ஒரே வாரத்தில் பல லட்சம் சம்பாதிக்க சான்ஸ்.! பட்டாசு கடை வைக்க விண்ணப்பிப்பது எப்படி.? வெளியான அறிவிப்பு

தீபாவளி வண்ண பட்டாசு

தீபாவளி என்றாலே அனைவருக்கும் நினைவிற்கு வருவது பட்டாசு தான், அந்த அளவிற்கு தீபாவளி தினத்தில் வண்ண வண்ண கலரில் பட்டாசு வெடித்து சிறியவர்கள் முதல் பெரியவர்கள் வரை கொண்டாடுவார்கள். தமிழகத்தில் பட்டாசு விருதுநகர் மாவட்டத்தில் உள்ள சிவகாசியில் உற்பத்தி செய்யப்படுகிறது. இந்த ஆண்டு பல வகைகளில் பல விலைகளில் பட்டாசுகள் தயாரிக்கப்பட்டுள்ளது. ஐபோன் பட்டாசு, கோழி பட்டாசு என விதவிதமாக விற்பனைக்கு வந்துள்ளது. சிவகாசியில் பட்டாசு தயாரிக்கும் குடோனில் குறைந்த விலையில் பட்டாசுகள் வாங்கி ஆண்டுதோறும் தமிழகத்தில் பல்வேறு இடங்களில் சின்ன, சின்ன கடைகள் அமைத்து விற்பனை செய்யப்படுகிறது.

தற்காலிக பட்டாசு கடை தொடங்குவது எப்படி.?

ஒரு பட்டாசின் விலையானது சிவகாசியை விட 50 முதல் 100 ரூபாய் வரை அதிகமாகவே சிறிய கடைகளில் விற்பனை செய்யப்படுகிறது. சுமார் ஒரு வாரம் மட்டுமே நடைபெறும் இந்த பட்டாசு விற்பனை மூலம் குறைந்தது 10ஆயிரம் ரூபாய் முதல் பல லட்சம் ரூபாய் வரை சம்பாதிக்க முடியும். இதன் காரணமாகவே தெருவிற்கு தெரு பட்டாசு கடைகள் தொடங்கப்படும்.

இதனை கட்டுப்படுத்துவதற்காகவும், பட்டாசு கடை வைக்க அனுமதி வழங்குவது தொடர்பாகவும் தமிழக அரசு புதிய உத்தரவை பிறப்பித்துள்ளது.  அதன் படி தமிழகத்தில் வருகின்ற அக்டோபர் 31ஆம் தேதி அன்று கொண்டாடப்பட உள்ள தீபாவளிப் பண்டிகையையொட்டி அனைத்து பகுதிகளில் தற்காலிக பட்டாசுக் கடைகள் வைக்க விரும்புவோர், விதி எண் 84-ல் தெரிவிக்கப்பட்டுள்ள நிபந்தனைகளின்படி இணையதளம் (online) வழியாக அக்டோபர் 19ஆம் தேதிக்குள் விண்ணப்பிக்குமாறு அறிவிக்கப்பட்டுள்ளது.  

ஆன்லைனில் விண்ணப்பிப்பது எப்படி.?

தமிழகத்தில் அனைத்து மாவட்டத்திலுள்ள  இ சேவை மையங்களில்  https://www.tneseval.tn.gov.in என்ற இணையதளத்தில் வாயிலாக உரிய ஆவணங்களோடு பட்டாசு கடைக்கு அனுமதி கோரி விண்ணப்பிக்கலாம் என அறிவுறுத்தப்பட்டுள்ளது. ஏற்கனவே தற்காலிக பட்டாசு உரிமம் பெற பிற மாவட்டங்களில் உள்ளது போல் இணைய தளம் மூலம் விண்ணப்பிக்கும் வழிமுறை சென்னை காவல் துறையின் மண்டலங்களான கிழக்கு, மேற்கு, வடக்கு மற்றும் தெற்கு, ஆவடி மற்றும் தாம்பரம் மண்டலங்களுக்கும் விரிவுபடுத்தப்பட்டுள்ளது.

எனவே பட்டாசு கடை அமைப்பதற்கு அனுமதி கோரிய விண்ணப்பங்களை அக்டோபர் 19ஆம் தேதிக்குள்  இணையதளம் வாயிலாக மட்டுமே விண்ணப்பிக்க வேண்டும் எனவும் அதன் பிறகு பெறப்படும் விண்ணப்பங்கள் எக்காரணத்தைக் கொண்டும் ஏற்றுக் கொள்ளப்பட மாட்டாது என உறுதியாக தெரிவிக்கப்பட்டுள்ளது.  

கடைசி தேதி எப்போது.?

பட்டாசு கடை வைக்க அனுமதிக்கான விண்ணப்பங்கள் ஏற்கப்பட்டதெனில், அல்லது தற்காலிக உரிம ஆணையையும், நிராகரிக்கப்பட்டதெனில், அதற்கான உரிமத்தை இணையதளம் வாயிலாகவே மனுதாரர்கள் பதிவிறக்கம் செய்து கொள்ளலாம் என கூறப்பட்டுள்ளது. மேலும் அனுமதியின்றி / உரிமம் பெறாமல் பட்டாசு விற்பனை செய்வது கண்டறியப்பட்டால் சம்பந்தப்பட்ட நபர்கள் மீது சட்டப்படி உரிய நடவடிக்கை எடுக்கப்படும் எனவும் தமிழக அரசு எச்சரிக்கை விடுக்கப்பட்டுள்ளது.

 இந்த நிலையில்  தற்காலிக பட்டாசுக்கடை அமைக்க உரிமம் கோரி விண்ணப்பம் அளிப்போர். பொதுமக்களுக்கு சிரமம் இல்லாத ஆட்சேபணையற்ற மற்றும் பாதுகாப்பான இடத்தை தேர்வு செய்து விண்ணப்பிக்குமாறும், விபத்தில்லாத மகிழ்ச்சியான தீபாவளிப் பண்டிகையை கொண்டாடிட ஒத்துழைப்பு தருமாறு தமிழக அரசு கேட்டுக்கொண்டுள்ளது.