"படிக்கிறது ஒரு IIT-ல.. டிகிரி வாங்குறது வேறொரு IIT-ல!" - மத்திய அரசின் மாஸ் பிளான்!
IIT ஐஐடி மாணவர்கள் இனி 23 வளாகங்களிலும் படிக்கலாம்! கிரெடிட் டிரான்ஸ்பர் மற்றும் மாணவர் பரிமாற்றத் திட்டம் குறித்த முழு விவரங்கள் உள்ளே.- மத்திய அரசின் மாஸ் பிளான்!
IIT
இந்தியாவின் உயர்கல்வித் துறையில் ஒரு மிகப்பெரிய மைல்கல்லாக, இந்திய தொழில்நுட்பக் கழகங்கள் (IIT) தங்களுக்குள் மாணவர் பரிமாற்றத் திட்டத்தை (Student Exchange Plan) அறிமுகப்படுத்தத் திட்டமிட்டுள்ளன. இதன் மூலம் ஒரு ஐஐடியில் பயிலும் மாணவர், மற்றொரு ஐஐடி வளாகத்திற்குச் சென்று குறிப்பிட்ட காலம் தங்கிப் படிக்கும் வாய்ப்பு உருவாகியுள்ளது.
23 கேம்பஸ்கள்.. ஒரே கல்வி குடும்பம்!
தற்போது இந்தியாவில் மொத்தம் 23 ஐஐடி வளாகங்கள் உள்ளன. இதுவரை ஒவ்வொரு ஐஐடியும் தனித்தனி நிர்வாகத்தின் கீழ் செயல்பட்டு வந்த நிலையில், இனி மாணவர்கள் தங்களுக்குத் தேவையான பாடப்பிரிவுகளை (Electives) எந்த ஐஐடியில் வேண்டுமானாலும் தேர்வு செய்து படிக்கும் வகையில் 'கிரெடிட் டிரான்ஸ்பர்' (Credit Transfer) முறை அமல்படுத்தப்பட உள்ளது. இதற்கான பரிந்துரையை ஐஐடி கவுன்சில் வழங்கியுள்ளது.
யாருக்கெல்லாம் இந்த வாய்ப்பு?
முதற்கட்டமாக, மொத்த இளங்கலை மாணவர்களில் சுமார் 5 சதவீதம் பேரை இந்த பரிமாற்றத் திட்டத்தின் கீழ் கொண்டு வர இலக்கு நிர்ணயிக்கப்பட்டுள்ளது. இதற்கான வழிகாட்டு நெறிமுறைகளை ஐஐடி மெட்ராஸ் (IIT Madras) தலைமையிலான குழு வடிவமைத்து வருகிறது. ஒவ்வொரு ஐஐடி செனட் சபையிலும் ஒப்புதல் பெற்ற பிறகு இது அதிகாரப்பூர்வமாக நடைமுறைக்கு வரும்.
விளையாட்டு மற்றும் கலை ஆர்வலர்களுக்கு முன்னுரிமை
இந்தத் திட்டத்தின் கீழ், விளையாட்டு மற்றும் கலைத் துறையில் சிறந்து விளங்கும் மாணவர்களுக்குச் சிறப்புச் சலுகைகள் உண்டு. உதாரணமாக, ஒரு மாணவர் டெல்லி ஐஐடியில் சிறந்த விளையாட்டுப் பயிற்சி வசதி இருப்பதாகக் கருதினால், அவர் அங்கு ஒரு செமஸ்டர் தங்கிப் பயின்றுவிட்டு மீண்டும் தனது தாய் வளாகத்திற்குத் திரும்பலாம். இது மாணவர்களின் பன்முகத் திறமையை வளர்க்க உதவும் என்று ஐஐடி மெட்ராஸ் டீன் பிரதாப் ஹரிதாஸ் தெரிவித்துள்ளார்.
இன்டர்ன்ஷிப் மற்றும் ஸ்டார்ட்-அப் வசதிகள்
ஆறாவது செமஸ்டரில் மாணவர்கள் முழுமையாக இன்டர்ன்ஷிப் (Internship) மேற்கொள்ள வசதியாகப் பாடத்திட்டங்கள் மாற்றியமைக்கப்படுகின்றன. மற்ற ஐஐடிகளில் உள்ள நிபுணத்துவம் வாய்ந்த பேராசிரியர்களின் கீழ் படிக்க விரும்புபவர்களுக்கும், ஸ்டார்ட்-அப் (Start-up) கனவுகளுடன் இருப்பவர்களுக்கும் இந்த இடமாற்ற வசதி ஒரு வரப்பிரசாதமாக அமையும்.
NIT மற்றும் பிற கல்வி நிறுவனங்களுக்கும் விரிவாகிறது
ஐஐடிகளுக்கு இடையே மட்டுமின்றி, என்ஐடி (NIT), ஐஐஐடி (IIIT) போன்ற பிற முன்னணி கல்வி நிறுவனங்களுடன் இந்த கிரெடிட் பகிர்வு முறையை நீட்டிக்கவும் ஐஐடி கவுன்சில் திட்டமிட்டுள்ளது. இதன் மூலம் இந்திய உயர்கல்வித் தரம் உலகத் தரத்திற்கு இணையாக மாறும் என எதிர்பார்க்கப்படுகிறது.
