12ஆம் வகுப்பு படித்தவர்களுக்கு ரூ.63,200 வரை சம்பளம்! உடனே விண்ணப்பிங்க!
மத்திய அரசுப் பணியில் சேர வேண்டும் என்று காத்திருப்பவர்களுக்கு ஒரு புதிய வாய்ப்பு வெளியாகியுள்ளது. 10ஆம் வகுப்பு, 12ஆம் வகுப்பு படித்தவர்களுக்கான பணியிடங்களுடன் இந்திய கடலோர காவல்படை ஆட்சேர்ப்பு அறிவிப்பை வெளியிட்டுள்ளது.
இந்திய கடலோர காவல்படையில் புதிய வேலைவாய்ப்பு
மத்திய அரசு வேலைக்காகக் காத்திருக்கும் இளைஞர்களுக்கு இந்திய கடலோர காவல்படை புதிய வாய்ப்பை அறிவித்துள்ளது. ஸ்டோர் கீப்பர் கிரேடு-2, என்ஜின் டிரைவர், லாஸ்கர், சிவிலியன் மோட்டார் டிரான்ஸ்போர்ட் டிரைவர் மற்றும் எம்டிஎஸ் உள்ளிட்ட 5 குரூப் சி பணியிடங்கள் நிரப்பப்பட உள்ளன. இதற்கான அறிவிப்பு எண் RCR/O/CGRHQ(AE). மொத்தம் 5 காலியிடங்கள் உள்ளன. சென்னை, மண்டபம், ராமநாதபுரம், விசாகப்பட்டினம், தூத்துக்குடி ஆகிய இடங்களில் பணியிடங்கள் அமைந்துள்ளன. தகுதியானவர்கள் ஆஃப்லைன் முறையில் விண்ணப்பிக்கலாம்.
என்னென்ன பணியிடங்கள்? கல்வித் தகுதி என்ன?
ஸ்டோர் கீப்பர் கிரேடு-2 பணிக்கு 12ஆம் வகுப்பு தேர்ச்சியுடன் ஒரு வருடப் பணி அனுபவம் அவசியம். என்ஜின் டிரைவர் பணிக்கு 10ஆம் வகுப்பு தேர்ச்சியுடன் அங்கீகரிக்கப்பட்ட நிறுவனத்தின் என்ஜின் டிரைவர் சான்றிதழ் தேவை. லாஸ்கர் பணிக்கு 10ஆம் வகுப்பு தேர்ச்சியுடன் படகில் மூன்று வருட அனுபவம் வேண்டும். சிவிலியன் மோட்டார் டிரான்ஸ்போர்ட் டிரைவர் பணிக்கு 10ஆம் வகுப்பு தேர்ச்சி, இலகு மற்றும் கனரக வாகன ஓட்டுநர் உரிமம், இரண்டு வருட அனுபவம் அவசியம். எம்டிஎஸ் பணிக்கு 10ஆம் வகுப்பு தேர்ச்சியுடன் இயந்திரப் பட்டறையில் இரண்டு வருட அனுபவம் தேவை.
சம்பளம் எவ்வளவு? வயது வரம்பு என்ன?
பணியிடங்களைப் பொறுத்து மாதச் சம்பளம் நிர்ணயிக்கப்பட்டுள்ளது. ஸ்டோர் கீப்பர் மற்றும் மோட்டார் டிரைவர் பணிகளுக்கு ரூ.19,900 முதல் ரூ.63,200 வரையும், என்ஜின் டிரைவர் பணிக்கு ரூ.25,500 முதல் ரூ.81,100 வரையும் ஊதிய விகிதம் வழங்கப்படுகிறது. லாஸ்கர் மற்றும் எம்டிஎஸ் பணிகளுக்கு ரூ.18,000 முதல் ரூ.56,900 வரை ஊதிய விகிதம் உள்ளது. வயது வரம்பு பணியைப் பொறுத்து 18 முதல் 25, 27 அல்லது 30 வயது வரை நிர்ணயிக்கப்பட்டுள்ளது. எஸ்சி, எஸ்டி பிரிவினருக்கு 5 ஆண்டுகள், ஓபிசி பிரிவினருக்கு 3 ஆண்டுகள் வயது தளர்வு வழங்கப்படுகிறது.
தேர்வு முறை மற்றும் விண்ணப்பிக்கும் வழிமுறை
விண்ணப்பதாரர்கள் முதலில் தகுதியின் அடிப்படையில் பட்டியலிடப்படுவார்கள். தொடர்ந்து எழுத்துத் தேர்வு மற்றும் சான்றிதழ் சரிபார்ப்பு நடைபெறும். விண்ணப்பப் படிவத்தை இந்திய கடலோர காவல்படையின் அதிகாரப்பூர்வ இணையதளத்தில் பதிவிறக்கம் செய்து, தேவையான சான்றிதழ்களின் சுயசான்றொப்பமிட்ட நகல்களையும் புகைப்படத்தையும் இணைக்க வேண்டும். பூர்த்தி செய்த விண்ணப்பத்தை சாதாரண அஞ்சல் மூலம் The Commander, Coast Guard Region (East), Near Napier Bridge, Fort St George (PO), Chennai - 600009 என்ற முகவரிக்கு அனுப்ப வேண்டும். விண்ணப்பிக்கும் பணியின் பெயர் மற்றும் இடஒதுக்கீட்டுப் பிரிவை உறையின் மீது தெளிவாகக் குறிப்பிட வேண்டும்.
விண்ணப்பிக்க கடைசி தேதி எப்போது?
இந்த ஆட்சேர்ப்புக்கான விண்ணப்பங்கள் 2026 நவம்பர் 7ஆம் தேதி முதல் பெறப்படுகின்றன. பூர்த்தி செய்யப்பட்ட விண்ணப்பங்கள் சென்றடைய வேண்டிய கடைசி நாள் டிசம்பர் 21, 2026. எனவே விருப்பமுள்ளவர்கள் கடைசி நேரம் வரை காத்திருக்காமல் கல்விச் சான்றிதழ்கள், அனுபவச் சான்றிதழ்கள், சாதிச் சான்றிதழ் மற்றும் ஓட்டுநர் உரிமம் உள்ளிட்ட தேவையான ஆவணங்களைத் தயாராக வைத்துக்கொள்ள வேண்டும். விண்ணப்பிக்கும் முன்பு அதிகாரப்பூர்வ அறிவிப்பில் குறிப்பிடப்பட்டுள்ள தகுதிகள், வயது வரம்பு மற்றும் பணியிட விவரங்களை முழுமையாகச் சரிபார்ப்பது அவசியம்.
