அடுத்தடுத்து 3 புதிய கார்கள் களமிறக்கி மாஸ் கம்பேக் கொடுக்கும் ஹோண்டா!
இந்திய சந்தையில் போட்டியைச் சமாளிக்க ஹோண்டா தயாராகி வருகிறது. 2030-க்குள் 10 புதிய கார்களை அறிமுகப்படுத்தும் திட்டத்தில் உள்ள அந்நிறுவனம் தற்போது 3 புதிய கார்களை அடுத்தடுத்து களமிறக்க உள்ளது.
Upcoming Honda Cars
இந்திய கார் மார்க்கெட்டில் மற்ற நிறுவனங்களிடமிருந்து ஹோண்டாவுக்கு கடும் போட்டி நிலவி வருகிறது. இந்த போட்டியில் ஹோண்டா சற்று பின்தங்கியிருப்பதாகவே தெரிகிறது. ரொம்ப காலமாகவே இந்திய சந்தையில் எந்த ஒரு புதிய காரையும் ஹோண்டா களமிறக்கவில்லை. இந்த நிலையில், ஒரு மாஸான கம்பேக் கொடுக்க நிறுவனம் தயாராகி வருவதாகத் தெரிகிறது. இதற்காக, 2030-க்குள் 10 புதிய கார்களை அறிமுகப்படுத்த உள்ளது, அதில் ஏழு கார்கள் எஸ்யூவி மாடல்களாக இருக்கும். இதில், '0 ஆல்ஃபா' கான்செப்ட்டை அடிப்படையாகக் கொண்ட ஒரு புதிய எலக்ட்ரிக் எஸ்யூவி தான் அடுத்த பெரிய அறிமுகமாக இருக்கும். இதனுடன், தனது சிட்டி மற்றும் எலிவேட் கார்களுக்கும் ஒரு அப்டேட்டைக் கொடுக்க உள்ளது.
ஹோண்டா சிட்டி ஃபேஸ்லிஃப்ட்
2028-ல் ஆறாவது தலைமுறை மாடல் வருவதற்கு முன்பு, ஹோண்டா சிட்டி செடானுக்கு மற்றுமொரு அப்டேட்டை கொடுக்க நிறுவனம் தயாராகி வருகிறது. இந்த புதிய சிட்டி, தீபாவளி பண்டிகை சீசனை ஒட்டி அறிமுகமாகும் என்று எதிர்பார்க்கப்படுகிறது. இதில், மேம்படுத்தப்பட்ட முன்பக்க கிரில், புதிய பம்பர்கள், புதிய ஹெட்லைட்கள், டெயில்லைட்கள் மற்றும் புதிய அலாய் வீல்கள் போன்ற மாற்றங்கள் இருக்கும் என எதிர்பார்க்கப்படுகிறது.
காரின் உட்புறத்தில் அப்ஹோல்ஸ்டரி உள்ளிட்ட சிறிய மாற்றங்கள் இருக்கும். இந்த செடானில் பெரிய டச்ஸ்கிரீன் இன்ஃபோடெயின்மென்ட் சிஸ்டம் மற்றும் ஆப்ஷனலாக 360 டிகிரி கேமரா வசதியும் கிடைக்கும் என எதிர்பார்க்கப்படுகிறது. ஹோண்டா சிட்டி ஃபேஸ்லிஃப்ட் மாடலில் 1.5 லிட்டர், 4-சிலிண்டர், நேச்சுரலி ஆஸ்பிரேட்டட் பெட்ரோல் இன்ஜின் தொடர்ந்து பயன்படுத்தப்படும். இது 6-ஸ்பீடு மேனுவல் அல்லது சிவிடி ஆட்டோமேட்டிக் கியர்பாக்ஸுடன் இணைக்கப்பட்டு, 121 hp பவரையும் 145 Nm டார்க்கையும் வழங்கும். இதனுடன், 126 hp பவரை வழங்கும் 1.5 லிட்டர் அட்கின்சன் சைக்கிள் இன்ஜின் கொண்ட சிட்டி இ:எச்இவி ஹைப்ரிட் மாடலும் விற்பனைக்குக் கிடைக்கும்.
