ஒரே நாளில் பிறந்த அப்பா - அம்மாவுக்கு மிக பிரமாண்டமாக பர்த்டே கொண்டாடிய கீர்த்தி சுரேஷ்! வைரலாகும் போட்டோஸ்!

நடிகை கீர்த்தி சுரேஷ் தன்னுடைய அப்பா - அம்மாவிற்கு பிறந்தநாள் கொண்டாடிய புகைப்படங்கள், சமூக வலைத்தளத்தில் வைரலாக பார்க்கப்பட்டு லைக்குகளை குவித்து வருகிறது.  

நடிகை கீர்த்தி சுரேஷ்... மலையாள திரையுலகில் குழந்தை நட்சத்திரமாக அறிமுகமாக பின் கதாநாயகியாக மாறியவர். இவருடைய தந்தை மலையாள திரையுலகின் முன்னணி தயாரிப்பாளர் என்பதால் இவர் சினிமாவில் நடிக்க வாய்ப்பு எளிதாக கிடைத்தது.

அதே போல் கீர்த்தி சுரேஷின் தாய்... மேனகா தமிழ் சினிமாவில் பல படங்களில் கதாநாயகியாக நடித்து பிரபலமானவர். 1980 ஆம் ஆண்டு, ராமாயி வயசுக்கு வந்தாச்சு என்கிற படத்தின் மூலம் அறிமுகமான இவர், இதை தொடர்ந்து, கீழ் வானம் சிவக்கும், காலம், நெற்றிக்கண் போன்ற பல படங்களில் நடித்துள்ளார்.

இவர் கடந்த 1987 ஆம் ஆண்டு, தயாரிப்பாளர் சுரேஷை திருமணம் செய்து கொண்ட பின்னர் முழுமையாக திரைப்படங்கள் நடிப்பதில் இருந்து விலகி, குடும்பம் மற்றும் குழந்தைகளை வளர்ப்பதில் கவனம் செலுத்த துவங்கினார்.

இவருடைய மூத்த மகளான ரேவதி, கீர்த்தி நடித்த வசி என்கிற படத்தை தயாரித்தார். மேலும் பல படங்களில் இவர் துணை இயக்குனராக பணியாற்றியுள்ள நிலையில், விரைவில் படம் இயக்கவும் வாய்ப்புள்ளது.

மேனகா - சுரேஷ் தம்பதியின் இரண்டாவது மகளான கீர்த்தி சுரேஷ், தமிழ் , தெலுங்கு, மலையாளம் ஆகிய திரையுலகின் முன்னணி நடிகையாக உள்ளார். 

ஆரம்பத்தில் இவர் கதாநாயகியாக அறிமுகமான போது, இவருடைய நடிப்பு, சிரிப்பு போன்றவை பல்வேறு விமர்சனங்களுக்கு ஆளான நிலையில், பின்னர் தேசிய விருது வாங்கும் அளவிற்கு உயர்ந்தார். தற்போது தொடர்ந்து, கதாநாயகிக்கு முக்கியத்துவம் கொடுக்கும் படங்களை மட்டுமே அதிகம் தேர்வு செய்து நடித்து வருகிறார் என்பது அனைவருமே அறிந்தது தான்.

இந்நிலையில், கீர்த்தி சுரேஷ், ஒரே நாளில் பிறந்த தன்னுடைய தாய் - தந்தைக்கு குடும்பத்தினருடன் சேர்ந்து மிக பிரமாண்டமாக பர்த்டே கொண்டாடி மகிழ்ந்துள்ளார். இந்த புகைப்படங்களை சமூக வலைத்தளத்தில் அவர் வெளியிட ரசிகர்களும் தங்களுடைய வாழ்த்துக்களை தெரிவித்து வருகிறார்கள்