நெல்லை மக்களே ரெடியா? பொருநை மியூசியம்: டிக்கெட் விலை முதல் டைமிங் வரை.. நீங்கள் தெரிந்து கொள்ள வேண்டியவை இதோ!

Porunai Museum நெல்லை பொருநை அருங்காட்சியகம் டிசம்பர் 23 முதல் திறக்கப்படுகிறது. நுழைவுக்கட்டணம், நேரம் மற்றும் பேருந்து வசதி குறித்த முழு விபரங்களை இங்கே காணலாம்.

Image Credit : Gemini

Porunai Museum பொருநை நாகரிகத்தின் பெருமை

திருநெல்வேலி சீமைக்கும், பழைமை வாய்ந்த பொருநை நாகரிகத்திற்கும் மேலும் புகழ் சேர்க்கும் வகையில், நெல்லையில் பிரம்மாண்டமாக அமைக்கப்பட்டுள்ள 'பொருநை அருங்காட்சியகம்' பொதுமக்களின் பார்வைக்காகத் திறக்கப்படவுள்ளது. சுமார் ரூ.67.25 கோடி மதிப்பீட்டில் கட்டப்பட்டுள்ள இந்த நவீன அருங்காட்சியகத்தை, தமிழக முதல்வர் மு.க.ஸ்டாலின் அவர்கள் சனிக்கிழமை இரவு மின்னொளியில் மிளிர்ந்த விழாவில் திறந்து வைத்தார். மேலும், அருங்காட்சியக வளாகத்தில் வன்னி மரக்கன்றையும் நட்டு வைத்தார்.

எங்கு அமைந்துள்ளது?

திருநெல்வேலி மாவட்டம், பாளையங்கோட்டையை அடுத்த ரெட்டியார்பட்டி மலைப்பகுதியில் இந்த அருங்காட்சியகம் அமைந்துள்ளது. சுமார் 13 ஏக்கர் பரப்பளவில், 54,296 சதுர அடி விஸ்தீரணத்தில் இது பிரம்மாண்டமாக அமைக்கப்பட்டுள்ளது. முதல்வர் திறந்து வைத்ததைத் தொடர்ந்து, அறிமுக கூடத்தை பார்வையிட்ட அவருக்கு, அங்கு காட்சிப்படுத்தப்பட்டுள்ள தொல்பொருள்கள் குறித்து அமைச்சர் தங்கம் தென்னரசு விளக்கமளித்தார்.

Image Credit : X/@mkstalin

பொதுமக்கள் பார்வைக்கு அனுமதி எப்போது?

அருங்காட்சியகம் திறக்கப்பட்டாலும், பொதுமக்களின் வருகைக்காக செவ்வாய்க்கிழமை (டிசம்பர் 23) முதல் அனுமதி வழங்கப்படும் என்று அறிவிக்கப்பட்டுள்ளது. இது குறித்து நெல்லை மாவட்ட ஆட்சியர் இரா. சுகுமார் கூறுகையில், பொதுமக்கள் அருங்காட்சியகத்தை எளிதாக வந்து பார்வையிடும் வகையில், அரசுப் போக்குவரத்துக் கழகத்தின் சார்பில் சிறப்புப் பேருந்துகள் இயக்கப்படும் என்றும் தெரிவித்துள்ளார்.

Image Credit : Google

செயல்படும் நேரம் என்ன?

பொருநை அருங்காட்சியகத்தை பார்வையிட வரும் சுற்றுலாப் பயணிகள் மற்றும் பொதுமக்களுக்காக நேரக் கட்டுப்பாடுகள் அறிவிக்கப்பட்டுள்ளன. அதன்படி, இந்த அருங்காட்சியகம் காலை 10 மணி முதல் இரவு 7 மணி வரை செயல்படும். வார இறுதி நாட்களிலும் இதே நேரத்தில் பொதுமக்கள் அனுமதிக்கப்படுவார்கள்.

Image Credit : Gemini

நுழைவுக்கட்டணம் மற்றும் 5டி தியேட்டர் விலை

அருங்காட்சியகத்தை பார்வையிட வருபவர்களுக்கான கட்டண விபரங்கள் பின்வருமாறு நிர்ணயிக்கப்பட்டுள்ளன:

• பெரியவர்கள்: ரூ.30

• சிறியவர்கள்: ரூ.10

• பள்ளி மாணவர்கள்: ரூ.5

• வெளிநாட்டினர்: ரூ.50

• 5டி (5D) திரையரங்கம்: ரூ.25 (தனிக் கட்டணம்)

பள்ளி மாணவர்களுக்கு மிகக்குறைந்த கட்டணம் நிர்ணயிக்கப்பட்டுள்ளதால், மாணவர்களின் வருகை அதிகரிக்கும் என எதிர்பார்க்கப்படுகிறது.