வண்டி அதிகமா பெட்ரோல் குடிக்குதா? மைலேஜை அதிகப்படுத்த அட்டகாசமான டிப்ஸ்

பெட்ரோல் விலை உயர்ந்து கொண்டே இருக்கும் நிலையில், வாகனங்களின் மைலேஜும் குறைந்து வருகிறது. 'என் பைக், கார் பெட்ரோலை குடிக்கிறது.. எவ்வளவு போட்டாலும் சரியாக இல்லை' என்று ஒவ்வொரு வாகன ஓட்டியும் புலம்பும் நிலை உள்ளது.   மைலேஜை பராமரிக்க வாகனத்திலேயே சிறப்பு ஏற்பாடு இருப்பது எத்தனை பேருக்கு தெரியும்? நிறுவனங்கள் வாடிக்கையாளர்களுக்கு ஒரு கையேட்டை வழங்குகின்றன. அதில் வாகனத்தின் முழு விவரங்களுடன் மைலேஜ்  எப்படி பராமரிக்க வேண்டும் என்ற தகவலும் இருக்கும். அந்த ஆலோசனைகள் இங்கே..

1. டயர்களில் சரியான காற்று..
வாகனத்தின் டயர்களில் சரியான காற்று அழுத்தம் இருப்பது மிகவும் முக்கியம். டயர்கள் குறைந்த காற்று அழுத்தத்துடன் இருந்தால் அதிக எரிபொருளை செலவிடுகிறது. இதனால் மைலேஜ் குறைகிறது.

2. பிரேக், செயின் இறுக்கமாக இருக்கக்கூடாது..
ப்ரேக் இறுக்கமாக இருந்தாலோ அல்லது செயின் இறுக்கமாக இருந்தாலோ மைலேஜ் குறையும். சிலர் பிரேக் லூசாக இருக்கிறது என்று அவர்களே போல்ட்டை இறுக்குவார்கள். அப்படி செய்வது தவறு என்று மெக்கானிக்குகள் எச்சரிக்கின்றனர்.

3. தேவையான போது மட்டும் ஏசி பயன்படுத்தவும்..
பொதுவாக காரில் ஏசி போட்டால் எரிபொருள் அதிகம் செலவாகும். அதனால் தேவையான போது மட்டும் ஏசியை பயன்படுத்தவும்.

4. கார்பரேட்டர், ப்ளக் சரிபார்க்கவும்..
நல்ல தரமான எரிபொருளை பயன்படுத்துவதால் மைலேஜ் அதிகரிக்கும். அதுமட்டுமின்றி கார்பரேட்டர் மற்றும் இன்ஜின் ப்ளக்கை சுத்தம் செய்ய வேண்டும். அப்போதுதான் அதிக பெட்ரோலை மிச்சப்படுத்த முடியும்.

5. மெதுவாக ஓட்டுதல்..
 தேவையில்லாமல் தடாலடியாக பிரேக் போடுவது, குறிப்பிட்ட வேகத்தில் இயக்காமல் ஒரு முறை வேகமாகவும் ஒரு முறை மெதுவாகவும் இயக்குவது மைலேஜை பாதிக்கும். சீரான வேகத்தில் வாகனத்தை ஓட்டுவதால் எரிபொருள் மிச்சமாகும்.

6. குறைந்த வேகம் நல்லது..
 அதிக வேகத்தில் செல்வதால் பெட்ரோல், டீசல் அதிகம் செலவாகும். குறைந்த வேகம் அதாவது 50-60 கி.மீ./மணி வேகத்தில் பயணிப்பதால் மைலேஜ் அதிகரிக்கும். இந்த விஷயத்தை நிறுவனங்கள் வாகனங்களின் ஸ்பீடோ மீட்டரில் பச்சை, மஞ்சள், சிவப்பு ஸ்டிக்கர்கள் மூலம் தெரிவிக்கின்றன. பலரும் இவற்றை கவனிப்பதில்லை.

7. இன்ஜினை ஆஃப் செய்யவும்..
சிக்னல்கள், பெட்ரோல் நிரப்பும் இடம் என எங்காவது சிறிது நேரம் நிறுத்த வேண்டியிருந்தால் இன்ஜினை ஆஃப் செய்வதன் மூலம் எரிபொருள் பயன்பாட்டைக் குறைக்கலாம். வாகனத்தில் தேவையற்ற பொருட்களை அகற்றவும். வாகனத்தின் எடை குறைந்தால் மைலேஜ் மேம்படும்.

8. கிளட்ச், கியரை சரியாகப் பயன்படுத்தவும்..
கிளட்ச்சை கியர் மாற்றும் போது, பிரேக் போடும் போது என தேவையான போது மட்டும் பயன்படுத்த வேண்டும். கிளட்ச் பிடித்தபடி ஆக்சிலேட்டரை இயக்குவதால் பெட்ரோல் விரயம் அதிகரிக்கும். சரியான கியர்களில் இயக்குவதாலும் எரிபொருள் மிச்சமாகும்.

9. மூன்று பேர் சவாரி வேண்டாம்..
இருசக்கர வாகனத்தில் அதிகபட்சம் இரண்டு பேர் மட்டுமே அமர வேண்டும். ஆனால் இப்போது சிலர் பைக்கில் மூன்று, நான்கு பேர் அமர்ந்து செல்கிறார்கள். இதுவும் மைலேஜ் குறைய ஒரு காரணம்.

10. பெட்ரோல் ஆவியாக விடாதீர்கள்..
முன்பு கார்கள், பைக்குகள் முழுமையாக இரும்பினால் தயாரிக்கப்பட்டன. இப்போது ஃபைபரில் இருந்து தயாரிக்கிறார்கள். இதனால் வெயிலில் நிறுத்தும் போது டேங்கில் உள்ள எரிபொருள் ஆவியாகும் வாய்ப்பு உள்ளது. எனவே டேங்கிற்கு பாதுகாப்பாக ஏதாவது துணி, கவர் போன்றவற்றால் மூடுவது நல்லது. பைக்கை குறைந்தபட்சம் ஆறு மாதங்களுக்கு ஒருமுறையாவது சர்வீஸ் செய்ய வேண்டும். எண்ணெய், வடிகட்டிகள், ஸ்பார்க் ப்ளக்குகள் மற்றும் பிற பாகங்களை சுத்தம் செய்வது கட்டாயம்.