ராமதாஸ் கூட்டணியில் விசிக இருக்காது.. திருமாவளவன் திட்டவட்டம்.. திமுகவுக்கு தலைவலி!

பாமகவில் அன்புமணி பக்கமே அனைவரும் உள்ளனர். ராமதாஸுக்கு செல்வாக்கு குறைவு என்றாலும் அவரையும் கூட்டணியில் சேர்த்துக் கொண்டால் பிரச்சனை ஏதும் இருக்காது. ராமதாஸுக்கு அனுதாப ஓட்டுகள் வந்தாலும் நமக்கு லாபம் தானே என திமுக கருதுகிறது.

தேசிய ஜனநாயக கூட்டணிக்கு ராமதாஸ் எதிர்ப்பு

அதிமுக - பாஜக அங்கம் வக்கிக்கும் தேசிய ஜனநாயகக் கூட்டணியில் பாமக இணைவதாக அக்கட்சியின் தலைவர் அன்புமணி அறிவித்த உடனே அதற்கு கடும் எதிர்ப்பு தெரிவித்து இருந்தார் ராமதாஸ். கட்சியின் அங்கீகாரம் மற்றும் சின்னம் தொடர்பான விவகாரங்களில் தமக்கே இறுதி அதிகாரம் இருப்பதாக கூறிய அவர் கூட்டணி குறித்து நானே முடிவெடுப்பேன் என தெரிவித்து இருந்தார்.

விசிக பெரும் முட்டுக்கட்டை

அன்புமணியின் தேசிய ஜனநாயக கூட்டணியை கடுமையாக விமர்சித்த ராமதாஸ், முதல்வர் ஸ்டாலினின் செயல்பாடுகளைப் பாராட்டிப் பேசினார். இதனால் அவர் திமுக கூட்டணிக்குச் செல்லத் திட்டமிடுகிறாரோ என்ற கேள்வியை எழுப்பியது.

 பாமகவின் நீண்டகால அரசியல் எதிரியான திருமாவளவனின் விசிகவைக்கூட ஏற்றுக்கொள்ளத் தயார் என்று ராமதாஸ் தரப்பு கூறியிருந்தது. ஆனால் திமுக கூட்டணியில் ராமதாஸ் சேர்வதற்கு விசிக பெரும் முட்டுக்கட்டையாக உள்ளது.

பாமக இருக்கும் கூட்டணியில் இருக்க மாட்டோம்

பாமக இருக்கும் கூட்டணியில் எந்த காலத்திலும் இருக்க மாட்டோம் என விசிக தலைவர் திருமாவளவன் கூறியிருந்தார். இந்த நிலையில், இதே கருத்தை இன்றும் உறுதிப்படுத்திய திருமாவளவன், ''பாமக, பாஜக அங்கம் கூட்டணியில் விசிக இருக்காது என்ற நிலைப்பாட்டை ஏற்கெனவே அறிவித்து விட்டோம். இதில் எந்த மாற்றமும் இல்லை'' என்று கூறியுள்ளார்.

திமுகவுக்கும் ஆர்வம் இல்லை

இதனால் ராமதாஸை ஏற்றுக்கொள்ள திருமாவளவன் தயாராகவில்லை என்பது முடிவாகி விட்டது. திருமாவளவனின் முடிவு திமுகவுக்கு பெரும் தலைவலியை ஏற்படுத்தியுள்ளது. திமுக தலைமையைப் பொறுத்தவரை, பல ஆண்டுகளாகத் தங்களோடு பயணிக்கும் நம்பகமான கூட்டாளியான விசிகவைப் பகைத்துக்கொண்டு, உட்கட்சிப் பூசலில் சிக்கியுள்ள ராமதாஸைச் சேர்த்துக்கொள்ளப் பெரிதாக ஆர்வம் காட்டவில்லை என தகவல்கள் கூறின.

அனுதாப ஓட்டுகள் கிடைத்தால் லாபம்தானே

பாமகவில் அன்புமணி பக்கமே அனைவரும் உள்ளனர். ராமதாஸுக்கு செல்வாக்கு குறைவு என்றாலும் அவரையும் கூட்டணியில் சேர்த்துக் கொண்டால் பிரச்சனை ஏதும் இருக்காது. ராமதாஸுக்கு அனுதாப ஓட்டுகள் வந்தாலும் நமக்கு லாபம் தானே என திமுக கருதுகிறது. 

ஆனால் ''ராமதாஸ் இருக்கும் பக்கம் தலைவத்து படுக்க மாட்டேன். நானா? ராமதாஸா? நீங்களே முடிவு செய்து கொள்ளுங்கள்'' என திருமாவளவன் திமுகவிடம் அழுத்தம் திருத்தமாக சொல்லியிருப்பது அறிவாலய தலைமைக்கு தலைவலியை ஏற்படுத்தியுள்ளது.