பிரம்மாண்ட இயக்குனர் ஷங்கரின் மகள் அதிதி தனக்கு பேர் - புகழ் கிடைக்க வேண்டும் என்பதற்காக மற்றவர்கள் வாய்ப்பை தட்டி பறிப்பதாக எழுந்துள்ள சர்ச்சை திரையுலகினர் மத்தியில் பரபரப்பை ஏற்படுத்தியுள்ளது.
தமிழ் சினிமாவில் பிரமாண்ட இயக்குனர் என பெயர் எடுத்தவர் இயக்குனர் ஷங்கர். இவரின் இரண்டாவது மகள்... அதிதி ஷங்கர், கடந்த ஆண்டு நடிகர் கார்த்தி நடிப்பில், சூர்யா தயாரிப்பில் வெளியான 'விருமன்' படத்தின் மூலம் கதாநாயகியாக அறிமுகமானார். டாக்டருக்கு படித்து விட்டு, அதிதி திடீர் என நடிப்பில் கவனம் செலுத்த துவங்கியது, ஆச்சர்யத்தை ஏற்படுத்திய போதிலும்... சிறு வயதில் இருந்தே நடிப்பு என்றால் மிகவும் இஷ்டம் இதன் காரணமாகவே நடிகையாக முடிவு செய்ததாகவும் கூறினார்.
முதல் படத்திலேயே அதிதி, தேன்மொழியாக சிறப்பான நடிப்பை வெளிப்படுத்தியது மட்டும் இன்றி, ஆட்டம் - பாட்டம் என அனைத்திலும் பொளந்து கட்டினார். மேலும் 'விருமன்' திரைப்படமும் ரசிகர்கள் மத்தியில் நல்ல வரவேற்பை பெற்று வெற்றிப்படமாக அமைந்தது.
இந்த படத்தில் அதிதி ஷங்கர் பாடி இருந்த 'மதுரை வீர அழகுல' பாடலை முதலில், சூப்பர் சிங்கர் ராஜலட்சுமி குரலில்... யுவன் ஷங்கர் ராஜா பதிவு செய்த நிலையில், பின்னர் அவரின் குரலில் உருவான பாடலை தூக்கி விட்டு அதிதியை பாட வைத்தனர். இது குறித்து அப்போதே ராஜலட்சுமி மிகவும் மனவருத்தத்துடன் பகிர்ந்து கொண்டது மட்டும் இன்றி, அதிதியை பிரபலமாக்க இப்படி 'விருமன்' படக்குழு செய்ததாக சர்ச்சைகளும் எழுந்தது.
இதை தொடர்ந்து மீண்டும் இதே போன்ற பிரச்சனையில் சிக்கியுள்ளார் அதிதி. சமீபத்தில் அதிதி நடிப்பில் வெளியான... 'மாவீரன்' படத்தில், சிவகார்த்திகேயனுடன் சேர்ந்து 'வண்ணார பேட்டையில' பாடலை பாடி இருந்தார். இந்த பாடலும், அதிதி ஷங்கருக்கு நல்ல வரவேற்பை பெற்று தந்தது. இந்த பாடலின் மூலம் தான் அதிதி ஷங்கர் மீண்டும் சர்ச்சையில் சிக்கி உள்ளார்.
இந்த பாடலை முதலில் ஆகஸ்ட் 16 1947, கர்ணன், குட் நைட் போன்ற படங்களில் பாடல்கள் பாடிய பாடகி மீனாட்சி இளையராஜா தான் பாடி இருந்தாராம். பின்னர் இவரின் குரலில் பதிவு செய்யப்பட்ட பாடலை நீக்கி விட்டு, அதிதி ஷங்கரை பாட வைத்துள்ளதாக குற்ற சாட்டுகள் எழுந்துள்ளது. மேலும் தன்னுடைய வளர்ச்சிக்காக மற்றவர்கள் வாய்ப்புகளை அதிதி தட்டி பறிப்பதாக சில சர்ச்சை கருத்துக்களும் முன்வைக்கப்பட்டு வருகிறது.
பாடகி மீனாட்சி இளையராஜா, இதுகுறித்து தற்போது கூறியுள்ளதாவது... "இந்த பாடல் நீக்க பட்டதால், நான் மன உளைச்சலுக்கு ஆளானேன், சில நேரங்களில் எனக்கு நன்றாக பாடவரவில்லை என்று தோன்றுகிறது, நன்றாக பாடி இருந்தால் படத்தில் எனது குரலில் பாடல் வெளியாகியிருக்கும் என நினைத்து அழுவதாகவும், சில நேரங்களில் இதைவிட நல்ல வாய்ப்பு வரும் என மனதை தேற்றி கொள்வதாகவும் கூறியுள்ளார் என்பது குறிப்பிடத்தக்கது.
சேனலை கிளிக் செய்து பின்தொடரவும்