- Home
- Tamil Nadu News
- Top 5 Richest Districts: தமிழ்நாட்டின் டாப் 5 பணக்கார மாவட்டங்கள் இவைதான்.. முழு லிஸ்ட் இதோ!
Top 5 Richest Districts: தமிழ்நாட்டின் டாப் 5 பணக்கார மாவட்டங்கள் இவைதான்.. முழு லிஸ்ட் இதோ!
Top 5 Richest Districts: தமிழ்நாட்டில் பொருளாதார வளர்ச்சியிலும் தனிநபர் வருமானத்திலும் முன்னிலை வகிக்கும் பணக்கார மாவட்டங்கள் எவை தெரியுமா? முதல் 5 மாவட்டங்கள் எவை என்பதைப் பார்க்கலாம்.

தமிழகத்தின் பணக்கார மாவட்டங்கள் எவை?
தமிழ்நாட்டின் பொருளாதார வளர்ச்சியில் ஒவ்வொரு மாவட்டத்துக்கும் முக்கியப் பங்கு உள்ளது. தொழிற்சாலைகள், தகவல் தொழில்நுட்ப நிறுவனங்கள், வணிகம், ஏற்றுமதி உள்ளிட்ட பல்வேறு துறைகள் மாவட்டங்களின் பொருளாதார வளர்ச்சிக்கு வலுசேர்க்கின்றன. தமிழக அரசின் 2025-26 பொருளாதார ஆய்வறிக்கையில் இடம்பெற்றுள்ள 2023-24ஆம் ஆண்டுக்கான மாவட்ட வாரியான தனிநபர் நிகர உள்நாட்டு உற்பத்தி மதிப்பீட்டின்படி, செங்கல்பட்டு முதலிடத்தில் உள்ளது. காஞ்சிபுரம், சென்னை, நாமக்கல், திருப்பூர் ஆகிய மாவட்டங்களும் முதல் ஐந்து இடங்களில் இடம்பெற்றுள்ளன. இந்தப் பட்டியலில் உள்ள மாவட்டங்களையும் அவற்றின் பொருளாதாரச் சிறப்புகளையும் பார்க்கலாம்.
செங்கல்பட்டு: தமிழகத்தின் முதலிடம்
தமிழகத்தின் மாவட்ட வாரியான தனிநபர் வருமானப் பட்டியலில் செங்கல்பட்டு முதலிடத்தில் உள்ளது. இம்மாவட்டத்தின் தனிநபர் நிகர உள்நாட்டு உற்பத்தி மதிப்பு சுமார் ரூ.7.47 லட்சமாக உள்ளது. வாகன உற்பத்தி, மின்னணுப் பொருட்கள் தயாரிப்பு, தகவல் தொழில்நுட்பம் உள்ளிட்ட துறைகளில் செங்கல்பட்டு முக்கிய மையமாக விளங்குகிறது. சென்னை அருகே அமைந்துள்ளதும், தொழில் நிறுவனங்களின் வளர்ச்சியும் இம்மாவட்டத்தின் பொருளாதார முன்னேற்றத்துக்கு முக்கியக் காரணங்களாக உள்ளன.
காஞ்சிபுரம்: இரண்டாவது இடம்
இந்தப் பட்டியலில் காஞ்சிபுரம் மாவட்டம் இரண்டாவது இடத்தைப் பிடித்துள்ளது. இம்மாவட்டத்தின் தனிநபர் நிகர உள்நாட்டு உற்பத்தி மதிப்பு சுமார் ரூ.7.39 லட்சமாக உள்ளது. ஆயிரம் கோயில்களின் நகரம் என்று அழைக்கப்படும் காஞ்சிபுரம், பட்டுப் புடவைகளுக்கும் பல்லவர் காலக் கட்டடக்கலைக்கும் புகழ்பெற்றது. பாரம்பரியத் தொழில்களுடன் தொழிற்சாலை மற்றும் உற்பத்தித் துறைகளும் இம்மாவட்டத்தின் பொருளாதார வளர்ச்சிக்கு உதவுகின்றன.
சென்னை: மூன்றாவது இடம்
தமிழகத்தின் தலைநகரான சென்னை இந்தப் பட்டியலில் மூன்றாவது இடத்தில் உள்ளது. தனிநபர் நிகர உள்நாட்டு உற்பத்தி மதிப்பு சுமார் ரூ.5.77 லட்சமாகும். தகவல் தொழில்நுட்பம், மருத்துவம், வாகன உற்பத்தி, நிதிச் சேவைகள் உள்ளிட்ட பல துறைகளின் முக்கிய மையமாக சென்னை விளங்குகிறது. மெரினா கடற்கரை, பாரம்பரியக் கோயில்கள், உணவுப் பண்பாடு ஆகியவற்றுக்கும் இந்த மாநகரம் புகழ்பெற்றது.
5வது இடங்கள்: நாமக்கல், திருப்பூர்
நாமக்கல் மாவட்டம் சுமார் ரூ.4.74 லட்சம் தனிநபர் நிகர உள்நாட்டு உற்பத்தி மதிப்புடன் நான்காவது இடத்தில் உள்ளது. கோழிப்பண்ணை, முட்டை உற்பத்தி, சரக்குப் போக்குவரத்து உள்ளிட்ட துறைகளில் இம்மாவட்டம் சிறந்து விளங்குகிறது. ஐந்தாவது இடத்தில் திருப்பூர் உள்ளது. சுமார் ரூ.4.34 லட்சம் மதிப்புடன் பின்னலாடை மற்றும் ஜவுளி ஏற்றுமதியில் இந்தியாவின் முக்கிய மையமாகத் திகழ்கிறது. இந்தப் புள்ளிவிவரங்கள் தனிநபர் நிகர உள்நாட்டு உற்பத்தி மதிப்பீடுகள் மட்டுமே; ஒவ்வொரு குடிமகனின் உண்மையான சம்பளம் அல்லது வங்கிக் கணக்கில் உள்ள வருமானத்தைக் குறிக்காது.









