Credit Score: உங்க CIBIL ஸ்கோர் குறைஞ்சிருச்சா? சரிசெய்ய எவ்வளவு நாள் ஆகும் தெரியுமா?
Credit Score: சிபில் ஸ்கோர் குறைந்தால் கவலை வேண்டாம். தவறிய EMI, செட்டில்ட் கணக்குகள் ஆகியவை அறிக்கையில் 7 ஆண்டுகள் வரை இருந்தாலும், சரியான நிதி ஒழுக்கம் மூலம் விரைவில் ஸ்கோரை உயர்த்தலாம்.
உங்க CIBIL ஸ்கோர் குறைஞ்சிருச்சா?
இந்தியாவில் ஒருவரின் கிரெடிட் ரிப்போர்ட்டில் பதிவாகும் தாமதமான EMI, செட்டில் செய்யப்பட்ட கணக்குகள் மற்றும் தள்ளுபடி செய்யப்பட்ட கடன்கள் போன்ற எதிர்மறைத் தகவல்கள் பதிவான தேதியிலிருந்து 7 ஆண்டுகள் வரை CIBIL அறிக்கையில் இருக்கும். திவால் போன்ற சூழல்களில் இது மேலும் நீடிக்கலாம். இருப்பினும், பழைய தவறுகளை விட சமீபத்திய நிதி நடவடிக்கைகளுக்கே சிபில் மாடல்கள் அதிக முக்கியத்துவம் அளிக்கின்றன என்பதால், சரியான நிதி ஒழுக்கத்தின் மூலம் சீக்கிரமாகவே மீள முடியும்.
பாதிப்பின் தன்மையும் மீண்டு வரும் காலமும்
தாமதமான EMI (30 நாட்கள் delay): இது உங்கள் ஸ்கோரை 50 முதல் 100 புள்ளிகள் வரை உடனடியாகக் குறைக்கலாம். ஆனால், அடுத்த 6 மாதம் முதல் 1 ஆண்டு வரை தவணை தவறாமல் சரியாகப் பணம் செலுத்தினால் இழந்த புள்ளிகளைப் பெரும்பாலும் மீட்டுவிடலாம்.
செட்டில்ட் அக்கவுன்ட்: வங்கிகளிடம் பேசி அசலை விடக் குறைவான தொகையைச் செலுத்தி கணக்கை முடிப்பது, நீங்கள் ஒப்பந்தத்தை மதிக்கவில்லை என்பதைக் காட்டும். இந்த 'Settled' மார்க் 7 ஆண்டுகள் ரிப்போர்ட்டில் இருக்கும் என்றாலும், நிதி நிறுவனங்களின் நம்பிக்கையைப் பெற 18 மாதங்கள் முதல் 3 ஆண்டுகள் வரை பொறுப்பான நிதி நடவடிக்கை தேவை.
டீஃபால்ட் மற்றும் ரைட் ஆஃப்: கடன் நிறுவனம் கடனை நஷ்டக் கணக்கில் எழுதுவது ஸ்கோரை 500-க்கும் கீழ் தள்ளிவிடும். இழந்த நம்பிக்கையை மீண்டும் பெற்று, ஸ்கோரை 700-க்கு மேல் உயர்த்த 3 முதல் 5 ஆண்டுகள் வரை தொடர்ச்சியான சீரான முயற்சி தேவைப்படும்.
கிரெடிட் ஸ்கோரை உயர்த்தும் நடைமுறை வழிகள் என்ன?
செக்யூர்டு கிரெடிட் கார்டு: வங்கி வைப்புத் தொகையின் அடிப்படையில் பெறப்படும் கார்டை அளவோடு பயன்படுத்தி, மாதந்தோறும் முழுத் தொகையையும் நிலுவையின்றிச் சரியாகக் கட்டி வந்தால் 12 - 18 மாதங்களில் சிறந்த பேமென்ட் வரலாறு உருவாகும்.
கிரெடிட் மிக்ஸ்: சிறிய பர்சனல் லோன் எடுத்து அதைச் சரியான தவணையில் திரும்பச் செலுத்துவது, பல்வேறு வகையான கடன்களை நிர்வகிக்கும் உங்கள் திறனைக் காட்டி ஸ்கோரை உயர்த்த உதவும்.
பயன்பாட்டு வரம்பு: உங்கள் கார்டின் மொத்த வரம்பில் கிரெடிட் பயன்பாட்டு அளவை எப்போதுமே 30 சதவீதத்திற்குள் வைத்திருக்க வேண்டும். மேலும், குறுகிய காலத்தில் ஒரே நேரத்தில் பல கடன்களுக்கு விண்ணப்பிப்பதைத் (Hard Inquiry) தவிர்க்க வேண்டும்.
ரிப்போர்ட் கண்காணிப்பு மற்றும் பிழை திருத்தம்
3 மாதங்களுக்கு ஒருமுறை சிபில் ரிப்போர்ட்டை இலவசமாகச் சரிபார்க்க வேண்டும். அறிக்கையில் வங்கியின் தவறுதலால் ஏதேனும் தவறான எதிர்மறைப் பதிவுகள் இருந்தால், உடனடியாக சிபில் தளத்தில் புகார் அளித்துச் சரிசெய்ய வேண்டும். இது உங்கள் மீட்புக்காலத்தைக் கணிசமாகக் குறைக்கும்.
30 அல்லது 60 நாட்களில் ஸ்கோரைச் சரிசெய்து தருவதாகக் கூறும் ஏஜென்சிகளின் குறுக்குவழிகள் தற்காலிகமானவை மற்றும் ஏமாற்று வேலை. பழசைக் கணக்கிலிருந்து உடனடியாக அழிக்க முடியாது; புதிய நல்ல நிதிப் பழக்கங்கள் மூலம் மட்டுமே பழைய கறைகளின் தாக்கத்தைக் குறைக்க முடியும். பொறுமையுடன் பில்களைச் சரியாகக் கட்டுவதும், விவேகமான கடன் நிர்வாகமுமே சிபில் ஸ்கோரை உயர்த்துவதற்கான உண்மையான மற்றும் நிலையான வழியாகும்.
வணிகம் (Business Ideas in Tamil), வங்கிகள் (Banking News), நிதி, இந்திய பொருளாதாரம் , உலக சந்தை, பங்கு சந்தை, முதலீடு உள்ளிட்ட பல்வேறு தகவல்கள் மற்றும் சமீபத்திய நிதி செய்திகள் அனைத்தையும் ஏஷ்யாநெட் தமிழ் நியூஸில் படிக்கலாம்.
