மாநாட்டிற்கு இவர்களெல்லாம் வரவே வேண்டாம்.! விஜய் வெளியிட்ட முக்கிய அறிவிப்பு

தமிழகத்தில் திராவிட கட்சிகளுக்கு போட்டியாக களத்தில் இறங்கியுள்ளார் நடிகர் விஜய், தேர்தல் ஆணையத்தில் தமிழக வெற்றிக்கழகம் என்ற அரசியல் கட்சியை பதிவு செய்த விஜய், கடந்த இரண்டு மாதங்களுக்கு முன்பாக கட்சியின் கொடி மற்றும் பாடலையும் வெளியிட்டார். இதனையடுத்து தனது முதல் அரசியல் மாநாட்டிற்கான தேதியையும் அறிவித்தார். அதன் படி செம்படம்பர் மாதம் நடைபெறும் என அறிவிக்கப்பட்ட நிலையில் அனுமதி கிடைப்பதில் காலதாமதம் ஏற்பட்ட நிலையில் அக்டோபர் மாதம் 27ஆம் தேதி மாநாடு நடைபெறும் என அறிவிக்கப்பட்டது. இதனையடுத்து மாநாட்டு பணிகள் தீவிரமாக நடைபெற்று வருகிறது. மழை பெய்தாலும் அதனையும் பொருட்படுத்தாலும் மேடை அமைக்கும் பணி நடைபெறுகிறது.

மேலும் மாநாட்டிற்கு வரும் பொதுமக்களை நடிகர் விஜய் சந்திக்கும் வகையில் மாநாடு நுழைவு வாயிலில் இருந்து மேடை வரை விஜய் நடந்து செல்லும் வகையில் சிறப்பு மேடை அமைக்கப்பட்டுள்ளது. தமிழக வெற்றிக்கழக மாநாட்டிற்கு லட்சக்கணக்கான மக்கள் வருவார்கள் என எதிர்பார்க்கும் நிலையில் , நடிகர் விஜய் முக்கிய அறிக்கை ஒன்றை வெளியிட்டுள்ளார் அதில்,  மாநாட்டுப் பணிகளுக்கான குழுக்களும் தொகுதிப் பொறுப்பாளர்கள் பட்டியலும் அறிவிக்கப்பட்டுள்ள நிலையில், நம் முதல் மாநில மாநாடான வெற்றிக் கொள்கைத் திருவிழாவின் ஏற்பாடுகளில் நீங்கள் தீவிரமாக இருப்பதும் எனக்குத் தெரியும். மாநாட்டுக் களப்பணிகளில் மட்டுமல்லாமல், நம் ஒட்டுமொத்த அரசியல் களப்பணிகளிலும் நாம் அரசியல்மயப்படுத்தப்பட்டவர்கள் என்ற ஆழமான எண்ணத்தை மக்கள் மத்தியில் நீங்கள் உண்டாக்குவீர்கள் என்ற நம்பிக்கை எனக்கு இருக்கிறது.

இந்த நெகிழ்வான நேரத்தில், முக்கியமான ஒரு வேண்டுகோளை வைக்க விரும்புகிறேன். கழகத் தோழர்கள் எல்லோரையும் போலவே கர்ப்பிணிப் பெண்கள், பள்ளிச் சிறுவர் சிறுமியர், நீண்ட காலமாக உடல்நலமின்றி இருப்பவர்கள், முதியவர்கள் பலரும் தமிழகத்தின் பல்வேறு ஊர்களில் இருந்து நம் மாநாட்டுக்கு வரத் திட்டமிட்டு இருப்பர். அவர்களின் அந்த ஆவலை நான் மிகவும் மதிக்கிறேன். உங்கள் எல்லோருடனும் அவர்களையும் மாநாட்டில் காண வேண்டும் என்ற ஆவல்தான் எனக்கும் இருக்கிறது. ஆனால், எல்லாவற்றையும்விட அவர்களின் நலனே எனக்கு மிக மிக முக்கியம். மாநாட்டிற்காக அவர்கள் மேற்கொள்ளும் நீண்ட தூரப் பயணம், அவர்களுக்கு உடல்ரீதியாகச் சிரமத்தை ஏற்படுத்தக் கூடும். 
 

அதனால், அவர்கள் இவ்வளவு தூரம் சிரமப்பட்டு வர வேண்டாம் என்றே அவர்களின் குடும்ப உறவாகவும் இருக்கும் உரிமையில் அன்புடன் கேட்டுக்கொள்கிறேன். ஊடக மற்றும் சமூக ஊடகங்கள் வழியாக, தங்கள் வீடுகளில் இருந்தே நமது வெற்றிக் கொள்கைத் திருவிழாவில் கலந்து கொள்ளலாம் என்றும் அவர்களைக் கேட்டுக்கொள்கிறேன். மாநாட்டுக்கு வருகின்ற மற்ற அனைவரும், மாநாட்டுக்கு வந்து செல்லும்போது, பாதுகாப்புடன் பயணிப்பது மிக மிக முக்கியம். அதேபோல, பயண வழிகளில் அரசியல் ஒழுங்கையும் நெறிமுறைகளையும் போக்குவரத்து விதிமுறைகளையும் கட்டாயம் கடைப்பிடிக்க வேண்டும் என தவெக தலைவர் விஜய் கேட்டுக்கொண்டுள்ளார்.