சமீபகாலமாக வெறும் வயிற்றில் 'நெய் ஷாட்' குடிக்கும் பழக்கம் வைரலாகி வருகிறது. இது ஆயுர்வேதத்தின் 'சிநேஹபானா' முறையா? மருத்துவர் ஆலோசனையின்றி தினமும் அதிகளவு நெய் குடிப்பது உடலுக்கு ஆபத்தா? நிபுணர்கள் தரும் எச்சரிக்கை மற்றும் தகவல்கள் இதோ!
சமீபகாலமாக சோஷியல் மீடியாவில் இன்ஃப்ளூயன்ஸர்கள் மற்றும் பிரபலங்கள் காலையில் வெறும் வயிற்றில் பெருமளவு நெய் (100 மி.லி முதல் 150 மி.லி வரை) குடிப்பது போன்ற வீடியோக்கள் ட்ரெண்டாகி வருகின்றன. இது குடலைச் சுத்தப்படுத்தி, செரிமானத்தை அதிகரித்து, உடலை டிடாக்ஸ் செய்ய உதவும் என்ற கூற்றுடன் பரப்பப்பட்டு வருகிறது.
26
ஆயுர்வேதத்தில் சிநேஹபானா :
இந்த முறை புதிய விஷயம் அல்ல; ஆயுர்வேத மருத்துவத்தில் பஞ்சகர்மா (Panchakarma) சிகிச்சைக்கு முன் செய்யப்படும் 'சிநேஹபானா' எனும் தயாரிப்பு நிலையாகும். இதில் மூலிகைகள் கலந்த நெய், நோயாளியின் உடல்நிலைக்கு ஏற்பக் குறிப்பிட்ட அளவுகளில், ஆயுர்வேத மருத்துவரின் நேரடி மேற்பார்வையில் மட்டுமே கொடுக்கப்படும்.
36
வெறும் வயிற்றில் நெய் குடிப்பது பாதுகாப்பானதா?
மருத்துவர்களின் கூற்றுப்படி, சோஷியல் மீடியாவைப் பார்த்துவிட்டுத் தானாகவே அதிகளவு நெய் குடிப்பது பாதுகாப்பானது அல்ல. ஒருவரின் செரிமான திறன், உடல் தத்துவம் மற்றும் வயது ஆகியவற்றைப் பொறுத்தே நெய்யின் அளவு தீர்மானிக்கப்படுகிறது. மருத்துவர் கண்காணிப்பு இல்லாமல் அதிகளவு நெய் குடிப்பது ஆபத்தை விளைவிக்கும்.
சோஷியல் மீடியா ட்ரெண்டுகளைக் கண்மூடித்தனமாகப் பின்பற்றுவது ஆரோக்கியத்திற்குப் பாதகமாக முடியும். நெய் உடலுக்கு நல்ல கொழுப்பைத் தரும் சிறந்த உணவாகும்; ஆனால் அதை அன்றாட உணவில் 1 முதல் 2 தேக்கரண்டி (Teaspoon) வீதம் சமைத்த உணவில் சேர்த்து உண்பதே பாதுகாப்பானது. பஞ்சகர்மா போன்ற சிகிச்சைகள் தேவைப்பட்டால், தகுதியான ஆயுர்வேத மருத்துவரை நேரில் அணுகி ஆலோசனை பெறுவதே சரியானது.
