- Home
- Auto
- ராயல் என்ஃபீல்டுக்கு ஆப்பு வைக்க மீண்டும் களமிறங்கிய ஹோண்டா ரெபெல் 500: விலை & சிறப்பம்சங்கள் இதோ!
ராயல் என்ஃபீல்டுக்கு ஆப்பு வைக்க மீண்டும் களமிறங்கிய ஹோண்டா ரெபெல் 500: விலை & சிறப்பம்சங்கள் இதோ!
இந்தியாவிலேயே அசெம்பிள் செய்யப்பட்டு உள்நாட்டு உதிரிபாகங்கள் பயன்படுத்தப்படுவதால், ஹோண்டா ரெபெல் 500 பைக் முன்பை விடக் குறைந்த விலையில் மீண்டும் அறிமுகமாகியுள்ளது.

ஹோண்டா ரெபெல் 500
இந்தியப் பிரீமியம் க்ரூஸர் பைக் சந்தையில் ஹோண்டா பைக் நிறுவனம் தனது ரெபெல் 500 பைக்கை புதிய மேம்பாடுகளுடன் மீண்டும் அறிமுகப்படுத்தியுள்ளது. முன்பு இறக்குமதி செய்யப்பட்ட சிபியூ (CBU) மாடலாக விற்பனை செய்யப்பட்ட இந்த பைக், தற்போது உள்நாட்டு உதிரிபாகங்கள் மற்றும் இந்தியாவிலேயே அசெம்பிள் செய்யப்படுவதால் விலை கணிசமாகக் குறைந்துள்ளது.
விலை & வேரியண்ட்டுகள்
புதிய ஹோண்டா ரெபெல் 500, 2 வேரியண்ட்டுகளில் விற்பனைக்கு வந்துள்ளது. ஸ்டாண்டர்டு மாடலின் பெங்களூர் எக்ஸ்ஷோரூம் விலை ரூ.4,49,900 ஆகவும், இ-கிளட்ச் (E-Clutch) தொழில்நுட்பம் கொண்ட மாடலின் விலை ரூ.4,89,900 ஆகவும் நிர்ணயிக்கப்பட்டுள்ளது. முன்னதாக ரூ.5.12 லட்சமாக இருந்த இதன் விலை, உள்ளூர் உற்பத்தி காரணமாக வாடிக்கையாளர்களுக்குச் சாதகமாக மாறியுள்ளது.
எஞ்சின் & டிசைன்
இதில் 471 சிசி, லிக்யூடு கூல்டு, பேரலல் ட்வின் சிலிண்டர் எஞ்சின் இடம்பெற்றுள்ளது. இது 46 எச்பி பவரையும், 43.3 என்எம் டார்க்கையும் வெளிப்படுத்தும் திறன் கொண்டது; 6-ஸ்பீடு கியர்பாக்ஸுடன் இணைக்கப்பட்டுள்ளது. பாபர் (Bobber) டிசைனில் கருப்பு நிற பாகங்கள், வட்ட வடிவ எல்இடி புரொஜெக்டர் ஹெட்லேம்ப், 11.2 லிட்டர் எரிபொருள் டேங்க் மற்றும் 690 மிமீ குறைவான சீட் உயரம் ஆகியவை இதன் சிறப்பம்சங்களாகும். 191 கிலோ எடை கொண்ட இப்பைக், 16 இன்ச் வீல்களுடன் வருகிறது.
இ-கிளட்ச் & பாதுகாப்பு வசதிகள்
புதிய ரெபெல் 500-ல் வழங்கப்பட்டுள்ள இ-கிளட்ச் தொழில்நுட்பம், கியர் மாற்றும்போது மற்றும் வாகனத்தை நிறுத்தி மீண்டும் நகர்த்தும்போது கிளட்ச் லிவரை இயக்கும் வேலையை மின்னணு முறையில் தானாகச் செய்கிறது. போக்குவரத்து நெரிசலில் இது பயனுள்ளதாக இருந்தாலும், தேவைப்பட்டால் கிளட்ச் லிவரையும் பயன்படுத்தலாம். மேலும், 3.5 இன்ச் வட்ட வடிவ டிஎஃப்டி டிஸ்பிளே, ஹோண்டா ரோட்சிங்க் இணைப்பு, டர்ன்-பை-டர்ன் நேவிகேஷன், டிராக்ஷன் கன்ட்ரோல், டெலஸ்கோபிக் ஃபோர்க், இரட்டை ஷாக் அப்சார்பர்கள் மற்றும் டூயல் சேனல் ஏபிஎஸ் (ABS) வசதிகளும் உள்ளன.
முன்பதிவு & போட்டி
ராயல் என்ஃபீல்டு ஷாட்கன் 650 உள்ளிட்ட மாடல்களுக்குப் போட்டியாகக் களமிறங்கும் இப்பைக், மேட் ஆக்சிஸ் கிரே மெட்டாலிக் மற்றும் மேட் டியூன் பிரவுன் நிறங்களில் கிடைக்கிறது. ரூ.5,000 முன்பணத்தில் ஹோண்டா இணையதளம் மற்றும் பிக்விங் விற்பனையகங்களில் முன்பதிவு தொடங்கப்பட்டுள்ளது. உள்நாட்டு உற்பத்தியால் குறைந்துள்ள விலை, இ-கிளட்ச் வசதி ஆகியவை க்ரூஸர் பிரியர்களிடையே ரெபெல் 500-க்கான வரவேற்பை அதிகரிக்கும் என எதிர்பார்க்கப்படுகிறது.