ஹோண்டா ஆல்ஃபா இவி
ஹோண்டா தனது முதல் எலக்ட்ரிக் எஸ்யூவியான 'ஹோண்டா 0 ஆல்ஃபா இவி' காரை இந்தியாவில் அறிமுகப்படுத்தத் தயாராகி வருகிறது. இது 'மேட் இன் இந்தியா' தயாரிப்பாக இருக்கும், ஆனால் உலக சந்தைகளிலும் விற்கப்படும். தற்போது இந்த கார் இந்தியா முழுவதும் சோதனை செய்யப்பட்டு வருகிறது. 0 ஆல்ஃபா இவி எஸ்யூவி, ஒரு ஃபியூச்சரிஸ்டிக் ஸ்டைலிங், பாக்ஸி டிசைன், எல்இடி லைட்டிங் மற்றும் பெரிய அலாய் வீல்களைக் கொண்டிருக்கும்.
இந்த எலக்ட்ரிக் எஸ்யூவி 65 kWh மற்றும் 75 kWh என இரண்டு பேட்டரி பேக் ஆப்ஷன்களுடன் வரும் என எதிர்பார்க்கப்படுகிறது. நிஜமான சாலை நிலவரங்களில் இது 450 முதல் 500 கிலோமீட்டர் வரை ரேஞ்ச் வழங்கும். அடுத்த ஆண்டு இந்த கார் அறிமுகமாகும் என எதிர்பார்க்கப்படுகிறது. இதன் விலை ரூ.20 லட்சம் முதல் ரூ.25 லட்சம் வரை இருக்கலாம்.
ஹோண்டா எலிவேட் ஃபேஸ்லிஃப்ட்
வரும் 2026 ஜூன் மாதம், எலிவேட் ஃபேஸ்லிஃப்ட் மாடலை அறிமுகப்படுத்த ஹோண்டா திட்டமிட்டுள்ளது. இதில் சிறிய அளவிலான டிசைன் மற்றும் உட்புற மாற்றங்களுடன், பல புதிய அம்சங்களும் சேர்க்கப்படும். மேம்படுத்தப்பட்ட கேபின் மற்றும் டிசைன் மூலம், ஹூண்டாய் கிரெட்டா, கியா செல்டோஸ் மற்றும் டாடா சியரா போன்ற எஸ்யூவிகளுக்கு எதிராக எலிவேட் வலுவான போட்டியாளராக இருக்கும் என ஹோண்டா நம்புகிறது. இந்த எஸ்யூவியில் புதிய பம்பர்கள், புதிய அலாய் வீல்கள் மற்றும் சற்று மாற்றப்பட்ட முன்பக்க கிரில் ஆகியவை இடம்பெறும் என எதிர்பார்க்கப்படுகிறது. மேலும், புதிய அப்ஹோல்ஸ்டரி மற்றும் புதிய வசதிகளையும் ஹோண்டா வழங்கக்கூடும். ஹோண்டா எலிவேட் ஃபேஸ்லிஃப்ட் மாடலிலும், நம்பகமான 1.5 லிட்டர் பெட்ரோல் இன்ஜின் (6-ஸ்பீடு மேனுவல் அல்லது சிவிடி கியர்பாக்ஸுடன்) தொடர்ந்து இடம்பெறும். சில தகவல்களின்படி, இந்த எஸ்யூவியில் ஒரு வலுவான ஹைப்ரிட் இன்ஜினும் கொடுக்கப்படலாம். ஆனால், இது குறித்து ஹோண்டா இதுவரை எந்த அதிகாரப்பூர்வ தகவலையும் வெளியிடவில்லை.
