ், ஹூண்டாய் போன்ற நிறுவனங்கள் தான் உள்ளன. இவர்களுக்கு சவால் கொடுக்கும் வகையில் மஹிந்திரா நிறுவனமும் இந்த போட்டியில் களமிறங்கத் தயாராகிவிட்டது. அதன் பிரபலமான எஸ்யூவியான மஹிந்திரா XUV 3XO-வின் சிஎன்ஜி வேரியன்ட்டை அறிமுகம் செய்ய திட்டமிட்டுள்ளது.
XUV 3XO சிஎன்ஜி-யில் ஸ்பெஷல் என்ன?
தற்போது XUV 3XO பெட்ரோல், டீசல் இன்ஜின் ஆப்ஷன்களிலும், ஒரு எலக்ட்ரிக் வேரியன்ட்டிலும் கிடைக்கிறது. வரவிருக்கும் சிஎன்ஜி மாடலில் 1.2 லிட்டர் mStallion டர்போ பெட்ரோல் இன்ஜின் பொருத்தப்பட்டிருக்கும் என்று எதிர்பார்க்கப்படுகிறது. பெட்ரோல் மோடில் இந்த இன்ஜின் 112 PS பவரையும், 200 Nm டார்க்கையும் கொடுக்கும். சிஎன்ஜி வேரியன்ட், 6-ஸ்பீடு மேனுவல் கியர்பாக்ஸுடன் (6MT) மட்டுமே வர வாய்ப்புள்ளது.
மஹிந்திராவிடம் இதே இன்ஜினின் TGDi வெர்ஷனும் உள்ளது. அது இன்னும் அதிக சக்தி வாய்ந்தது (130 PS/230 Nm). ஆனால், சிஎன்ஜி-க்கு MPFi இன்ஜின்தான் எளிமையானது மற்றும் செலவு குறைந்தது. எனவே, சிஎன்ஜி மாடலில் MPFi இன்ஜின்தான் பயன்படுத்தப்படும் என எதிர்பார்க்கப்படுகிறது.
சிஎன்ஜி செட்டப் எப்படி இருக்கலாம்?
இப்போதெல்லாம் பல நிறுவனங்கள் பூட் ஸ்பேஸை மிச்சப்படுத்த, டூயல்-சிலிண்டர் சிஎன்ஜி செட்டப்பை வழங்குகின்றன. சில கார்களில் காருக்கு அடியில் சிஎன்ஜி டேங்க் பொருத்தும் தொழில்நுட்பமும் வந்துவிட்டது. எனவே, XUV 3XO சிஎன்ஜி-யிலும் இதே போன்ற ஒரு ஸ்மார்ட்டான செட்டப்பை நாம் எதிர்பார்க்கலாம்.
அறிமுகம் மற்றும் விலை
மஹிந்திரா இந்த சிஎன்ஜி வேரியன்ட்டை இந்த ஆண்டு இறுதியிலோ அல்லது அடுத்த ஆண்டு தொடக்கத்திலோ அறிமுகம் செய்யலாம் என எதிர்பார்க்கப்படுகிறது. இதன் விலை, அதன் போட்டியாளர்களுக்கு இணையாகவே இருக்கும் என கூறப்படுகிறது. உதாரணமாக, டாடா நெக்ஸான் சிஎன்ஜி காரின் ஆரம்ப விலை சுமார் ரூ.9.15 லட்சம். மாருதி பிரெஸ்ஸா CNG காரின் விலை ரூ.9.17 லட்சத்தில் இருந்து ரூ.11.46 லட்சம் வரை உள்ளது.
விற்பனை அதிகரிக்க வாய்ப்பு
நான்கு மீட்டருக்கும் குறைவான நீளமுள்ள எஸ்யூவி பிரிவில், ரெனால்ட் கைகர், ரெனால்ட் டிரைபர், ஸ்கோடா குஷாக் போன்ற மாடல்களும் விரைவில் சிஎன்ஜி ஆப்ஷன்களைக் கொண்டு வரலாம். இந்தியாவில் சிஎன்ஜி கார்களின் சந்தை பங்கு ஏற்கனவே 20 சதவீதத்தைத் தாண்டிவிட்டது. எனவே, XUV 3XO-வின் சிஎன்ஜி வேரியன்ட், மஹிந்திராவின் விற்பனையை அதிகரிக்க ஒரு நல்ல வாய்ப்பாக அமையும்.
