தமிழில் தயாரிப்பாளராக களமிறங்கும் தோனி... முதல் படமே ‘லவ் டுடே’ பிரபலத்துடன் - வெளியானது மாஸ் அறிவிப்பு

கிரிக்கெட்டில் கலக்கிய தோனி, தற்போது சினிமாவிலும் காலடி எடுத்து வைத்து தான் தயாரிக்க உள்ள முதல் தமிழ்படம் குறித்த அறிவிப்பை வெளியிட்டுள்ளார்.

முன்னாள் இந்திய கிரிக்கெட் வீரரும், சென்னை சூப்பர் கிங்ஸ் அணியின் தற்போதைய கேப்டனுமான எம்.எஸ்.தோனிக்கு மிகப்பெரிய ரசிகர் பட்டாளமே உள்ளது. அவர் சர்வதேச கிரிக்கெட்டில் இருந்து ஓய்வு பெற்றாலும், ஐபிஎல்-லில் சென்னை சூப்பர் கிங்ஸ் அணிக்காக தொடர்ந்து விளையாடி வருகிறார். இதனால் சென்னை மீது அவருக்கு எப்போதுமே தனி பாசம் உண்டு.

அந்த வகையில் கிரிக்கெட்டில் கலக்கிய தோனி, தற்போது சினிமாவிலும் காலடி எடுத்து வைத்துள்ளார். அவரது மனைவி சாக்‌ஷி நிர்வகித்து வரும் தோனி எண்டர்டெயின்மெண்ட் நிறுவனம் தயாரிக்கும் முதல் படம் குறித்த அறிவிப்பு வெளியாகி உள்ளது. அதன்படி அந்நிறுவனம் முதன்முதலில் தமிழ் படத்தை தான் தயாரிக்க உள்ளதாக அறிவித்துள்ளது.

இதையும் படியுங்கள்... KGF பட நடிகரை கரம் பிடித்த தமிழ் பட நடிகை ஹரிபிரியா..! ரசிகர்கள் வாழ்த்து..!

Lets Get Married என பெயரிடப்பட்டுள்ள இப்படத்தில் பிக்பாஸ் பிரபலம் ஹரீஷ் கல்யாண் கதாநாயகனாக நடிக்க உள்ளதாக அதிகாரப்பூர்வமாக அறிவித்துள்ளனர். அதுமட்டுமின்றி இப்படத்தில் ஹரீஷ் கல்யாணுக்கு ஜோடியாக இவானா நடிக்க உள்ளாராம். இவர் கடந்த ஆண்டு பிரதீப் ரங்கநாதன் இயக்கத்தில் வெளியான லவ் டுடே படத்தில் ஹீரோயினாக நடித்து பிரபலமானவர் ஆவார்.

மேலும் இதில் நடிகை நதியா மற்றும் நகைச்சுவை நடிகர் யோகிபாபு ஆகியோரும் முக்கிய கதாபாத்திரத்தில் நடிக்க உள்ளதாக அறிவித்துள்ளனர். இப்படத்தை ரமேஷ் தமிழ்மணி இயக்க உள்ளார். இவர் ஏற்கனவே அதர்வா தி ஆரிஜின் என்கிற கிராபிக்ஸ் நாவலை இயக்கியவர் ஆவார். பயணத்தை மையப்படுத்தி எடுக்கப்படும் ரொமாண்டிக் கதையம்சம் கொண்ட படமாக இது இருக்கும் என கூறப்படுகிறது.

இதையும் படியுங்கள்... ரூ.50 கோடிக்கு வீடும் வரல... காரும் வரல! கே.எல்.ராகுல் திருமண பரிசு குறித்த உண்மையை போட்டுடைத்த குடும்பத்தினர்