ஒரே லிட்டரில் 75 கிமீ.. இந்த பைக்குகள் வாங்கினா பெட்ரோல் செலவே குறையும்!
இந்தியாவில் குறைந்த விலை, அதிக மைலேஜ், மற்றும் குறைந்த பராமரிப்பு செலவு கொண்ட பைக்குகள் நல்ல வரவேற்பை பெற்றுள்ளன. சில பைக்குகள் 65 முதல் 75 கி.மீ. வரை மைலேஜ் வழங்கி, அன்றாட பயணங்களுக்கு சிறந்த தேர்வாக விளங்குகின்றன.
அதிக மைலேஜ் பைக்குகள்
அன்றாட பயணங்களுக்கு ஏற்ற ஒரு பைக் தேடுகிறீர்களா? குறைந்த விலை, அதிக மைலேஜ், குறைந்த பராமரிப்பு செலவு என்ற மூன்றையும் ஒரே நேரத்தில் பூர்த்தி செய்யும் பைக்குகள் இந்திய சந்தையில் நல்ல வரவேற்பை பெற்று வருகின்றன. குறிப்பாக ரூ.60,000 முதல் ரூ.70,000 வரையிலான விலை வரம்பில் கிடைக்கும் சில பைக்குகள், ஒரு லிட்டர் பெட்ரோலுக்கு 65 முதல் 75 கிலோமீட்டர் வரை மைலேஜ் வழங்கி, நடுத்தர வர்க்க மக்களின் முதல் தேர்வாக மாறியுள்ளது. பெட்ரோல் விலை உயர்ந்து வரும் சூழலில், இந்த பைக்குகளுக்கான தேவை நாளுக்கு நாள் அதிகரித்து வருகிறது.
பெஸ்ட் மைலேஜ் பைக்
இந்த வகை மைலேஜ் பைக்குகள் நகர்ப்புறத்திலும், கிராமப்புறத்திலும் சம அளவில் பயன்படுத்த ஏற்றவை. தினசரி அலுவலகப் பயணம், சிறு வியாபாரம், விவசாயத் தேவைகள் என அனைத்திற்கும் இவை பொருத்தமாக உள்ளன. சில மாடல்கள் முழு டேங்கில் 700 முதல் 800 கிலோமீட்டர் வரை பயணம் செய்யும் திறன் கொண்டவை என்பது குறிப்பிடத்தக்கது. இதனால் பெட்ரோல் நிரப்ப வேண்டிய அவசியம் அடிக்கடி குறைகிறது.
டெய்லி கம்யூட் பைக்
இந்த பட்டியலில் முக்கிய இடம் பெறுவது ஹீரோ எச்எப் டீலக்ஸ். 97.2cc என்ஜினுடன் வரும் இந்த பைக், சராசரியாக 65 கி.மீ./லிட்டர் மைலேஜ் வழங்குகிறது. வலுவான கட்டமைப்பு, எளிய பராமரிப்பு ஆகிய காரணங்களால் நகரம் மட்டுமல்ல, கிராமப்புறங்களிலும் இந்த பைக் அதிகம் பயன்படுத்தப்படுகிறது. நீண்ட கால பயன்பாட்டுக்கும் இது நம்பகமான தேர்வாக கருதப்படுகிறது.
பெட்ரோல் சேமிப்பு பைக்
மேலும் டிவிஎஸ் ஸ்போர்ட் என்ற பைக்கும் இளைஞர்களிடையே நல்ல வரவேற்பை பெற்றுள்ளது. இலகுவான எடை கொண்ட இந்த பைக், நெரிசல் மிகுந்த நகர சாலைகளில் எளிதாக ஓட்ட முடியும். ஒரு லிட்டர் பெட்ரோலுக்கு சுமார் 70 கிலோமீட்டர் மைலேஜ் வழங்கும் இது, முழு டேங்கில் சுமார் 800 கிலோமீட்டர் வரை செல்லும் திறன் கொண்டது. நீண்ட பயணங்களை விரும்புபவர்களுக்கு இது ஒரு சிறந்த தேர்வாக உள்ளது.
குறைந்த விலை பைக்குகள்
பல ஆண்டுகளாக இந்தியாவின் நம்பர் ஒன் பைக்காக விளங்கும் ஹீரோ ஸ்பிளெண்டர் பிளஸ், மைலேஜ் மற்றும் குறைந்த பராமரிப்பு செலவுக்காக பெயர் பெற்றது. சுமார் 70 கி.மீ./லிட்டர் மைலேஜ் வழங்கும் இந்த பைக்கில் உள்ள i3S தொழில்நுட்பம், தேவையில்லாத நேரங்களில் என்ஜினை தானாக நிறுத்தி எரிபொருள் சேமிக்க உதவுகிறது. இதே வரிசையில் ஹோண்டா ஷைன் 100 மற்றும் பஜாஜ் பிளாட்டினா 100 ஆகிய பைக்குகளும் குறிப்பிடத்தக்கவை. ஹோண்டா ஷைன் 100 சீரான ஓட்டத்திற்கும், பிளாட்டினா 100 75 கி.மீ./லிட்டர் வரை மைலேஜ் வழங்குவதற்கும் பிரபலமாக உள்ளன. குறைந்த செலவில் அதிக பயன் தேடும் மக்களுக்கு, இந்த மைலேஜ் பைக்குகள் சந்தேகமில்லாமல் சரியான தேர்வாகும்.
