பின்தங்கிய சமூகத்தைச் சேர்ந்தவர் என்பதற்காக மட்டுமே ஒருவருக்கு விதிகளைத் தளர்த்திச் சலுகை வழங்க முடியாது என்றும், பொது வேலைவாய்ப்பில் கருணையை விட விதிகளே மேலோங்கி நிற்க வேண்டும் என்றும் உச்ச நீதிமன்றம் அதிரடியாகத் தீர்ப்பளித்துள்ளது.
பொது வேலைவாய்ப்பு விவகாரங்களில் அனைத்து விண்ணப்பதாரர்களுக்கும் சமமான வாய்ப்பை உறுதி செய்ய வேண்டுமானால், "கண்ணியம், தர்மம் அல்லது கருணை போன்ற உணர்வுகள் தள்ளியே இருக்க வேண்டும்" என்று நீதிபதிகள் தீபங்கர் தத்தா மற்றும் சதீஷ் சந்திர சர்மா அடங்கிய அமர்வு தெரிவித்துள்ளது.
ஏப்ரல் 4 அன்று வெளியான இந்தத் தீர்ப்பில், "ஒருவர் பின்தங்கிய சமூகத்தைச் சேர்ந்தவர் என்பதற்காக மட்டுமே, விதிகளைத் தளர்த்தி அவருக்குச் சாதகமாக முடிவெடுக்க முடியாது" என்று நீதிமன்றம் தெளிவுபடுத்தியுள்ளது.
வழக்கின் பின்னணி
டெல்லி காவல்துறை கான்ஸ்டபிள் பணிக்கான முதற்கட்டத் தேர்வில் தேர்ச்சி பெற்ற ஒரு விண்ணப்பதாரர், 2024 ஜனவரியில் நடைபெற்ற உடல்திறன் மற்றும் அளவீட்டுத் தேர்வில் (PE&MT) உடல்நலக் குறைவைக் காரணங்காட்டி பங்கேற்கவில்லை. எனினும், மத்திய நிர்வாகத் தீர்ப்பாயம் (CAT) அவருக்கு மற்றொரு வாய்ப்பு வழங்குமாறு டெல்லி காவல்துறைக்கு உத்தரவிட்டது. இந்த உத்தரவை 2025 செப்டம்பரில் டெல்லி உயர் நீதிமன்றமும் உறுதி செய்தது. இதனை எதிர்த்து டெல்லி காவல்துறை தாக்கல் செய்த மேல்முறையீட்டு மனுவை விசாரித்த உச்ச நீதிமன்றம், முந்தைய உத்தரவுகளை ரத்து செய்தது.
Related Articles
நீதிமன்றத்தின் முக்கியக் கருத்துக்கள்:
பொறுப்பற்றத் தன்மை: இந்த வழக்கை பொறுப்பற்றத் தன்மைக்கு ஒரு "சிறந்த உதாரணம்" என்று குறிப்பிட்ட நீதிபதிகள், அந்த விண்ணப்பதாரர் தனக்குக் கிடைத்த பொன்னான வாய்ப்பைத் தானாகவே முன்வந்து நழுவ விட்டுள்ளதாகக் கூறினர்.
விதிமுறைகளின் முக்கியத்துவம்: பெரிய அளவிலான பொது வேலைவாய்ப்பு நடைமுறைகள், அறிவிக்கப்பட்ட நிபந்தனைகளின்படியே கண்டிப்பாக நடைபெற வேண்டும். "வாய்ப்புகள் அரிதாகக் கிடைக்கும்போது, அவற்றை இரு கைகளாலும் இறுகப் பற்றிக்கொள்ள வேண்டும்" என்று நீதிமன்றம் அறிவுறுத்தியது.
சமநிலை பாதிப்பு: ஒரு விண்ணப்பதாரருக்காக விதிகளைத் தளர்த்துவது, ஒட்டுமொத்தத் தேர்வு முறையின் நம்பகத்தன்மையையும் நேர்மையையும் சீர்குலைத்துவிடும்.
தனிச்சலுகை கோர முடியாது: சுமார் ஒரு லட்சம் பேர் பங்கேற்ற இந்தத் தேர்வில், அந்த விண்ணப்பதாரர் மட்டுமே தேதியை மாற்றக் கோரியுள்ளார். அவரது உடல்நலக் குறைவு என்பது விதிவிலக்கான சலுகை அளிக்கும் அளவுக்குக் கடுமையானது அல்ல என்றும் நீதிமன்றம் கருதியது.
"தேர்வுக்கு வராமல் இருந்துவிட்டு, மீண்டும் ஒரு வாய்ப்பை எதிர்பார்ப்பது அந்த நபரின் ஊக்கமின்மையையே காட்டுகிறது. குறைந்தபட்சம் அவர் தேர்வு நடைபெறும் இடத்திற்குச் சென்று தமக்கு நேர்ந்த சூழலை விளக்கி அனுமதி கோரியிருக்க வேண்டும்."
இறுதித் தீர்ப்பு
மத்திய நிர்வாகத் தீர்ப்பாயம் மற்றும் டெல்லி உயர் நீதிமன்றத்தின் உத்தரவுகளைத் தள்ளுபடி செய்த உச்ச நீதிமன்றம், தேர்வு தேதியை மாற்றியமைக்கக் கோருவதற்கு அந்த விண்ணப்பதாரருக்கு எந்தவித சட்டப்பூர்வ உரிமையும் இல்லை என்று தீர்ப்பளித்தது.
