Shalini : அஜித் கொடுத்த கிரீன் சிக்னல்... சினிமாவில் நெக்ஸ்ட் ரவுண்டுக்கு ரெடியான ஷாலினி? ஆனா அதுல ஒரு ட்விஸ்ட் இருக்கு..!

Shalini Ajithkumar Comeback in Cinema : நடிகர் அஜித்தின் மனைவியும், நடிகையுமான ஷாலினி பல வருட இடைவெளிக்கு பின்னர் சினிமாவில் ரீ எண்ட்ரி கொடுக்க உள்ளாராம். அதைப்பற்றி பார்க்கலாம்.

Shalini Comeback in Cinema

தமிழ் திரையுலகில் மிகவும் மதிக்கப்படும் நட்சத்திர தம்பதிகளில் நடிகர் அஜித்குமார் மற்றும் ஷாலினி முக்கியமானவர்கள். திரையில் மட்டுமல்லாமல், நிஜ வாழ்க்கையிலும் எளிமை, அன்பு மற்றும் புரிதலுடன் வாழ்ந்து வரும் இந்த ஜோடி, பலருக்கும் முன்மாதிரியாக இருந்து வருகிறது. காதலாக தொடங்கிய இவர்களின் உறவு, திருமண வாழ்க்கையிலும் அதே பாசத்துடன் தொடர்வதால் ரசிகர்களின் மனதில் தனி இடத்தைப் பெற்றுள்ளது.

இந்நிலையில், நீண்ட இடைவெளிக்குப் பிறகு ஷாலினி மீண்டும் திரையுலகில் களமிறங்க உள்ளதாக தகவல்கள் வெளியாகி ரசிகர்களின் கவனத்தை ஈர்த்துள்ளன. ஆனால், இந்த முறை அவர் நடிகையாக அல்லாமல், அவர் வேறு ஒரு பரிணாமத்தில் புதிய பயணத்தை தொடங்க உள்ளதாக கூறப்படுவது, ரசிகர்கள் மத்தியில் எதிர்பார்ப்பை அதிகரித்துள்ளது.

'அமர்க்களம்' படத்தில் தொடங்கிய காதல்

அஜித் - ஷாலினி காதல் கதை தமிழ் சினிமாவின் மிகவும் அழகான காதல் கதைகளில் ஒன்று. 1999-ஆம் ஆண்டு வெளியான அமர்க்களம் திரைப்படத்தில் இணைந்து நடித்தபோது இருவருக்கும் நட்பு மலர்ந்தது. அந்த நட்பு பின்னர் காதலாக மாறி, இரு குடும்பங்களின் சம்மதத்துடன் 2000-ஆம் ஆண்டு திருமண பந்தத்தில் இணைந்தனர். அவர்களின் திருமணம் அப்போது தமிழ் சினிமாவில் அதிகம் பேசப்பட்ட நிகழ்வுகளில் ஒன்றாக இருந்தது. இன்று வரை அந்த உறவு அதே அன்பும் புரிதலும் கொண்டதாக தொடர்கிறது.

குடும்பத்திற்காக சினிமாவை விட்டு விலகிய ஷாலினி

திருமணத்திற்குப் பிறகு ஷாலினி முழுமையாக சினிமாவிலிருந்து விலகி, குடும்ப வாழ்க்கைக்கு முன்னுரிமை கொடுத்தார். அஜித்தின் திரைப்பயணத்திற்கும், குழந்தைகளின் வளர்ப்பிற்கும் முழு ஆதரவாக இருந்து வந்தார். மீடியா வெளிச்சத்திற்கு அப்பாற்பட்ட அமைதியான வாழ்க்கையைத் தேர்வு செய்த அவர், குடும்பத்தை முதன்மையாகக் கருதி வாழ்ந்து வருகிறார்.

இந்த தம்பதிக்கு அனோஷ்கா என்ற மகளும், ஆத்விக் என்ற மகனும் உள்ளனர். இருவரையும் எளிமையான வாழ்க்கை முறையில் வளர்த்து வரும் இந்த குடும்பம் ரசிகர்களின் பாராட்டைப் பெற்று வருகிறது.

அஜித்தின் கனவுப் பயணத்தில் உறுதுணையாக ஷாலினி

நடிப்புடன் சேர்த்து கார் பந்தயத்திலும் தீவிர ஆர்வம் கொண்டுள்ள அஜித், சர்வதேச மோட்டார் ரேசிங் போட்டிகளில் தொடர்ந்து பங்கேற்று வருகிறார். அவரது இந்த கனவுப் பயணத்தில் ஷாலினி எப்போதும் உறுதுணையாக இருந்து வருகிறார்.

குறிப்பாக, கார் பந்தயத்திற்கு புறப்படும் முன் அஜித்துக்கு ஷாலினி வாழ்த்து தெரிவிக்கும் தருணங்கள் சமூக வலைதளங்களில் பலமுறை வைரலாகி ரசிகர்களின் கவனத்தை ஈர்த்துள்ளன. அந்த தருணங்களைப் பார்த்த ரசிகர்கள், இவர்களின் புரிதலும் பாசமும் நிறைந்த வாழ்க்கையை பாராட்டி கருத்துகளைப் பகிர்ந்து வருகின்றனர்.

தயாரிப்பாளராக புதிய தொடக்கமா?

தற்போது வெளியாகியுள்ள தகவல்களின்படி, ஷாலினி தயாரிப்புத் துறையில் களமிறங்கும் திட்டத்தில் இருப்பதாக கூறப்படுகிறது. இதுகுறித்து அதிகாரப்பூர்வ அறிவிப்பு இன்னும் வெளியாகவில்லை என்றாலும், இந்த தகவல் உண்மையாகும் பட்சத்தில், நீண்ட இடைவெளிக்குப் பிறகு ஷாலினி மீண்டும் தமிழ் திரையுலகில் புதிய பொறுப்புடன் களமிறங்குவது ரசிகர்களுக்கு மகிழ்ச்சியான செய்தியாக அமைந்துள்ளது. அப்படி ஷாலினி தயாரிப்பு நிறுவனம் தொடங்கினால் அதில் அஜித் கண்டிப்பாக ஒரு படம் நடிப்பார் என்பது மட்டும் உறுதி.