எல்லா செலவுக்கும் ஒரு லிமிட் இருக்கு! மீறினால் வருமான வரி நோட்டீஸ் வரும்!

நாட்டில் அனைவரும் வருமான வரி விதிகளுக்கு இணங்குவதை உறுதி செய்வதே வருமான வரித்துறையின் வேலை. ஒரு நபர் விதிகளை மீறினால் அல்லது செலவுகளுக்குக் கணக்கு வைத்திருக்கவில்லை என்றால் அவருக்கு வருமான வரி நோட்டீஸ் வரும். விதிகளைப் பின்பற்றத் தவறினால் சாமானியர்களுக்குக்கூட வருமான வரி நோட்டீஸ் வரலாம். எனவே, எந்தெந்த செலவுகள் வருமான வரித் துறையால் கண்காணிக்கப்படுகின்றன என்று தெரிந்துகொள்வது அவசியம்.

பெரிய பரிவர்த்தனைகள்:

வங்கி அல்லது வேறு ஏதேனும் ஒரு ஊடகம் மூலம் அதிக அளவு பணத்தை டெபாசிட் செய்தாலோ அல்லது எடுத்தாலோ, வருமான வரித்துறை அதை விசாரிக்கலாம். இதற்கான அதிகபட்ச வரம்பு ரூ.10 லட்சம். இதற்கு மேல் ரொக்கப் பணத்தை வைத்திருப்பதும் கொடுப்பதும் குற்றமாகும்.

உதாரணம்: யாராவது ரூ.15 லட்சத்தை ரொக்கமாக டெபாசிட் செய்து, அந்தப் பணம் எப்படிக் கிடைத்தது என்று வெளியிடவில்லை என்றால், வருமான வரி நோட்டீஸ் வரலாம்.

கிரெடிட் கார்டின் அதிகப்படியான பயன்பாடு:

நீங்கள் ஒவ்வொரு மாதமும் ஒரு பெரிய கிரெடிட் கார்டு பணம் செலுத்தினால், உங்கள் வருமானம் இந்த செலவுக்கு ஈடானதாக இருக்கிறதா என்பதை வருமான வரித்துறை சரிபார்க்கலாம்.

ரொக்கமாக அதிகபட்சம் ரூ.1 லட்சம் வரையும், டிஜிட்டல் பேமெண்ட் முறையில் அதிகபட்சம் ரூ.10 லட்சம் வரையும் கிரெடிட் கார்டு பில் செலுத்தலாம். இதற்கு மேல் கிரெடிட் கார்டு பில் செலுத்தினால் வருமான வரி நோட்டீஸ் வரக்கூடும்.

வெளிநாட்டு பயண செலவுகள்:

நீங்கள் வெளிநாட்டுப் பயணங்களுக்கு அதிக அளவில் செலவு செய்திருந்தால், உங்கள் வருமானம் அதை ஈடுகட்ட போதுமானதா என்பதை வருமான வரித்துறை அறிய விரும்புகிறது. வெளிநாட்டுப் பயணச் செலவுக்கு அனுமதிக்கப்பட்ட உச்ச வரம்பு ரூ.2 லட்சம். இந்த வரம்புக்கு மேல் செலவு செய்திருந்தால் நோட்டீஸ் வரும்.

உதாரணமாக குடும்பத்துடன் ஐரோப்பாவுக்குச் செல்வதற்காக ரூ.5 லட்சம் செலவு செய்திருந்தால் வருமான வரி அந்தப் பணத்துக்குக் கணக்கு காட்டச் சொல்லிக் கேட்கலாம்.

சொத்து வாங்குதல்:

நீங்கள் விலையுயர்ந்த சொத்தை வாங்கினால், உங்களிடம் உள்ள பணத்தின் ஆதாரம் முறையானதா இல்லையா என்பதை துறை சரிபார்க்கலாம்.

வரம்பு: ₹30 லட்சத்திற்கு மேல் சொத்து வாங்குதல்.

பங்குச்சந்தை முதலீடுகள்:

பங்குச்சந்தையில் பெரிய முதலீடு செய்திருந்தாலோ அல்லது லாபம் சம்பாதித்திருந்தாலோ அதை வருமான வரிக் கணக்கில் காட்டுவது அவசியம். சந்தையில் ரூ.10 லட்சம் அல்லது அதற்கு மேற்பட்ட முதலீட்டுக்கு வருமான வரித்துறை நோட்டீஸ் அனுப்பி விசாரிக்கலாம்.

திருமணங்கள் போன்ற பெரிய நிகழ்வுகளுக்கான செலவுகள்:

திருமணங்கள் அல்லது பிற பெரிய நிகழ்வுகளுக்கு செலவு செய்பவர்களும் ஆய்வுக்கு உட்படுத்தப்படுகிறார்கள். இந்தச் செலவு உங்கள் வருமானத்திற்கு ஏற்ப இல்லாவிட்டால், வருமான வரி நோட்டீஸ் பெறலாம்.

இதற்கு ரூ.5 லட்சம் வரை செலவு செய்ய அனுமதிக்கப்பட்டுள்ளது. அதற்கு மேல் செலவாகும் நிகழ்வுகளுக்கு வருமான வரித்துறையிடம் கணக்கு காட்ட வேண்டியிருக்கும்.

நன்கொடை அளித்தல்:

நீங்கள் ஒரு பெரிய தொகையை ரொக்கமாக நன்கொடையாக அளித்திருந்தால், அது வருமான வரித்துறையால் ஆய்வுக்கு உட்படுத்தப்படலாம். பொதுவாக ரூ.2 லட்சத்திற்கும் அதிகமாக ரொக்கமாக நன்கொடை வழங்கியிருந்தால் வருமான வரித்துறை தலையிட்டு சரிபார்க்கும்.

வருமான வரித்துறையின் விதிகள் அனைவருக்கும் பொருந்தும். சாமானியர்களும் வரி விதிகளைப் பின்பற்றி, தங்களின் வருமானம் மற்றும் செலவுகள் தொடர்பான விவரங்களை சரிவர பராமரிக்க வேண்டும். விதிகளைப் பின்பற்றினால், வருமான வரி நோட்டீஸ் வருவதற்கான வாய்ப்புகள் வெகுவாகக் குறையும்.