Free Prasadam: நவம்பர் 7 முதல் இலவச திருப்பதி லட்டு, வடை! யாருக்கெல்லாம் கிடைக்கும்?
Free Prasadam: திருப்பதி லட்டு, வடை பிரசாதம் இலவசமாகக் கிடைக்குமா? ஆம். ஸ்ரீவாரி லட்டு மற்றும் வடை பிரசாதம் இலவசமாக வழங்கப்பட உள்ளது. அது யாருக்கு, எவ்வளவு என்பதை பார்க்கலாம்.
இலவச லட்டு விநியோகம்
திருப்பதி ஏழுமலையான் கோயிலின் வருடாந்திர பிரம்மோற்சவ விழா கோலாகலமாக நிறைவடைந்துள்ளது. இதனைத் தொடர்ந்து, திருப்பதி திருமலை தேவஸ்தானம் பல ஆண்டுகளாகப் பணியாற்றி ஓய்வுபெற்ற தனது ஊழியர்களுக்கும் குடும்ப ஓய்வூதியதாரர்களுக்கும் மகிழ்ச்சியான அறிவிப்பை வெளியிட்டுள்ளது. ஒவ்வொரு ஆண்டும் பின்பற்றப்படும் வழக்கத்தின்படி, இந்த ஆண்டும் ஸ்ரீவாரி பிரசாதங்கள் இலவசமாக வழங்கப்பட உள்ளன. அதன்படி, நவம்பர் 7 முதல் நவம்பர் 20-ம் தேதி வரை தகுதியுள்ள ஓய்வூதியதாரர்களுக்கு லட்டு மற்றும் வடை பிரசாதம் வழங்கப்படும். ஒவ்வொரு பயனாளிக்கும் ஒரு பெரிய லட்டு மற்றும் வடை பிரசாதம் வழங்க ஏற்பாடு செய்யப்பட்டுள்ளது. இதற்காகத் திருப்பதி தேவஸ்தான நிர்வாக வளாகத்தில் சிறப்பு ஏற்பாடுகள் செய்யப்பட்டுள்ளன. முதியவர்கள் நீண்ட நேரம் காத்திருக்க வேண்டிய நிலை ஏற்படாமல் இருக்க, ஓய்வூதிய ஆணை எண் அடிப்படையில் பிரசாதம் பெறுவதற்கான நாட்களும் பிரிக்கப்பட்டுள்ளன.
எங்கு, எத்தனை மணிக்கு பிரசாதம் கிடைக்கும்?
பிரசாத விநியோகம் திருப்பதியில் கே.டி. சாலையில் உள்ள தேவஸ்தான நிர்வாக வளாகத்தில் நடைபெறும். ஊழியர்கள் உணவகத்திற்கு அருகில் அமைந்துள்ள புதிய ஜபாலி கட்டடத்தில் இதற்கான கவுன்டர்கள் செயல்படும். அறிவிக்கப்பட்ட நாட்களில் தினமும் காலை 10.30 மணி முதல் மாலை 5 மணி வரை பிரசாதம் வழங்கப்படும். திருப்பதி மட்டுமின்றி பிற பகுதிகளில் இருந்து வரும் ஓய்வுபெற்ற ஊழியர்களும் சிரமமின்றி பிரசாதம் பெறும் வகையில் இந்த ஏற்பாடு செய்யப்பட்டுள்ளது. மேலும், வயதானவர்கள் மற்றும் உடல்நலப் பிரச்சினை உள்ளவர்கள் நீண்ட நேரம் சிரமப்படுவதைத் தவிர்க்க குடிநீர் வசதி, காத்திருப்புக் கூடங்கள் உள்ளிட்ட அடிப்படை வசதிகளும் செய்யப்பட்டுள்ளதாகத் தெரிவிக்கப்பட்டுள்ளது.
ஓய்வூதிய எண் அடிப்படையில் தேதி ஒதுக்கீடு
ஒரே நாளில் அதிகமானோர் கூடுவதைத் தவிர்க்க, ஓய்வூதிய ஆணை எண் அடிப்படையில் தேதிகள் ஒதுக்கப்பட்டுள்ளன. நவம்பர் 7-ம் தேதி 164 முதல் 3,250 வரையிலான எண்களைக் கொண்டவர்கள் பிரசாதம் பெறலாம். நவம்பர் 9 முதல் 13 வரை 3,251 முதல் 9,050 வரையிலான எண்களைக் கொண்டவர்களுக்கு அனுமதி வழங்கப்பட்டுள்ளது. நவம்பர் 16 முதல் 19 வரை 9,051 முதல் 12,550 வரையிலான எண்களைக் கொண்டவர்கள் பிரசாதம் பெற்றுக்கொள்ளலாம். நவம்பர் 20-ம் தேதி 12,551 மற்றும் அதற்கு மேற்பட்ட எண்களைக் கொண்ட மற்ற அனைவருக்கும் பிரசாதம் வழங்கப்படும். எனவே, ஓய்வூதியதாரர்கள் தங்களுக்கான எண்ணைச் சரிபார்த்து, ஒதுக்கப்பட்ட நாளில் மட்டும் வருமாறு தேவஸ்தானம் கேட்டுக்கொண்டுள்ளது.
ஸ்மார்ட் கார்டு கட்டாயம்: தேவஸ்தானம் அறிவுறுத்தல்
பிரசாதம் பெற விரும்பும் ஓய்வுபெற்ற ஊழியர்கள் மற்றும் குடும்ப ஓய்வூதியதாரர்கள் தங்களது அசல் ஸ்மார்ட் கார்டைக் கட்டாயம் எடுத்துச் செல்ல வேண்டும். அடையாளத்தை உறுதிப்படுத்தும் வகையில் கவுன்டரில் இந்த அட்டை சரிபார்க்கப்படும். அசல் அட்டை இல்லாமல் பிரசாதம் பெறுவதில் சிக்கல் ஏற்படலாம் என்பதால், முன்கூட்டியே அதைத் தயாராக வைத்துக்கொள்ள வேண்டும். மேலும், ஒதுக்கப்பட்ட தேதியைப் பின்பற்றுவதுடன், விநியோக மையத்தில் ஒழுங்கைக் கடைப்பிடிக்க வேண்டும் என்றும் தேவஸ்தான நிர்வாகம் கேட்டுக்கொண்டுள்ளது. இந்த இலவச பிரசாத விநியோகம் நவம்பர் 20-ம் தேதி வரை நடைபெற உள்ளது.
