Sai Sudharsan: இது என்ன கொடுமை! மீண்டும் 'ஹிட் விக்கெட்'! மோசமான சாதனை படைத்த சாய் சுதர்சன்!

Sai Sudharsan: ஐபிஎல் 2026 குவாலிஃபையர் 2 போட்டியில் ராஜஸ்தானுக்கு எதிரான ஆட்டத்தில் குஜராத் டைட்டன்ஸ் வீரர் சாய் சுதர்சன் மீண்டும் ஹிட் விக்கெட் முறையில் ஆட்டமிழந்து மோசமான சாதனை படைத்துள்ளார். 

சாய் சுதர்சன் மீண்டும் ஹிட் விக்கெட்

ஐபிஎல் 2026 தொடரில் குவாலிஃபையர் 2 போட்டியில் குஜராத் டைட்டன்ஸ், ராஜஸ்தான் ராயல்ஸ் அணிகள் விளையாடி வரும் நிலையில், குஜராத் டைட்டன்ஸ் வீரர் சாய் சுதர்சன் இந்த போட்டியிலும் ஹிட் விக்கெட் முறையில் ஆட்டமிழந்துள்ளார். அதாவது ராஜஸ்தான் பவுலர் பிரிஜேஷ் சர்மா வீசிய பந்தை சாய் சுதர்சன் பவுண்டரிக்கு விரட்ட முயன்றார். பந்து பவுண்டரி கோட்டை நோக்கிச் சென்ற அதே வினாடியில், அவரது கையில் இருந்து நழுவி எதிர்பாராதவிதமாக ஸ்டம்பில் பட்டு பெய்ல்ஸ் கீழே விழுந்தது.

விசித்தரமான மோசமான சாதனை

சாய் சுதர்சன் வெறும் 32 பந்துகளில் 8 பவுண்டரிகள், 1 சிக்சருடன் 58 ரன்கள் குவித்து மிரட்டலாக விளையாடிக் கொண்டிருந்த நிலையில் அவர் துரதிருஷ்டவசமாக அவுட்டாகியுள்ளார். ஏற்கெனவே ஆர்சிபிக்கு எதிரான குவாலிஃபையர் 1 போட்டியிலும் சாய் சுதர்சன் இதேபோல் ஹிட் விக்கெட் முறையில் ஆட்டமிழந்தார். இதன்மூலம் அடுத்தடுத்த போட்டிகளில் ஹிட் விக்கெட் ஆன முதல் வீரர் என்ற விசித்தரமான மோசமான சாதனையை சாய் சுதர்சன் பெற்றுள்ளார்.

ரசிகர்கள் அதிர்ச்சி

ஆர்சிபிக்கு எதிரான போட்டியில் 9 பந்துகளில் 14 ரன்கள் எடுத்திருந்த நிலையில், சாய் சுதர்சன் இப்படி ஒரு விசித்திரமான முறையில் விக்கெட்டை பறிகொடுத்தது ஒட்டுமொத்த மைதானத்தையும் அதிர்ச்சியில் ஆழ்த்தியது. கிரிக்கெட் ரசிகர்கள் சிலர் சாய் சுதர்சன் அவுட் இல்லை. நடுவர் தவறாக அவுட் கொடுத்து விட்டதாக தெரிவித்தனர். சாய் சுதர்சன் அவுட்டா? இல்லையா? என சமூக வலைத்தளங்களில் பெரிய விவாதமே நடந்தது.

கிரிக்கெட் விதி என்ன?

ஆனால் கிரிக்கெட் விதி 35-ன் படி பார்த்தால் சாய் சுதர்சன் அவுட் தான். அதாவது ஒரு பேட்ஸ்மேன் பந்தை அடிக்கும் முயற்சியில் இருக்கும் போதோ அல்லது ரன் ஓடத் தொடங்கும் போதோ, அவரது உடலோ, ஆடையோ அல்லது கையில் இருக்கும் பேட்டோ ஸ்டம்பைத் தாக்கினால் அது 'ஹிட் விக்கெட்' ஆகும். அதன்படி, சாய் சுதர்சன் அடித்த பந்து பவுண்டரி லைனைத் தொட்டாலும், அவர் அவுட் என்றே நடுவர்களால் அறிவிக்கப்பட்டார் என்பது குறிப்பிடத்தக்கது.