எகிறும் ஏடிஎம் கட்டணம்.. இன்று முதல் உங்கள் பாக்கெட்டை பதம் பார்க்கும் புதிய மாற்றங்கள்!
வங்கிக் கணக்கில் பணம் வைத்திருப்பவர்களுக்கு ஒரு அதிர்ச்சியான செய்தி வெளியாகியுள்ளது. வங்கிகளின் ஏடிஎம் (ATM) பரிவர்த்தனை கட்டணங்கள் மற்றும் சில சேவைக் கட்டணங்கள் இன்று முதல் உயர்த்தப்பட்டுள்ளன. இது குறித்த விரிவான தகவல்கள் இதோ:
புதிய நிதியாண்டு
இன்று புதிய நிதியாண்டு April 01 பிறந்துள்ள நிலையில், இந்தியாவில் வருமான வரி, வங்கி விதிமுறைகள் மற்றும் அத்தியாவசியப் பொருட்களின் விலையில் முக்கியமான மாற்றங்கள் அமலுக்கு வந்துள்ளன. இவை சாமானிய மக்கள் முதல் வணிகர்கள் வரை அனைவரது அன்றாட வாழ்விலும் தாக்கத்தை ஏற்படுத்தும் வகையில் அமைந்துள்ளன.
Income Tax New Rules
சுமார் 60 ஆண்டுகளுக்குப் பிறகு, 1961-ஆம் ஆண்டு வருமான வரிச் சட்டத்திற்குப் பதிலாக, புதிய 'வருமான வரிச் சட்டம் 2025' இன்று முதல் நடைமுறைக்கு வருகிறது. இது வரி செலுத்தும் முறையை எளிமையாக்குவதையும், டிஜிட்டல் மயமாக்குவதையும் நோக்கமாக கொண்டுள்ளது. பழைய மற்றும் புதிய வரி விகிதங்களில் மாற்றங்கள் இல்லை என்றாலும், HRA (வீட்டு வாடகை படி) வரி விலக்கு சலுகை விரிவுபடுத்தப்பட்டுள்ளது. இதுவரை சென்னை, மும்பை போன்ற பெருநகரங்களுக்கு மட்டுமே வழங்கப்பட்டு வந்த 50% வரி விலக்கு, இன்று முதல் பெங்களூரு, ஹைதராபாத், புனே மற்றும் அகமதாபாத் போன்ற வளர்ந்து வரும் நகரங்களுக்கும் நீட்டிக்கப்பட்டுள்ளது.
கேஸ் சிலிண்டர் விலை
வணிக ரீதியான பயன்பாட்டிற்கான 19 கிலோ கேஸ் சிலிண்டர் விலை இன்று முதல் ₹195.50 உயர்ந்துள்ளது. இதனால் உணவகங்கள் மற்றும் சிறு வணிகங்கள் கூடுதல் செலவைச் சந்திக்க நேரிடும். இருப்பினும், வீட்டு உபயோக சிலிண்டர் விலையில் மாற்றமில்லை.
HDFC Bank
வங்கித் துறையில், HDFC வங்கி இன்று முதல் புதிய கட்டண முறையை அமல்படுத்துகிறது. ஏடிஎம்களில் யுபிஐ மூலம் பணம் எடுக்கும்போது, 5 இலவசப் பரிவர்த்தனைகளுக்குப் பிறகு ஒவ்வொரு முறைக்கும் ₹23 கட்டணம் வசூலிக்கப்படும். மேலும், எஸ்பிஐ (SBI) கிரெடிட் கார்டு பயனர்களுக்கான ரிவார்டு பாயிண்ட் விதிகளிலும் மாற்றங்கள் செய்யப்பட்டுள்ளன.
இரண்டு அடுக்கு பாதுகாப்பு முறை
டிஜிட்டல் பணப்பரிமாற்றங்களில் அதிகரித்து வரும் மோசடிகளைக் குறைக்க, இன்று முதல் இரண்டு அடுக்கு பாதுகாப்பு முறை கட்டாயமாக்கப்பட்டுள்ளது. இனி ஒவ்வொரு ஆன்லைன் பரிமாற்றத்திற்கும் OTP அல்லது பயோமெட்ரிக் உறுதிப்படுத்தல் தேவைப்படும்.
ஃபாஸ்டேக் வருடாந்திர பாஸ் கட்டணம்
தேசிய நெடுஞ்சாலைகளில் பயணிக்க பயன்படும் ஃபாஸ்டேக் வருடாந்திர பாஸ் கட்டணம் ₹3,000-லிருந்து ₹3,075-ஆக உயர்த்தப்பட்டுள்ளது. இன்று முதல் அமலுக்கு வந்துள்ள இந்த மாற்றங்கள் உங்கள் பட்ஜெட் மற்றும் பணப்பரிமாற்றங்களில் பிரதிபலிக்கும் என்பதால், அதற்கேற்பத் திட்டமிடுவது அவசியம்.