IND vs PAK: பேசாம நீங்க ஊர்லயே இருந்திருக்கலாம்.. பாகிஸ்தானை துவம்சம் செய்த இந்தியா.. சூப்பர் 8 சுற்றுக்கு தகுதி!

டி20 உலகக்கோப்பையில் இந்திய அணி பாகிஸ்தானை பந்தாடி பிரம்மாண்ட வெற்றி பெற்றுள்ளது. இந்தியாவுடன் விளையாட மாட்டோம் என பூச்சாண்டி காட்டிய பாகிஸ்தான் படுதோல்வியை சந்தித்துள்ளது.

பாகிஸ்தானை துவம்சம் செய்த இந்திய அணி

டி20 உலகக்கோப்பையில் பாகிஸ்தானுக்கு எதிரான போட்டியில் இந்திய அணி 61 ரன்கள் வித்தியாசத்தில் அபார வெற்றி பெற்றுள்ளது. மேலும் டி20 உலக்கோப்பையின் சூப்பர் 8 சுற்றுக்கும் தகுதி பெற்றுள்ளது. இந்த போட்டியில் முதலில் பேட்டிங் செய்த இந்திய அணி 7 விக்கெட் இழப்பிற்கு 175 ரன்கள் எடுத்தது. 

பின்பு விளையாடிய பாகிஸ்தான் அணி 18 ஓவரில் 114 ரன்களுக்கு ஆல் அவுட்டாகி படுதோல்வி அடைந்துள்ளது. இந்திய அணியில் இஷான் கிஷன் 40 பந்துகளில் 10 பவுண்டரி, 3 சிக்சர்களுடன் 77 ரன்கள் அடித்து மேட்ச் வின்னராக ஜொலித்தார்.

இந்திய அணியை காப்பாற்றிய இஷான் கிஷன்

இந்திய அணி தொடக்கத்திலேயே அபிஷேக் சர்மாவை (0) இழந்தாலும், மற்ற வீரர்கள் தடுமாறினாலும் இஷான் கிஷன் தனி ஆளாக போராடி 40 பந்துகளில் 10 பவுண்டரி, 3 சிக்சர்களுடன் 77 ரன்கள் அடித்து மாஸ் காட்டினார். திலக் வர்மா 25 ரன்களும், சூர்யகுமார் யாதவ் 32 ரன்களும் எடுத்தனர். கடைசி கட்டத்தில் ஷிவம் துபே 17 பந்தில் 27 ரன்களும், ரிங்கு சிங் 6 பந்தில் 11 ரன்களும் எடுத்தனர்.

பாகிஸ்தானின் படுமோசமான பேட்டிங்

பின்பு சவாலான இலக்கை நோக்கி களமிறங்கிய பாகிஸ்தான் அணி கொத்து கொத்தாக விக்கெட்டுகளை இழந்தது. ஹர்திக் பாண்ட்யா வீசிய முதல் ஓவரிலேயே சாஹிப்சாதா ஃபர்ஹான் டக் அவுட் ஆனார். அடுத்து பும்ரா தனது ஒரே ஓவரில் சயூம் அயூப் (6), பாகிஸ்தான் கேப்ட சல்மான் அலி ஆகாவை (4) காலி செய்தார். தொடர்ந்து பாபர் அசாமும் (5) அக்சர் படேல் பந்தில் வெளியேறினார். பாகிஸ்தான் 34/4 என பரிதவித்தது.

பாகிஸ்தான் படுதோல்வி

இந்த சரிவில் இருந்து பாகிஸ்தான் அணியால் மீளவே முடியவில்லை. நமது வீரர்களின் பாஸ்ட் பவுலிங் மற்றும் ஸ்பின் பவுலிங் என எதையும் பாகிஸ்தான் பேட்ஸ்மேன்களால் சமாளிக்க முடியவில்லை. அந்த அணியின் விக்கெட் கீப்பர் உஸ்மான் கான் மட்டும் போராடி 44 ரன்கள் அடித்தார். மற்ற யாரும் சோபிக்கவில்லை. இதில் 3 பேர் டக் அவுட் ஆனதும் அடங்கும். முடிவில் பாகிஸ்தான் அணி 18 ஓவரில் 114 ரன்களுக்கு ஆல் அவுட் ஆனது.

பேசமா ஊர்லயே இருந்திருக்கலாமோ..

இந்திய அணி தரப்பில் பும்ரா, ஹர்திக் பாண்ட்யா, அக்சர் படேல், வருண் சக்கரவர்த்தி தலா 2 விக்கெட்டுகளையும், குல்தீப் யாதவ், திலக் வர்மா தலா 1 விக்கெட்டும் வீழ்த்தினார்கள். 50 ஓவர் மற்றும் டி20 உலகக்கோப்பைகளில் பாகிஸ்தானுக்கு எதிரான இந்திய அணியின் ஆதிக்கம் தொடர்கிறது. 

இந்த போட்டியில் இந்தியாவுடன் விளையாட மாட்டோம் என பாகிஸ்தான் பூச்சாண்டி காட்டி வந்தது. பின்னர் ஐசிசியின் மிரட்டலுக்கு பணிந்து விளையாடியது. இப்படி படுமோசமாக தோற்றத்துக்கு நீங்க ஊர்லயே இருந்திருக்கலாம் என இந்திய ரசிகர்கள் பாகிஸ்தான் அணியை கிண்டலடித்து வருகின்றனர்.