கருணாநிதி, எம்ஜிஆர், ஜெயலலிதா அமைச்சரவையில் இருந்தவர்களுக்கு இடம்... கலந்துகட்டிய மு.க.ஸ்டாலின்!
முதன் முறை முதல்வராகப் பதவியேற்கும் மு.க. ஸ்டாலின் அமைச்சரவையில் கருணாநிதியில் அமைச்சரவையில் இருந்தவர்கள் மட்டுமல்லாமல், எம்.ஜி.ஆர்., ஜெயலலிதா அமைச்சரவையில் அங்கம் வகித்தவர்களுக்கு இடம் வழங்கப்பட்டுள்ளது.
திமுக தலைவர் மு.க. ஸ்டாலின், தமிழக முதல்வராக நாளை பதவியேற்கிறார். அவருடன் 33 பேர் கொண்ட அமைச்சரவையும் பதவியேற்கிறது. அமைச்சர்களாக பதவியேற்பவர்களின் பட்டியல் வெளியாகிவிட்டது. மேலும் துறைகளும் அறிவிக்கப்பட்டுள்ளன. இந்தப் பட்டியலில் அதிமுகவிலிருந்து திமுகவில் இணைந்த பலருக்கு அமைச்சர்கள் வாய்ப்பு வழங்கப்பட்டுள்ளது. 1984-இல் எம்.ஜி.ஆர். ஆட்சியில் போக்குவரத்து துறை, 1991-இல் ஜெயலலிதா ஆட்சியில் சுகாதாரத் துறை அமைச்சராகப் பணியாற்றிய முத்துசாமி, ஸ்டாலின் அமைச்சரவையில் வீட்டு வசதி துறை அமைச்சராக அறிவிக்கப்பட்டுள்ளார்.
இதேபோல 1991-இல் ஜெயலலிதா அமைச்சரவையில் பொதுப்பணித்துறை, மின் துறை என முக்கியப் பொறுப்புகளை வகித்த ராஜகண்ணப்பன் போக்குவரத்து துறை அமைச்சராகப் அறிவிக்கப்பட்டுள்ளார். 1991-இல் ஜெயலலிதா அமைச்சரவையில் வீட்டு வசதி துறை அமைச்சராக இருந்த எஸ்.ரகுபதி, சட்டத்துறை அமைச்சராகப் பதவியேற்க உள்ளார். 2001-இல் ஜெயலலிதா ஆட்சியில் வீட்டுவசதி துறை அமைச்சராகப் பணியாற்றி அனிதா ராதாகிருஷ்ணன் மீனவர் நலத்துறை அமைச்சராகப் பதவியேற்க உள்ளார். 2011-இல் ஜெயலலிதா ஆட்சியில் போக்குவரத்து துறை அமைச்சராக இருந்த செந்தில்பாலாஜி, தற்போது மின்துறை அமைச்சராக அறிவிக்கப்பட்டுள்ளார். அதிமுகவில் அமைச்சரே ஆகாத பி.கே.சேகர்பாபு, முதன் முறையாக ஸ்டாலின் அமைச்சரவையில் இந்து அறநிலையத் துறை அமைச்சராகப் பதவியேற்க உள்ளார்.
அதிமுகவிலிருந்து திமுகவுக்கு வந்து ஏற்கனவே 2006-இல் கருணாநிதி அமைச்சரவையில் அங்கம்வகித்த, கே.கே.எஸ்.எஸ்.ஆர்.ராமச்சந்திரன், எ.வ.வேலு ஆகியோர் ஸ்டாலின் அமைச்சரவையிலும் இடம் பிடித்துள்ளனர். இதில் கே.கே.எஸ்.எஸ்.ஆர். ராமச்சந்திரன், 1984-இல் எம்.ஜி.ஆர். அமைச்சரவையில் கூட்டுறவுத் துறை அமைச்சராகப் பணியாற்றியவர். மு.க. ஸ்டாலின் அமைச்சரவையில் கருணாநிதி, எம்.ஜி.ஆர்., ஜெயலலிதா என மூன்று பேருடைய அமைச்சரவையில் அங்கம் வகித்தவர்களும் உள்ளனர் என்பது குறிப்பிடத்தக்கது.
சேனலை கிளிக் செய்து பின்தொடரவும்
