கன்னட பட நடிகரும், இயக்குனருமான துவாரகிஷ் திடீர் என மரணமடைந்துள்ள சம்பவம் திரையுலகினர் மத்தியில் அதிர்ச்சியை ஏற்படுத்தியுள்ளது.
கன்னட திரையுலகை சேர்ந்த பழம்பெரும் நடிகரான துவாரகிஷ் கடந்த சில வருடங்களாக, வயது மூப்பு காரணமாக வரும் பிரச்சனைகளால் தொடர்ந்து அவதிப்பட்டு வந்த நிலையில், மாரடைப்பு காரணமாக இவர் உயிரிழந்துள்ளதாக கூறப்படுகிறது. இவருக்கு வயது 81.
எலக்ட்ரானிக் சிட்டியில் உள்ள, வீட்டில் துவாரகிஷ் இறந்ததாக அவரது மகன் கூறியுள்ளார். இவர் நடிகர் என்பதை தாண்டி, பல வெற்றி படங்களை இயக்கியவர். அதே போல் சில படங்களை தயாரித்தும், உள்ளார். இவரின் இறுதி சடங்கு பெங்களூரு ரவீந்திர கலாக்ஷேத்ராவில் நடைபெறும் என தெரிவிக்கப்பட்டது. இன்று மாலை இறுதி சடங்குகள் நடைபெற உள்ளநிலையில், இவரின் உடல் ரசிகர்கள், குடும்பத்தினர், மற்றும் பிரபலங்கள் அஞ்சலிக்காக அவரது இல்லத்தில் வைக்கப்பட்டுள்ளது.
தமிழில் சூப்பர் ஸ்டார் ரஜினிகாந்த், ஸ்ரீதேவி, சில்க் ஸ்மிதா ஆகியோர் நடித்த 'அடுத்த வாரிசு' படத்தை தயாரித்துள்ளார். அதே போல் ரஜினிகாந்தின் நான் அடிமை இல்லை என்கிற படத்தை, இயக்கி தயாரித்துள்ளார். ரஜினிகாந்துக்கு மிகவும் நெருக்கமானவர்களின் ஒருவரான இவரது மறைவு ரஜினிகாந்தையும் வருத்தத்தில் ஆழ்த்தியுள்ளதாக கூறப்படுகிறது. இவர் கடைசியாக கடந்த 2019 ஆம் ஆண்டு கன்னட நடிகர் ஷிவ்ராஜ் குமார் நடிப்பில், வெளியான ஆயுஷ்மான்பாவ என்கிற படத்தை தயாரித்திருந்தது குறிப்பிடத்தக்கது.