- Home
- Auto
- ஒரே சார்ஜில் 912 கி.மீ ரேஞ்ச்... 462 bhp பவருடன் களமிறங்கும் புதிய BMW i3 எலக்ட்ரிக் கார் அறிமுகம்!
ஒரே சார்ஜில் 912 கி.மீ ரேஞ்ச்... 462 bhp பவருடன் களமிறங்கும் புதிய BMW i3 எலக்ட்ரிக் கார் அறிமுகம்!
ஜெர்மன் சொகுசு கார் தயாரிப்பு நிறுவனமான பி.எம்.டபிள்.யூ (BMW), தனது புதிய 2027 BMW i3 Neue Klasse முழு-மின்சார செடான் காரை அதிகாரப்பூர்வமாக அறிமுகப்படுத்தியுள்ளது. 108.7 kWh பேட்டரி மற்றும் ஒரு முழு சார்ஜில் 912 கி.மீ வரை WLTP ரேஞ்ச் வழங்குகிறது.
462 bhp பவர், 912 கி.மீ ரேஞ்சுடன் களமிறங்கும் BMW இ-கார்!
ஜெர்மனியைச் சேர்ந்த முன்னணி சொகுசு கார் தயாரிப்பு நிறுவனமான பிஎம்டபிள்யூ (BMW), தனது புதிய 'i3 Neue Klasse' முழு-மின்சார சொகுசு காரை உலகளவில் அறிமுகப்படுத்தியுள்ளது. Neue Klasse கட்டமைப்புடன் (architecture) உருவாக்கப்பட்ட முதல் முழுமையான எலக்ட்ரிக் '3 சீரிஸ்' (3 Series) கார் இதுவாகும். 3 சீரிஸ் கார்களுக்கே உரித்தான ஓட்டுநர் அனுபவத்தை தக்கவைத்துக் கொண்டு, புதிய தோற்றம், நவீன உட்புற வடிவமைப்பு, மேம்பட்ட டிஜிட்டல் வசதிகள் மற்றும் புத்தம் புதிய எலக்ட்ரிக் பவர்டிரெய்னுடன் இது வெளிவந்துள்ளது.
புதிய பிஎம்டபிள்யூ 3 சீரிஸ் வரிசையானது பல்வேறு பவர்டிரெய்ன் தேர்வுகளை வழங்கும். ஆரம்ப வெளியீடாக 2 முழு எலக்ட்ரிக் i3 வேரியண்ட்களுடன், 48V மைல்ட்-ஹைப்ரிட் தொழில்நுட்பம் கொண்ட பெட்ரோல் இன்ஜின் மாடல்களும் இடம்பெறும். இதில் அதிக செயல்திறன் கொண்ட 'பிஎம்டபிள்யூ M350 xDrive' பெட்ரோல் இன்ஜின் வரிசையை வழிநடத்தும்; மேலும் பிளக்-இன் ஹைப்ரிட் (plug-in hybrid) வேரியண்ட் அடுத்த ஆண்டில் இணையவுள்ளது.
வெளிப்புற வடிவமைப்பு (Exterior Design)
புதிய பிஎம்டபிள்யூ 3 சீரிஸ், நிறுவனத்தின் Neue Klasse வடிவமைப்பு பாணியைப் பின்பற்றி, ஸ்போர்ட்டியான செடான் விகிதாச்சாரத்துடன் காட்சியளிக்கிறது. எலக்ட்ரிக் i3 மற்றும் பெட்ரோல் இன்ஜின் மாடல்கள் இரண்டும் ஒரே விதமான தோற்றத்தைக் கொண்டுள்ளன; பவர்டிரெய்னுக்கு ஏற்ப சில சிறிய வெளிப்புற மாற்றங்கள் மட்டுமே செய்யப்பட்டுள்ளன.
