Honda QC3: அதிக பொருட்கள் வைக்கலாம்.. 145 கி.மீ ரேஞ்ச்.. புதிய ஹோண்டா ஸ்கூட்டர் விலை எவ்ளோ? முழு விபரம்

Honda QC3: ஹோண்டாவின் புதிய எலக்ட்ரிக் ஸ்கூட்டரை ஒருமுறை முழுமையாக சார்ஜ் செய்தால் 145 கி.மீ வரை செல்லும் என தெரிவிக்கப்பட்டுள்ளது. 32 லிட்டர் பொருள் வைக்கும் இடம், குடும்பப் பயன்பாட்டுக்கான வசதிகள் என பல அம்சங்களுடன் வந்துள்ளது.

Image Credit : Honda

ஹோண்டா கியூசி3 எலக்ட்ரிக் ஸ்கூட்டர்

இந்தியாவில் எலக்ட்ரிக் ஸ்கூட்டர்களுக்கான வரவேற்பு தொடர்ந்து அதிகரித்து வரும் நிலையில், ஹோண்டா நிறுவனம் குடும்பப் பயன்பாட்டை வைத்து புதிய கியூசி3 எலக்ட்ரிக் ஸ்கூட்டரை அறிமுகம் செய்துள்ளது. இதன் டெல்லி விற்பனையக விலை ரூ.1.35 லட்சமாக நிர்ணயம் செய்யப்பட்டுள்ளது. இந்த ஸ்கூட்டரின் மிகப்பெரிய சிறப்பு, 3 கிலோவாட் மணி திறன் கொண்ட பேட்டரி மூலம் ஒருமுறை முழுமையாக சார்ஜ் செய்தால் 145 கி.மீ வரை செல்ல முடியும் என்று ஹோண்டா தெரிவித்திருப்பதுதான். இந்தியாவில் ஹோண்டா விற்பனை செய்யும் எலக்ட்ரிக் ஸ்கூட்டர்களில் தற்போது அதிக பயணத் தூரம் கொண்ட மாடலாக கியூசி3 உள்ளது. இதற்கான முன்பதிவு ரூ.5,000 முன்பணம் மூலம் தொடங்கியுள்ளது.

Image Credit : Honda

ஹோண்டாவின் புதிய ஸ்கூட்டர்

ஹோண்டாவின் இணையதளம் அல்லது தேர்ந்தெடுக்கப்பட்ட அங்கீகரிக்கப்பட்ட ரெட்விங் விற்பனையகங்கள் மூலம் முன்பதிவு செய்யலாம். ஆனால் நாடு முழுவதும் ஒரே நேரத்தில் விற்பனை தொடங்கவில்லை. முதல் கட்டமாக டெல்லி, ஆக்ரா, கட்டக், சூரத் மற்றும் கொல்லம் ஆகிய ஐந்து நகரங்களில் உள்ள தேர்ந்தெடுக்கப்பட்ட விற்பனையகங்களில் மட்டுமே இந்த ஸ்கூட்டர் கிடைக்கும். அதன்பிறகு மற்ற நகரங்களுக்கும் படிப்படியாக விற்பனை விரிவுபடுத்தப்படும் என்று தெரிவிக்கப்பட்டுள்ளது.

Image Credit : Honda

32 லிட்டர் அளவு சேமிப்பு இடம்

நான்கு வண்ணங்களில் கியூசி3 கிடைக்கிறது. சாம்பல், வெள்ளை, இளம் நீலம் மற்றும் அடர் நீலம் ஆகிய வண்ணத் தேர்வுகள் வழங்கப்பட்டுள்ளன. குடும்பப் பயன்பாட்டை மையமாக வைத்து உருவாக்கப்பட்டிருப்பதால், தினசரி பயன்பாட்டுக்குத் தேவையான வசதிகளுக்கும் ஹோண்டா முக்கியத்துவம் கொடுக்கப்பட்டுள்ளது. குறிப்பாக இருக்கைக்கு கீழே 32 லிட்டர் அளவுக்கு பொருட்களை வைக்கக்கூடிய இடம் குடும்பத்தினருக்கு மிகவும் பயன்படும் அம்சமாக உள்ளது.

