Butter Chicken : ரெஸ்டாரண்ட் ஸ்டைல் பட்டர் சிக்கன்... ஈஸியா வீட்டிலேயே செய்வது எப்படி?

Butter Chicken Recipe : பட்டர் சிக்கன் என்றாலே பலருக்கும் நாக்கில் எச்சில் ஊறும். அந்த ரெஸ்டாரண்ட் ஸ்டைல் பட்டர் சிக்கனை வீட்டிலேயே ஈஸியாக எப்படி செய்வது என இங்கே பார்க்கலாம்.

பட்டர் சிக்கன் செய்வது எப்படி?

பட்டர் சிக்கன் சுவைக்கு இந்தியர்கள் மட்டுமில்லாமல் வெளிநாட்டினரும் பெரிய ஃபேன்தான். சப்பாத்தி, ரொட்டி, இட்லி, தோசை, பரோட்டா கூட சேர்த்து சாப்பிட அட்டகாசமாக இருக்கும் இந்த பட்டர் சிக்கனை, நம் வீட்டிலேயே சுலபமாக எப்படி செய்வது எனப் பார்க்கலாம்.

பட்டர் சிக்கன் செய்ய தேவையான பொருட்கள்:

1 கிலோ தோலில்லாத சிக்கன் (சிறிய துண்டுகளாக நறுக்கியது)

1/4 கப் க்ரீக் யோகர்ட் அல்லது கெட்டித் தயிர்

6 பல் பொடியாக நறுக்கிய பூண்டு

2 டீஸ்பூன் துருவிய இஞ்சி

1 டேபிள் ஸ்பூன் கரம் மசாலா

2 டேபிள் ஸ்பூன் சீரகம்

1 டேபிள் ஸ்பூன் மஞ்சள் தூள்

1 முதல் 2 ஸ்பூன் மிளகாய்த் தூள் (அல்லது உங்கள் காரத்திற்கு ஏற்ப மிளகுத் தூள்)

2 டேபிள் ஸ்பூன் ஆலிவ் எண்ணெய்

4 டேபிள் ஸ்பூன் உப்பு கலந்த வெண்ணெய்

1 பெரிய வெங்காயம்

1 முதல் 2 டேபிள் ஸ்பூன் மிளகாய்த் தூள் (கிரேவிக்கு)

1/2 கப் தக்காளி பேஸ்ட்

1 டின் (14 அவுன்ஸ்) தேங்காய்ப் பால் (அல்லது 1 கப் ஃப்ரெஷ் க்ரீம்)

அரை கப் மல்லித்தழை

பட்டர் சிக்கன் செய்முறை

ஒரு பெரிய பாத்திரத்தில் சிக்கன், தயிர், நறுக்கிய பூண்டு, இஞ்சி, கரம் மசாலா, சீரகம், மஞ்சள் தூள், மிளகாய்த் தூள் மற்றும் உப்பு சேர்த்து நன்றாகக் கலந்து 5 முதல் 10 நிமிடம் ஊறவைக்கவும். அடுத்து, ஒரு பெரிய கடாயில் கொஞ்சம் ஆலிவ் எண்ணெய் ஊற்றி மிதமான தீயில் சூடாக்கவும். எண்ணெய் காய்ந்ததும், ஊறவைத்த சிக்கனைப் போட்டு பொன்னிறமாகும் வரை நன்றாக வறுக்க வேண்டும். பிறகு அதில் கொஞ்சம் வெண்ணெய் சேர்த்துப் பிரட்டி, சிக்கனை மட்டும் தனியாக ஒரு தட்டில் எடுத்து வைத்துக்கொள்ளுங்கள்.

ரெஸ்டாரண்ட் ஸ்டைல் பட்டர் சிக்கன் ரெடி

இப்போது அதே கடாயில் நறுக்கிய வெங்காயத்தைப் போட்டு 5 நிமிடம் வதக்கவும். வெங்காயம் மென்மையானதும், மீதமுள்ள வெண்ணெய், பூண்டு, இஞ்சி, கரம் மசாலா, சீரகம், மஞ்சள் தூள், மிளகாய்த் தூள் மற்றும் தேவையான அளவு உப்பு சேர்த்து நன்றாகக் கிளறவும். மசாலாவின் பச்சை வாசனை போய் நல்ல மணம் வரும் வரை சுமார் 5 நிமிடம் வதக்க வேண்டும். பிறகு தக்காளி பேஸ்ட்டை சேர்த்து மேலும் 3-4 நிமிடம் வதக்கவும்.

இப்போது அடுப்பை சிம்மில் வைத்துவிட்டு, 1 கப் தண்ணீர் மற்றும் தேங்காய்ப் பாலை ஊற்றிக் கொதிக்க விடவும். கிரேவி கெட்டியாகும் வரை சுமார் 5 நிமிடம் கொதிக்க வைக்க வேண்டும். கொதிக்கும்போது கொஞ்சம் வெண்ணெய் சேர்த்துக் கொள்ளுங்கள். கிரேவி ரொம்ப கெட்டியாக இருந்தால், இன்னும் கொஞ்சம் தேங்காய்ப் பால் அல்லது தண்ணீர் சேர்த்துக் கொள்ளலாம். கடைசியாக, வறுத்து வைத்துள்ள சிக்கனை கிரேவியில் போட்டு, மேலே பொடியாக நறுக்கிய மல்லித்தழையைத் தூவி இறக்கினால்... சுடச்சுட ரெஸ்டாரண்ட் ஸ்டைல் பட்டர் சிக்கன் ரெடி! இந்த பட்டர் சிக்கனை சூடான சாதம், சப்பாத்தி அல்லது ரொட்டியுடன் சேர்த்துச் சாப்பிட்டால் சுவை சும்மா அள்ளும்.