நாடு முழுவதும் சுமார் 20 லட்சம் மாணவர்கள் எழுதிய நீட் தேர்வு முடிவுகளை தேசிய தேர்வு முகமை வெளியிட்டுள்ளது. மாணவர்கள் தங்களது தேர்வு முடிவுகளை தேர்வு முகமையின் இணையதளத்தில் பதிவிறக்கம் செய்து கொள்ளலாம்.
சென்னை: நாடு முழுவதும் உள்ள மருத்துவக் கல்லூரிகளில் எம்பிபிஎஸ், பிடிஎஸ் உள்ளிட்ட இளநிலை மருத்துவப் படிப்புகளில் சேர்வதற்காக நடத்தப்பட்ட நீட் தேர்வு முடிவுகளை தேசிய தேர்வு முகமை (NTA) தற்போது அதிகாரப்பூர்வமாக வெளியிட்டுள்ளது. இத்தேர்வை சுமார் 20 லட்சம் மாணவர்கள் எழுதியிருந்தனர்.
இத்தேர்வுக்கான தற்காலிக விடைக்குறிப்பை தேசிய தேர்வு முகமை கடந்த ஜூன் 3 ஆம் தேதி வெளியிட்டது. மாணவர்கள் இந்த விடைக்குறிப்பு மீது தங்களது ஆட்சேபனைகளைத் தெரிவிப்பதற்கான கால அவகாசம் ஜூன் 5 ஆம் தேதியுடன் முடிவடைந்தது.
மாணவர்களிடமிருந்து பெறப்பட்ட ஆட்சேபனைகளைப் பரிசீலித்த பின்னரே இறுதி விடைக்குறிப்பு தயாரிக்கப்பட்டு, அதன் அடிப்படையில் தற்போது தேர்வு முடிவுகளும், தகுதிப் பட்டியலும் வெளியிடப்பட்டுள்ளன.
Related Articles
ஆன்லைனில் நீட் தேர்வு முடிவுகளைப் பார்ப்பது எப்படி?
மாணவர்கள் தங்களது தேர்வு முடிவுகளைக் கீழ்க்கண்ட வழிமுறைகளைப் பின்பற்றி அறிந்துகொள்ளலாம்:
முதலில், தேசிய தேர்வு முகமையின் அதிகாரப்பூர்வ இணையதளமான https://neet.nta.nic.in/ என்ற முகவரிக்குச் செல்லவும்.
அங்கு "NEET UG 2025 Result" என்ற இணைப்பைக் கிளிக் செய்யவும்.
பின்னர் தோன்றும் பக்கத்தில், உங்கள் விண்ணப்ப எண் (Application Number) மற்றும் கடவுச்சொல்லை (Password) உள்ளீடு செய்து சமர்ப்பிக்கவும்.
இப்போது உங்கள் தேர்வு முடிவுகள் PDF வடிவில் திரையில் தோன்றும். அதை நீங்கள் பதிவிறக்கம் செய்து கொள்ளலாம்.
அடுத்தகட்ட கலந்தாய்வு:
தேர்வு முடிவுகள் வெளியாகியுள்ள நிலையில், அகில இந்திய ஒதுக்கீட்டுக்கான 15 சதவிகித இடங்களுக்கு (எய்ம்ஸ், ஜிப்மர், நிகர்நிலைப் பல்கலைக்கழகங்கள் உட்பட) மருத்துவ கலந்தாய்வுக் குழு கலந்தாய்வை நடத்தும். மீதமுள்ள 85 சதவிகித இடங்களுக்கு அந்தந்த மாநில அரசுகள் கலந்தாய்வை நடத்தும் என்று தகவல்கள் தெரிவிக்கின்றன.
