பைக்கின் மீது அலாதி பிரியம் கொண்டவர் நடிகர் அஜித். ஏதேனும் ஓய்வு நேரம் கிடைத்தால் உடனே பைக்கை எடுத்துக் கொண்டு எங்காவது ட்ரிப் கிளம்பி விடுவார். நடிகர் அஜித்துக்கு பைக்கில் உலகையே சுற்றிவர வேண்டும் என்பது நீண்ட நாள் ஆசையாக உள்ளது. இதனை அவர் விரைவில் செய்ய உள்ளதாகவும் கூறப்படுகிறது. அதன் முன்னோட்டமாக தான் சமீபத்தில் ஐரோப்பா மற்றும் லண்டனுக்கு சென்று அங்கு தனது நண்பர்களுடன் பைக் ட்ரிப்பும் சென்றிருந்தார் அஜித்.
லண்டன் ட்ரிப்பை முடித்துக்கொண்டு கடந்த மாதம் இந்தியா திரும்பிய அஜித், தான் தற்போது நடித்து வரும் ஏ.கே.61 படத்தின் இறுதிக்கட்ட படப்பிடிப்பில் கலந்துகொண்டார். விசாகப்பட்டினத்தில் கடந்த சில வாரங்களாக நடைபெற்று வந்த ஷூட்டிங் அண்மையில் நிறைவு பெற்றது. இதில் அஜித் சம்பந்தப்பட்ட காட்சிகள் பெரும்பாலும் படமாக்கப்பட்டுவிட்டதாக கூறப்படுகிறது.
அதிமுக கவுன்சிலர் வசந்த் உடன் அஜித்
தற்போது புதுத் தகவலாக நடிகர் அஜித்தின் இமயமலை பைக் ட்ரிப்பில் அவருடன் அதிமுக கவுன்சிலர் ஒருவரும் சென்றுள்ளது தெரியவந்துள்ளது. பொள்ளாச்சி நகராட்சியின் 8-வது வார்டு கவுன்சிலரான வசந்த் என்பவர் தான் தற்போது அஜித் உடன் பைக் ட்ரிப் சென்றுள்ளாராம். இவர் அஜித்தின் நெருங்கிய நண்பர் என்றும், அவரைப் போல் பைக் ரைடிங் மீது ஆர்வம் கொண்டவர் என்றும் கூறப்படுகிறது.