இந்த செடான் 2.5-பாக்ஸ் சில்ஹவுட் (silhouette), நீண்ட வீல்பேஸ் மற்றும் குறுகிய ஓவர்ஹேங் அமைப்புகளைக் கொண்டுள்ளது. இதன் கம்பீரமான வீல் ஆர்ச்சுகள் மற்றும் ஸ்போர்ட்டி பின்புறம் காருக்கு அக்ரஸிவ் தோற்றத்தைத் தருகின்றன. காரின் முன்பகுதியில், பிஎம்டபிள்யூவின் புகழ்பெற்ற 'கிட்னி கிரில்' (kidney grille) மற்றும் இரட்டை முகப்பு விளக்குகள் ஒருங்கிணைக்கப்பட்டு ஒற்றை யூனிட்டாக மாற்றியமைக்கப்பட்டுள்ளன.
எலக்ட்ரிக் i3 மாடலுக்கு 19 முதல் 21 அங்குல சக்கரங்களும், பெட்ரோல் இன்ஜின் மாடல்களுக்கு 18 முதல் 20 இன்ச் அலாய் வீல்களும் வழங்கப்படுகின்றன. வாடிக்கையாளர்கள் கூடுதல் ஸ்போர்ட்டி தோற்றத்திற்காக M Sport, M Sport Pro பேக்கேஜ்களையும் தேர்வு செய்யலாம். பிரத்யேகமான 'M Le Castellet Blue metallic' வண்ணத்துடன், கூடுதல் பிரத்யேக வண்ணத் தேர்வுகள் 2027-ல் அறிமுகமாகும்.
உட்புற வசதிகள் & கேபின் (Interior and Features)
கேபின் மினிமலிஸ்டிக் (minimalist) வடிவமைப்பைப் பின்பற்றி நவீனமாகவும், ஓட்டுநருக்கு உகந்த வகையிலும் உருவாக்கப்பட்டுள்ளது. டேஷ்போர்டின் மையப்பகுதியில் உள்ள ‘பிஎம்டபிள்யூ பானரோமிக் ஐடிரைவ்’ (BMW Panoramic iDrive) அமைப்பில் நான்கு முக்கிய அம்சங்கள் உள்ளன: பிஎம்டபிள்யூ பானரோமிக் விஷன், 3D ஹெட்-அப் டிஸ்ப்ளே, சென்ட்ரல் டச் ஸ்கிரீன் மற்றும் மல்டிஃபங்க்ஷன் ஸ்டீயரிங் வீல்.
டேஷ்போர்டில் 17.9 இன்ச் சென்ட்ரல் டிஸ்ப்ளே ஓட்டுநரை நோக்கிச் சாய்வாக அமைக்கப்பட்டு உள்ளது. 'பானரோமிக் விஷன்' தொழில்நுட்பம் ஓட்டுநரின் பார்வைப் புலம் முழுவதும் பயணத் தகவல்களைத் திரையிடுகிறது. புதிய ஸ்டீயரிங் வீல், டேஷ்போர்டுடன் இணைந்த டோர் பேனல்கள், கிளைமேட்-கம்ஃபர்ட் கிளாஸ் கொண்ட பெரிய பானரோமிக் சன்ரூஃப் ஆகியவை பிரீமியம் அனுபவத்தைத் தருகின்றன. மெமரி ஃபங்க்ஷன் கொண்ட எலக்ட்ரிக் இருக்கைகள், விருப்பத் தேர்வாக M Sport சீட்கள் மற்றும் ஹார்மன் கார்டன் (Harman Kardon) சவுண்ட் சிஸ்டம் ஆகியவையும் இடம்பெற்றுள்ளன.
பேட்டரி, ரேஞ்ச், செயல்திறன் (Battery, Range and Performance)
முழு எலக்ட்ரிக் மாடலான பிஎம்டபிள்யூ i3-ல் 6-ம் தலைமுறை (Gen 6) 'BMW eDrive' தொழில்நுட்பம் பயன்படுத்தப்பட்டுள்ளது. இதில், உருளை வடிவ செல்கள் கொண்ட புதிய ஹை-வோல்டேஜ் பேட்டரிகள், 800V எலக்ட்ரிக்கல் கட்டமைப்பு மற்றும் இருவழி சார்ஜிங் (bidirectional charging) வசதிகள் உள்ளன.
