சவுதி பாலைவனத்தில் விவசாயம் எப்படி நடக்குது தெரியுமா? வேற லெவல் சாட்டிலைட் போட்டோஸ்!
சவுதி அரேபியாவின் வறண்ட பாலைவனத்தில் வண்ண வளையங்களை விண்வெளி ஆய்வு மையத்தின் செயற்கைக்கோள் படம் காட்டுகிறது. இவை மத்திய-சுழல் நீர்ப்பாசன வயல்வெளிகள் ஆகும், இவை சவுதி அரேபியாவின் விவசாயத்திற்கு முக்கியமானவை.
பாலைவனத்தில் வண்ண வளையங்கள்
ஐரோப்பிய விண்வெளி ஆய்வு மையத்தின் (European Space Agency) கோப்பர்நிக்கஸ் சென்டினல்-1 (Copernicus Sentinel-1) செயற்கைக்கோள் சமீபத்தில் எடுத்த ஒரு புதிய புகைப்படத்தை விஞ்ஞானிகள் வெளியிட்டுள்ளனர். வறண்ட பாலைவனத்தில் எடுக்கப்பட்ட இந்தப் படத்தில் உள்ள பிரமாண்டமான வண்ண வளையங்கள், வடக்கு சவுதி அரேபியாவில் விவசாயம் எப்படி நடக்கிறது என்பதைக் காட்டுகிறது.
அக்டோபர் 2024 (நீலம்), ஜனவரி 2025 (பச்சை) மற்றும் மே 2025 (சிவப்பு) ஆகிய மூன்று வெவ்வேறு மாதங்களில் ரேடார் தொழில்நுட்பம் மூலம் எடுக்கப்பட்ட இந்த படங்கள், காலப்போக்கில் நில பயன்பாட்டில் ஏற்படும் மாற்றங்களை எடுத்துக்காட்டுகின்றன.
இந்த கவர்ச்சியான வண்ணமயமான வளையங்கள், உண்மையில் வாடி அஸ் சிருஹான் (Wadi As Sirhan) படுகையில் அமைந்துள்ள தபார்ஜல் (Tabarjal) நகருக்கு அருகில் உள்ள மத்திய-சுழல் நீர்ப்பாசன (central-pivot irrigation) வயல்வெளிகள் ஆகும். ஒவ்வொரு வட்ட வடிவ பண்ணையும் சுமார் ஒரு கிலோமீட்டர் அகலம் கொண்டது. நீண்ட சுழலும் தெளிப்பான்கள் கிணற்றைச் சுற்றி வந்து, சீராக நீர்ப்பாசனம் செய்யும். இதனால் சரியான வட்ட வடிவில் சாகுபடி நிலங்களை உருவாக்குகின்றன.
சவுதி அரேபியாவின் வறண்ட காலநிலைக்கு இந்த அமைப்பு மிகவும் முக்கியமானது. இங்கு மழைப்பொழிவு குறைவாக உள்ளதுடன், பெரும்பாலான நிலங்கள் நீர்நிலைகள் இல்லாத வறண்ட பாலைவனமாகவே உள்ளன.
சவுதி அரேபியாவில் விவசாய நிலங்கள்
சென்டினல்-1 செயற்கைக்கோள் வழக்கமான புகைப்படங்களுக்குப் பதிலாக ரேடாரைப் பயன்படுத்தி, தொடர்ச்சியான படங்களை எடுக்க உதவுகிறது. இது விஞ்ஞானிகள் எல்லா பருவங்களிலும் விவசாய நடவடிக்கைகளை கண்காணிக்க உதவுகிறது. படத்தில் உள்ள பல வண்ணங்கள் பயிர்களின் இருப்பு மட்டுமல்லாமல், அவற்றின் வளர்ச்சி நிலைகள், நீர்ப்பாசன முறைகள் மற்றும் பருவகால மாற்றங்களையும் வெளிப்படுத்துகிறது.
கடுமையான காலநிலை இருந்தபோதிலும், கோதுமை, காய்கறிகள் போன்ற பயிர்கள் இங்கு பயிரிடப்படுகின்றன. கவனமான நீர் மேலாண்மை உத்திகளால் இது சாத்தியமாகிறது.
படத்தின் சுற்றியுள்ள பகுதிகள், வெள்ளை, சாம்பல் அல்லது கருப்பு நிறங்களில் காட்டப்பட்டுள்ளன. அவை வெறும் நிலம், பாலைவன மணல் அல்லது தாவரங்கள் இல்லாத வயல்வெளிகளைக் குறிக்கின்றன. தபார்ஜல் நகர்புறம் மேல் வலதுபுறத்தில் ஒரு வெள்ளை புள்ளியாகத் தெரிகிறது. இந்த நகரம் ஒரு முக்கிய விவசாய மையமாக செயல்படுகிறது. வடக்கு சவுதி அரேபியாவின் உணவு விநியோகத்தில் முக்கிய பங்கு வகிக்கிறது.
