இந்தியாவில் ஹைப்ரிட் கார்கள் வேகம் பிடிக்குது.. கியா–ரெனால்ட் ரெடி!
இந்திய ஆட்டோமொபைல் சந்தையில் ஹைப்ரிட் கார்களின் தேவை அதிகரித்து வரும் நிலையில், கியா மற்றும் ரெனால்ட் நிறுவனங்கள் 2026-ல் தங்களின் முதல் ஹைப்ரிட் எஸ்யூவிகளை அறிமுகப்படுத்த தயாராகி வருகின்றன.
ஹைப்ரிட் கார்கள்
இந்திய ஆட்டோமொபைல் சந்தையில் ஹைப்ரிட் கார்கள் மீது ஆர்வம் மெதுவாக ஆனால் உறுதியாக அதிகரித்து வருகிறது. எரிபொருள் சேமிப்பு, குறைந்த மாசு மற்றும் நடைமுறை பயன்பாடு போன்ற காரணங்களால், ஹைப்ரிட் தொழில்நுட்பம் பலரின் கவனத்தை ஈர்க்கத் தொடங்கியுள்ளது. இந்த வளர்ந்து வரும் தேவையை கருத்தில் கொண்டு, முன்னணி கார் தயாரிப்பு நிறுவனங்கள் ஹைப்ரிட் வாகனங்களின் மீது அதிக கவனம் செலுத்தி வருகின்றன. குறிப்பாக, கியா மற்றும் ரெனால்ட் நிறுவனங்கள் 2026-ஆம் ஆண்டில் தங்களின் முதல் ஹைப்ரிட் எஸ்யூவிகளை இந்திய சந்தையில் அறிமுகப்படுத்தி வருகின்றன.
ஹைப்ரிட் எஸ்யூவி 2026
கியா நிறுவனத்தின் பிரீமியம் 3-வரிசை எஸ்யூவியான சொரெண்டோ, 2026-ன் பிற்பகுதியில் இந்தியாவில் அறிமுகமாகும் என எதிர்பார்க்கப்படுகிறது. உலக சந்தையில் தற்போது நான்காம் தலைமுறையில் விற்பனை செய்யப்படும் இந்த மாடல், பெட்ரோல், ஹைப்ரிட் மற்றும் பிளக்-இன் ஹைப்ரிட் என பல பவர்டிரெயின் விருப்பங்களுடன் கிடைக்கிறது. இந்திய சந்தைக்காக, 1.5-லிட்டர் நேச்சுரலி ஆஸ்பிரேட்டட் பெட்ரோல் இன்ஜினுடன் கூடிய ஹைப்ரிட் அமைப்பை கியா வழங்கலாம் என தகவல்கள் தெரிவிக்கின்றன.
கியா சொரெண்டோ ஹைப்ரிட்
அம்சங்களைக் கருத்தில் கொண்டு, கியா சொரெண்டோ ஒரு முழுமையான பிரீமியம் அனுபவத்தை வழங்கும். இதில் டூயல் டிஜிட்டல் ஸ்கிரீன்கள், ஹீட் மற்றும் வென்டிலேட்டட் இருக்கைகள், வயர்லெஸ் சார்ஜிங், போஸ் சவுண்ட் சிஸ்டம், 360-டிகிரி சரவுண்ட் வியூ கேமரா, வயர்லெஸ் ஆப்பிள் கார்ப்ளே மற்றும் ஆண்ட்ராய்டு ஆட்டோ, லெவல்-2 ADAS உள்ளிட்ட பல நவீன பாதுகாப்பு மற்றும் வசதி அம்சங்கள் இடம் பெறும் என எதிர்பார்க்கப்படுகிறது.
ரெனால்ட் டஸ்டர் ஹைப்ரிட்
மற்றொரு புறம், ரெனால்ட் நிறுவனத்தின் டஸ்டர் ஹைப்ரிட் எஸ்யூவியும் இந்திய சந்தையில் பெரும் எதிர்பார்ப்பை உருவாக்கியுள்ளது. உலக சந்தையில் டேசியா டஸ்டர் என்ற பெயரில் விற்பனை செய்யப்படும் இந்த மாடல், 1.6-லிட்டர் பெட்ரோல் இன்ஜின், 1.2 kWh பேட்டரி மற்றும் டூயல் எலக்ட்ரிக் மோட்டார்களுடன் 140 பிஎச்பி ஒருங்கிணைந்த சக்தியை வழங்குகிறது. வடிவமைப்பில் பெட்ரோல் பதிப்பைப் போலவே இருக்கும் இந்த ஹைப்ரிட் எஸ்யூவி, பெரிய டச் ஸ்கிரீன், பனோரமிக் சன்ரூஃப், லெவல்-2 ADAS போன்ற அம்சங்களுடன் வரக்கூடும். இதனால், 2026-ல் இந்திய ஹைப்ரிட் எஸ்யூவி சந்தை மேலும் சூடுபிடிக்கும் என எதிர்பார்க்கப்படுகிறது.