BMW i3 50 xDrive: இது 462 bhp பவரையும், 645 Nm டார்க் திறனையும் உருவாக்குகிறது. வெறும் 4.7 வினாடிகளில் மணிக்கு 0 முதல் 100 கி.மீ வேகத்தை எட்டிவிடும். இதில் 108.7 kWh பேட்டரி பொருத்தப்பட்டுள்ளதுடன், ஒரு முழு சார்ஜில் 912 கி.மீ வரை WLTP ரேஞ்ச் வழங்கும் எனத் தெரிவிக்கப்பட்டுள்ளது. மேலும், 400 kW டிசி ஃபாஸ்ட் சார்ஜிங் மூலம் 10 நிமிடங்களில் சுமார் 423 கி.மீ பயணிக்கத் தேவையான சார்ஜைப் பெற முடியும்.
BMW i3 40 xDrive: 368 bhp பவரை உருவாக்குகிறது. இதில் 82.8 kWh பேட்டரி பொருத்தப்பட்டு உள்ளதுடன், 710 கி.மீ வரை WLTP ரேஞ்ச் தரும். இதன் உச்சக்கட்ட செயல்திறன் கொண்ட 'i3 M60 xDrive M Performance' மாடலை 2027-ல் அறிமுகப்படுத்த பிஎம்டபிள்யூ திட்டமிட்டு உள்ளது.
பிஎம்டபிள்யூ M350 xDrive: 6-சிலிண்டர் பெட்ரோல் மாடல்
பெட்ரோல் இன்ஜின் வரிசையை 'பிஎம்டபிள்யூ M350 xDrive' மாடல் வழிநடத்துகிறது. இதில் 48V மைல்ட்-ஹைப்ரிட் வசதியுடன் கூடிய 3.0L 6-சிலிண்டர் பெட்ரோல் இன்ஜின் பயன்படுத்தப்பட்டு உள்ளது. இது 437 bhp பவரை வெளிப்படுத்துவதுடன், 4.1 வினாடிகளில் 0 முதல் 100 கி.மீ வேகத்தை எட்டும். இதன் அதிகபட்ச வேகம் மணிக்கு 250 கி.மீ ஆகக் கட்டுப்படுத்தப்பட்டுள்ளது. இவற்றுடன் மேலும் இரண்டு 4-சிலிண்டர் பெட்ரோல் வேரியண்ட்களும் அறிமுகமாகவுள்ளன.
டிரைவிங் டைனமிக்ஸ் , பாதுகாப்பு அம்சங்கள்
காரின் வேகக் கட்டுப்பாடு மற்றும் கையாளுதலை 'ஹார்ட் ஆஃப் ஜாய்' (Heart of Joy) உயர் செயல் திறன்கொண்ட கம்ப்யூட்டர் நிர்வகிக்கிறது. அடாப்டிவ் சஸ்பென்ஷன், அடாப்டிவ் M சஸ்பென்ஷன் ஆகியவை கிடைக்கின்றன. குறிப்பாக, M350 xDrive மாடலில் புதிய 'டிரிஃப்ட் மொமென்ட்' (Drift Moment) வசதி வழங்கப்பட்டுள்ளது; இது காரின் மொத்த ஆற்றலையும் பின் சக்கரங்களுக்கு மட்டும் செலுத்தி கட்டுப்படுத்தப்பட்ட டிரிஃப்டிங் செய்ய உதவுகிறது. மேலும், பாதுகாப்பான பயணத்திற்காக SAE லெவல்-2 ஓட்டுநர் உதவி அமைப்பு மற்றும் ஆக்டிவ் பாதுகாப்பு வசதிகள் (Active Safety) மேம்பட்ட டிரைவர் அசிஸ்டன்ஸ் சிஸ்டம்கள் (ADAS) இதில் இடம்பெற்றுள்ளன.
