இமாச்சலப் பிரதேசத்தில் ஒரு பசுவின் வயிற்றில் இருந்து 28 கிலோ பிளாஸ்டிக் கழிவுகளையும், 41 உலோக ஆணிகளையும் மருத்துவர்கள் அறுவை சிகிச்சை மூலம் அகற்றினர். பசு தீவனம், தண்ணீர் அருந்தாமல் இருந்ததால், பரிசோதனைக்குப் பிறகு அறுவை சிகிச்சை செய்யப்பட்டது.
சினையாக இருந்த பசுவின் வயிற்றில் இருந்து சுமார் 28 கிலோ பிளாஸ்டிக் கழிவுகளையும், 41 உலோக ஆணிகளையும் அறுவை சிகிச்சை மூலம் கால்நடை மருத்துவர்கள் வெற்றிகரமாக அகற்றியுள்ளனர். இந்தச் சம்பவம் இமாச்சலப் பிரதேச மாநிலம் ஊனா மாவட்டத்தில் உள்ள ஒரு கால்நடை மருத்துவமனையில் நடைபெற்றுள்ளது.
பசுவுக்கு அறுவை சிகிச்சை
ஊனா மண்டல கால்நடை மருத்துவமனையின் பொறுப்பாளர் மருத்துவர் நிஷாந்த் ரனௌத் தலைமையிலான மருத்துவர் குழு சனிக்கிழமை அன்று இந்தச் சிக்கலான அறுவை சிகிச்சையை மேற்கொண்டது.
Related Articles
கால்ருஹி கிராமத்தைச் சேர்ந்த விபின் குமார் இந்தப் பசுவை மருத்துவமனைக்குக் கொண்டுவந்தார். கடந்த நான்கு முதல் ஐந்து நாட்களாக அந்தப் பசு தீவனம் மற்றும் தண்ணீர் அருந்தாமல் இருந்துள்ளது. முதல் கட்டப் பரிசோதனையில், அதன் வயிற்றில் இயற்கைக்கு மாறான பொருட்கள் இருக்கலாம் என மருத்துவர்கள் சந்தேகித்தனர். பல்வேறு சோதனைகளுக்குப் பிறகு, அறுவை சிகிச்சை செய்ய முடிவு செய்யப்பட்டது.
அகற்றப்பட்ட பொருட்கள்
அறுவை சிகிச்சையின்போது, பசுவின் வயிற்றில் இருந்து 28 கிலோ பிளாஸ்டிக், துணிகள், கயிறுகள், மற்றும் 41 ஆணிகள் உட்பட பல்வேறு உலோகத் துண்டுகள் அகற்றப்பட்டன. இந்த அறுவை சிகிச்சைக்குப் பிறகு, பசுவின் உடல்நலம் சீராக உள்ளதா என்பதை உறுதி செய்ய, அடுத்த ஏழு நாட்களுக்கு அது மருத்துவர்களின் கண்காணிப்பில் இருக்கும் என மருத்துவர் ரனௌத் தெரிவித்துள்ளார்.
மருத்துவமனையின் சாதனை
மண்டல கால்நடை மருத்துவமனையில், இதுவரை பெரிய அளவிலான குடலிறக்க நோய்கள் (large diaphragmatic hernia) போன்ற 53 சிக்கலான அறுவை சிகிச்சைகள் வெற்றிகரமாகச் செய்யப்பட்டுள்ளன என்று மருத்துவர் ரனௌத் கூறினார். இங்கு அனைத்து வகையான விலங்குகளுக்கும் அறுவை சிகிச்சை, இரத்தப் பரிசோதனை செய்யப்படுகிறது என்றும் அல்ட்ராசவுண்ட் போன்ற நவீன வசதிகள் உள்ளன என்றும் அவர் கூறினார்.
விழிப்புணர்வு வேண்டுகோள்
இந்த வெற்றிகரமான அறுவை சிகிச்சைக்காக மருத்துவர் குழுவுக்கு ஊனா கால்நடை பராமரிப்புத் துறை துணை இயக்குநர் மருத்துவர் வீரேந்திர பாட்டியால் வாழ்த்து தெரிவித்தார். மேலும், மக்கள் பிளாஸ்டிக் கழிவுகள், உலோக ஆணிகள் மற்றும் இதர குப்பைகளை திறந்தவெளியில் கொட்டுவதைத் தவிர்க்க வேண்டும் என்று அவர் வேண்டுகோள் விடுத்திருக்கிறார். “குப்பைகளை முறையாக அப்புறப்படுத்துவதன் மூலம் விலங்குகளையும் சுற்றுச்சூழலையும் பாதுகாக்க வேண்டியது நமது கடமை” என்று அவர் வலியுறுத்தினார்.