IND vs NAM: இஷான் கிஷன் ருத்ரதாண்டவம்.. டி20 உலகக்கோப்பையில் புதிய வரலாற்று சாதனை!

IND vs NAM: நமீயாவுக்கு எதிரான போட்டியில் இந்திய அணி வீரர் இஷான் கிஷன் 20 பந்துகளில் அதிரடி அரை சதம் அடித்து அசத்தினார். டி20 உலககோப்பையில் அவர் புதிய வரலாற்று சாதனை படைத்துள்ளார்.

இஷான் கிஷன் வரலாற்று சாதனை

டி20 உலககோப்பையில் அருண் ஜெட்லி மைதானத்தில் நடைபெற்ற நமீபியாவுக்கு எதிரான போட்டியில் முதலில் பேட்டிங் செய்த இந்திய அணி 20 ஓவர்களில் 9 விக்கெட் இழப்பிற்கு 209 ரன்கள் குவித்தது. 

இந்த போட்டியில் வெறும் 20 பந்துகளில் அரைசதம் விளாசிய இஷான் கிஷன் டி20 உலகக்கோப்பையில் புதிய வரலாற்று சாதனை படைத்துள்ளார். அதாவது டி20 உலகக்கோப்பையில் அரை சதம் அடித்த முதல் இந்தியர் என்ற சாதனையை இஷான் கிஷன் படைத்துள்ளார்.

இதற்கு முன்பு எந்த இந்திய விக்கெட் கீப்பரும் டி20 உலகக்கோப்பையில் அரை சதம் அடித்ததில்லை.இந்திய அணி, முதல் ஓவரில் 8/0 ரன்கள் எடுத்து நல்ல தொடக்கத்தை பெற்றது. அடுத்த ஓவரில், சஞ்சு சாம்சன் இரண்டு சிக்ஸர்கள் மற்றும் ஒரு பவுண்டரி அடித்த நிலையில், 8 பந்துகளில் 22 ரன்கள் எடுத்த அவரை பென் ஷிகோங்கோ ஆட்டமிழக்கச் செய்தார்.

இஷான் கிஷன் அதிரடி

பவர்பிளேயின் கடைசி ஓவரில், ஜேஜே ஸ்மித்தின் பந்துவீச்சில் இஷான் கிஷன் தொடர்ச்சியாக நான்கு சிக்ஸர்கள் மற்றும் ஒரு பவுண்டரி அடித்து, வெறும் 20 பந்துகளில் தனது அரைசதத்தை நிறைவு செய்தார்.

கிஷனின் அதிரடி பேட்டிங்கால், ஆறாவது ஓவர் முடிவில் இந்தியா 86/1 ரன்கள் எடுத்தது. இது டி20 போட்டிகளில் பவர்பிளேயில் அவர்களின் மூன்றாவது அதிகபட்ச ஸ்கோராகும்.

சூர்யகுமார் ஏமாற்றம்

ஆபத்தான வீரர் கிஷனை, கேப்டன் ஜெர்ஹார்ட் எராஸ்மஸ் 24 பந்துகளில் 61 ரன்கள் எடுத்த நிலையில் ஆட்டமிழக்கச் செய்தார். இதில் ஆறு பவுண்டரிகள் மற்றும் ஐந்து சிக்ஸர்கள் அடங்கும். 10வது ஓவர் முடிவில், இந்திய அணி 120/2 என்ற வலுவான நிலையில் இருந்தது. 11வது ஓவரின் முதல் பந்தில், கேப்டன் சூர்யகுமார் யாதவை வெறும் 12 ரன்களில் சுழற்பந்து வீச்சாளர் பெர்னார்ட் ஸ்கோல்ட்ஸ் ஆட்டமிழக்கச் செய்தார்.

ஹர்திக் பாண்ட்யா அதிரடி

12வது ஓவரின் ஐந்தாவது பந்தில் திலக் வர்மா 25 ரன்களில் நமீபிய கேப்டன் எராஸ்மஸால் ஆட்டமிழக்க, இந்தியா அடுத்தடுத்து விக்கெட்டுகளை இழந்தது. பின்பு ஷிவம் துபே மற்றும் ஹர்திக் பாண்ட்யா இணைந்து பெர்னார்ட் ஸ்கோல்ட்ஸின் ஓவரில் 24 ரன்கள் விளாச, இந்தியா 168/4 என ரன் குவித்தது.

18வது ஓவர் முடிவில், பாண்ட்யா மற்றும் துபே களத்தில் இருக்க, இந்தியா 199/4 ரன்களை எட்டியது. 19வது ஓவரின் முதல் பந்தில், ஹர்திக் பாண்ட்யா 27 பந்துகளில் தனது அரைசதத்தை நிறைவு செய்ய, இந்தியா 200 ரன்களைக் கடந்தது.

நமீபியா கேப்டன் சூப்பர் பவுலிங்

இருப்பினும், அடுத்த பந்திலேயே, டைலன் லீச்சர் பவுண்டரி கோட்டில் ஒரு அற்புதமான கேட்சை பிடித்து, 28 பந்துகளில் 52 ரன்கள் எடுத்த பாண்ட்யாவை ஆட்டமிழக்கச் செய்தார். ரிங்கு சிங்குடன் ஏற்பட்ட குழப்பத்தில் சிவம் துபே 23 ரன்களில் ரன் அவுட் ஆனார். 

அக்சர் படேலை கோல்டன் டக்கில் வெளியேற்றிய எராஸ்மஸ் தனது நான்காவது விக்கெட்டை கைப்பற்றினார். 20வது ஓவரில் ரிங்கு சிங் (1) மற்றும் அர்ஷ்தீப் சிங் (2) ஆகியோரை இழக்க, இந்திய அணி 209/9 ரன்கள் எடுத்தது. நமீபியா சார்பில், கேப்டன் ஜெர்ஹார்ட் எராஸ்மஸ் (4/20) நான்கு விக்கெட்டுகளை வீழ்த்தி சிறப்பான பவுலிங்கை பதிவு செய்தார்.