ஆரம்பித்து வச்ச விராட் கோலி, ரிஷப் பண்ட், துபே: ஆட்டம் காட்டிய ஹர்திக் பாண்டியா – இந்தியா 196 ரன்கள் குவிப்பு!

வங்கதேச அணிக்கு எதிரான டி20 உலகக் கோப்பை தொடரின் சூப்பர் 8 சுற்று போட்டியில் முதலில் பேட்டிங் செய்த இந்திய அணியானது 20 ஓவர்களில் 5 விக்கெட்டுகளை இழந்து 196 ரன்கள் குவித்துள்ளது.

IND vs BAN, T20 World Cup 2024

இந்தியா மற்றும் வங்கதேச அணிக்கு இடையிலான டி20 உலகக் கோப்பை தொடரின் சூப்பர் 8 சுற்று போட்டி தற்போது ஆண்டிகுவாவில் நடைபெற்று வருகிறது. இதில் டாஸ் வென்ற வங்கதேச கேப்டன் நஜ்முல் ஹூசைன் ஷாண்டோ பவுலிங் தேர்வு செய்தார். வங்கதேச அணியில் தஸ்கின் அகமது நீக்கப்பட்டு அவருக்குப் பதிலாக ஜாக்கெர் அலி அணியில் இடம் பெற்றுள்ளார்.

ஆனால், இந்திய அணியில் எந்த மாற்றமும் செய்யப்படவில்லை. இந்திய அணியில் ரோகித் சர்மா மற்றும் விராட் கோலி இருவரும் தொடக்க வீரர்களாக களமிறங்கினர். இதில், ரோகித் சர்மா ஆரம்பம் முதலே அதிரடி காட்டினார். 11 பந்துகளில் 3 பவுண்டரி, ஒரு சிக்ஸர் உள்பட 23 ரன்கள் எடுத்த ரோகித் சர்மா ஷாகிப் அல் ஹசன் பந்தில் ஜாக்கெர் அலியிடம் கேட்ச் கொடுத்து ஆட்டமிழந்தார்.

இவரைத் தொடர்ந்து ஆக்ரோஷமாக விளையாடி வந்த விராட் கோலி 28 பந்துகளில் ஒரு பவுண்டரி, 3 சிக்ஸர் உள்பட 37 ரன்கள் எடுத்து தன்ஷிம் ஹசன் ஷாகிப் பந்தில் கிளீன் போல்டானார். அடுத்து வந்த சூர்யகுமார் யாதவ் முதல் பந்திலேயே சிக்ஸர் பறக்கவிட்ட நிலையில் 2ஆவது பந்தில் கேட்ச் கொடுத்து வெளியேறினார்.

இவரைத் தொடர்ந்து சிக்ஸரும், பவுண்டரியுமாக விளாசி வந்த ரிஷப் பண்ட் 24 பந்துகளில் 4 பவுண்டரி, 2 சிக்ஸர் உள்பட 36 ரன்கள் எடுத்து ஆட்டமிழந்தார். ஷிவம் துபே மற்றும் ஹர்திக் பாண்டியா இருவரும் இணைந்து ஓரளவு ரன்கள் குவித்தனர். எனினும் துபே 24 பந்துகளில் 3 சிக்ஸர்கள் உள்பட 34 ரன்களில் ஆட்டமிழந்தார்.

கடைசி வரை அதிரடியாக விளையாடிய இந்திய அணியின் துணை கேப்டன் ஹர்திக் பாண்டியா 27 பந்துகளில் 4 பவுண்டரி, 3 சிக்ஸர் உள்பட கடைசி பந்தில் பவுண்டரி அடித்து அரைசதம் அடிக்கவே இந்தியா 20 ஓவர்களில் 5 விக்கெட்டுகளை இழந்து 196 ரன்கள் குவித்துள்ளது.

பவுலிங்கைப் பொறுத்த வரையில் வங்கதேச அணியில் தன்ஷிம் ஹசன் ஷாகிப் மற்றும் ரிஷாத் ஹூசைன் இருவரும் தலா 2 விக்கெட்டுகள் கைப்பற்றினர். இதே போன்று ஷாகிப் அல் ஹசன் ஒரு விக்கெட் எடுத்தார்.

இந்தப் போட்டியில் இந்திய அணி 196 ரன்கள் எடுத்ததன் மூலமாக டி20 உலகக் கோப்பை தொடரில் 3ஆவது முறையாக அதிகபட்ச ரன்கள் எடுத்துள்ளது.

மேலும், இந்த போட்டியில் இந்திய அணி சார்பில் 13 சிக்ஸர்கள் அடிக்கப்பட்டுள்ளது. இதற்கு முன்னதாக கடந்த 2007 ஆம் ஆண்டு உலகக் கோப்பை தொடரில் இங்கிலாந்து அணிக்கு எதிராக 11 சிக்ஸர்கள் அடித்திருந்தனர் என்பது குறிப்பிடத்தக்கது.

India vs Bangladesh, 47th Match, Super 8 Group 1

இந்தப் போட்டியில் விராட் கோலி 37 ரன்கள் எடுத்ததன் மூலமாக ஒரு நாள் மற்றும் டி20 உலகக் கோப்பை கிரிக்கெட்டில் 67 இன்னிங்ஸில் 3002 ரன்களை கடந்து விராட் கோலி சாதனை படைத்துள்ளார்.

விராட் கோலியைத் தொடர்ந்து

2637 ரன்கள் – ரோகித் சர்மா (69 இன்னிங்ஸ்)

2502 – டெவிட் வார்னர் (68 இன்னிங்ஸ்)

2278 – சச்சின் டெண்டுல்கர் (44 இன்னிங்ஸ்)

2193 – குமார் சங்கக்காரா (65 இன்னிங்ஸ்)