Image Credit : Honda

Honda புதிய எலக்ட்ரிக் ஸ்கூட்டர்

கியூசி3 ஸ்கூட்டரில் 3 கிலோவாட் மணி திறன் கொண்ட நிலையான பேட்டரி பொருத்தப்பட்டுள்ளது. இதன் மூலம் 145 கி.மீ வரை செல்ல முடியும் என்று ஹோண்டா தெரிவித்துள்ளது. மின்கலனில் 0 முதல் 80 சதவீதம் வரை சார்ஜ் செய்ய சுமார் 2 மணி நேரம் 40 நிமிடங்கள் ஆகும். முழுமையாக சார்ஜ் செய்ய சுமார் 4 மணி நேரம் தேவை. ஓட்டுநருக்கு தேவையான தகவல்கள் காட்ட 5 அங்குல அளவிலான தொடுதிரை தகவல் பலகையும் இதில் வழங்கப்பட்டுள்ளது. மொபைலுடன் இணைக்கும் வசதி, வழிகாட்டும் வரைபட வசதி மற்றும் சாவி இல்லாமல் இயக்கும் வசதி ஆகியவை உள்ளன. அழைப்புகள் மற்றும் குறுஞ்செய்திகள் தொடர்பான தகவல்களையும் ஸ்கூட்டரின் தகவல் பலகையில் பார்க்கும் வசதி இருப்பதாக தெரிவிக்கப்பட்டுள்ளது.

Image Credit : Honda

டிவிஎஸ் ஐக்யூப் ஸ்கூட்டருக்கு போட்டி

தினசரி பயன்பாட்டை கருத்தில் கொண்டு, 32 லிட்டர் பொருள் வைக்கும் இடம் இதன் முக்கிய பலமாக உள்ளது. அலுவலகத்துக்குச் செல்வது, கடைக்குச் செல்வது அல்லது குடும்பத்துக்குத் தேவையான பொருட்களை எடுத்துச் செல்வது போன்ற பயன்பாடுகளுக்கு இந்த இடவசதி உதவும். விலை மற்றும் வசதிகளைப் பொறுத்தவரை, கியூசி3 தற்போது டிவிஎஸ் ஐக்யூப், பஜாஜ் சேடக், ஏத்தர் ரிஸ்டா மற்றும் விடா எலக்ட்ரிக் ஸ்கூட்டர்கள் இருக்கும் சந்தைப் பிரிவில் போட்டியிடுகிறது. ஹோண்டாவின் தற்போதைய எலக்ட்ரிக் ஸ்கூட்டர்களை ஒப்பிட்டுப் பார்த்தால், கியூசி3 அதிக பயணத் தூரத்தை வழங்கும் மாடலாக உள்ளது.

Image Credit : Honda

வீட்டிலேயே சார்ஜ் செய்யலாம்

வீட்டிலேயே ஸ்கூட்டரை சார்ஜ் செய்ய விரும்புபவர்களுக்கு இது வசதியாக இருக்கும். ஆனால் தற்போது ஐந்து நகரங்களில் மட்டுமே விற்பனை தொடங்குவதால், மற்ற பகுதிகளில் உள்ளவர்கள் நாடு முழுவதும் விற்பனை விரிவடையும் வரை காத்திருக்க வேண்டிய நிலை உள்ளது. 145 கி.மீ பயணத் தூரம், 32 லிட்டர் பொருள் வைக்கும் இடம், குடும்பப் பயன்பாட்டுக்கான வசதிகள் மற்றும் ஹோண்டாவின் நம்பகத்தன்மை ஆகியவற்றை ஒரே ஸ்கூட்டரில் வழங்க முயற்சிக்கிறது கியூசி3 என்பது குறிப்பிடத்தக்கது.