Snake wine: விஷப்பாம்பை பாட்டிலில் போட்டு மதுபானமா? 2,000 ஆண்டு பழமையான வினோத பானம்... குடிச்சா என்ன ஆகும்?

Snake wine: பாட்டிலுக்குள் முழு பாம்பு இருக்கும் வினோத 'ஸ்னேக் ஒயின்'! 2,000 ஆண்டு வரலாறு, விஷம் நீங்கும் முறை மற்றும் மருத்துவ பின்னணி முழு விவரம்!

Image Credit : x

பாட்டிலுக்குள் முழு பாம்பு வினோத ‘ஸ்னேக் ஒயின்’

உலகம் முழுவதும் பலவிதமான மதுபானங்கள் விற்பனை செய்யப்பட்டு வருகின்றன. அவற்றுள் சில பானங்கள் நாம் கற்பனை செய்துகூடப் பார்க்க முடியாத அளவிற்கு வினோதமானதாகவும், அதிக விலை மதிப்பு கொண்டதாகவும் விளங்குகின்றன. குறிப்பாக, தென்கிழக்கு ஆசிய நாடுகளின் பரபரப்பான இரவுச் சந்தைகளில் விற்பனைக்கு வைக்கப்படும் மதுபானங்களில் மிகவும் பிரபலமானது ‘பாம்பு மது’ (Snake Wine).

தெளிவான கண்ணாடி ஜாடிகளில், மதுபானத்திற்குள் முழுமையாக ஊறவைக்கப்பட்ட சுருண்ட விரியன் பாம்புகள் காணப்படுவது கேட்பதற்கே அரிய காட்சியாகவும், இந்த மதுவின் தனித்துவமான அடையாளமாகவும் திகழ்கிறது. சுமார் 2,000 ஆண்டுகளுக்கும் மேலான வரலாற்றைக் கொண்ட இந்த வினோதமான பானம் குறித்த விரிவான தகவல்கள்;

Image Credit : x

Snake Wine என்றால் என்ன?

‘ஸ்னேக் ஒயின்’ என்பது அதன் தனித்துவமான தோற்றத்திற்குப் பெயர் பெற்ற ஒரு பாரம்பரிய மதுபானமாகும். தெளிவான ஆல்கஹால் நிரப்பப்பட்ட பாட்டிலுக்குள் ஒரு முழுப் பாம்பு சுருண்டு வைக்கப்பட்டிருப்பது இதன் சிறப்பம்சமாகும். இதன் வரலாறு 2,000 ஆண்டுகளுக்கு முன்பிருந்த சீனாவின் 'மேற்கு ஜோ' (Western Zhou) வம்ச காலகட்டத்தைச் சேர்ந்தது. பண்டைய சீனாவில் அரச குடும்பத்தினருக்கான மருத்துவத் தீர்வாகத் தொடங்கிய இது, தற்போது நாட்டுப்புற மருத்துவம் மற்றும் விருந்தோம்பலின் அடையாளமாக மாறியுள்ளது. இந்தியாவில் இந்த மதுபானம் கிடைப்பதில்லை என்றாலும், வியட்நாம், லாவோஸ், தாய்லாந்து மற்றும் தென் சீனா முழுவதும் பரவலாகக் கிடைக்கிறது.

Image Credit : x

எவ்வாறு தயாரிக்கப்படுகிறது? விஷம் தாக்காதா?

மிக கடுமையான (ஸ்ட்ராங்கான) அரிசி மது அல்லது தானிய ஆல்கஹால் நிரம்பிய ஜாடியில் முழுப் பாம்பைப் போட்டு உற்பத்தியாளர்கள் இதனை தயாரிக்கின்றனர். பெரும்பாலும் இதனுடன் தேள்கள், ஜின்செங் அல்லது உள்ளூர் மூலிகைகளும் கூடுதலாக சேர்க்கப்படுகின்றன. பாம்பு இந்த ஆல்கஹால் பாட்டிலில் பல மாதங்கள் வரை ஊறவைக்கப்படுகிறது. ஆல்கஹாலில் உள்ள எத்தனால், பாம்பின் நச்சுப் புரதங்களை முழுமையாகச் சிதைத்து அதன் விஷத்தன்மையைச் செயலிழக்கச் செய்கிறது. இதன் காரணமாகவே, பாம்பின் விஷம் நீங்கி இந்த ஆல்கஹால் குடிப்பதற்குப் பாதுகாப்பானதாக மாறுகிறது.

Image Credit : x

பாரம்பரிய மருத்துவம் & நாட்டுப்புற நம்பிக்கைகள்

பாரம்பரிய சீன மருத்துவமே இந்த மதுபானம் இன்றும் பிரபலமாக இருப்பதற்கு முதன்மைக் காரணமாகும். மூலிகை மருத்துவக் குணம்: சீன மூலிகை மருத்துவர்கள் பாம்பை உடலுக்கு வெப்பத்தை அளிக்கும் மற்றும் உடலில் உள்ள தேவையற்ற ஈரப்பதத்தை வெளியேற்றும் ஆற்றல் மிக்க மூலப்பொருளாகக் கருதுகின்றனர். வலிகளுக்குத் தீர்வு: மூட்டு இறுக்கத்தைக் குறைக்கவும், மூட்டுவலிக்குத் தீர்வு காணவும், இரத்த ஓட்டத்தை அதிகரிக்கவும், உடற்சோர்வைப் போக்கவும் மக்கள் இந்த மதுவை அருந்துகின்றனர்.

பாம்புகள் இயற்கையான உடல் ஆற்றல் மற்றும் சகிப்புத்தன்மையின் அடையாளமாகக் கருதப்படுவதால், இந்த மதுவை அருந்துவோருக்கு அந்த ஆற்றல் கிடைக்கும் என்றும், குறிப்பாக ஆண்களின் பாலியல் ஆற்றலை அதிகரிக்கும் டானிக்காகச் செயல்படும் என்றும் நாட்டுப்புற ரீதியாக நம்பப்படுகிறது.

Image Credit : x

கலாச்சார முக்கியத்துவம் மற்றும் நினைவுப் பொருள்

மருத்துவப் பயன்பாடுகளைத் தாண்டி, தென்கிழக்கு ஆசியப் பகுதிகளில் இது ஒரு மரியாதைக்குரிய விருந்தோம்பல் அடையாளமாக விளங்குகிறது. கிராமப்புறங்களில் தங்கள் வீடுகளுக்கு வரும் விருந்தினர்களை வரவேற்கும் குடும்பங்கள், தங்களின் உபசரிப்பை வெளிப்படுத்தும் விதமாக அவர்களுக்கு ஒரு கிளாஸ் பாம்பு மதுவை வழங்குவதை வழக்கமாகக் கொண்டுள்ளன.

அதே நேரத்தில், அப்பகுதிகளுக்குச் சுற்றுலா வரும் பயணிகள் தாங்கள் சென்ற இடத்தின் நினைவாக ஒரு வித்தியாசமான நினைவுப் பொருளை (Souvenir) வாங்கிச் செல்வதற்காக, இரவுச் சந்தைகளில் சிறிய மற்றும் விலை மலிவான பாட்டில்களிலும் இந்த ஸ்னேக் ஒயின் விற்பனை செய்யப்படுகிறது.