புதுசா கார் வாங்க போறீங்களா? பெட்ரோல், டீசல், மின்சார கார் - எது சிறந்தது?

இன்றைய காலகட்டத்தில் கார் என்பது பெரும்பாலானோரின் விருப்பமாக உள்ளது. நம் நாட்டில் கார்களின் பயன்பாடு அதிகரித்துள்ளது. அதனால்தான், பல்வேறு வெளிநாட்டுக் கம்பெனிகள் தங்கள் கார்களை இங்கு அறிமுகப்படுத்தி நல்ல சந்தையைப் பெற்று வருகின்றன. பெட்ரோல், டீசல் கார்கள் மட்டுமல்லாமல், மின்சார கார்களும் இந்தியாவில் அதிகளவில் விற்பனையாகின்றன. அவற்றின் விலைகளும் போட்டித்தன்மையுடன் குறைக்கப்பட்டு, வாடிக்கையாளர்களை ஈர்க்கின்றன.

இத்தகைய சூழ்நிலையில், பலருக்கும் எந்த வகையான காரை வாங்குவது என்பதில் குழப்பம் இருக்கும். பெட்ரோல், டீசல், மின்சார கார்களில் எது உங்களுக்கு மிகப் பயனுள்ளதாக இருக்கும் என்பதை இப்போது தெரிந்து கொள்வோம். 

பொதுவாக கார் வாங்க வேண்டுமென்றால், அதன் விலையைத்தான் அனைவரும் அதிகம் கவனிப்பார்கள். ஆனால் விலை மட்டுமல்ல.. பராமரிப்புச் செலவுகள், எரிபொருள் விலை, பழுதுநீக்குதல் போன்ற பல விஷயங்கள் கார் வாங்குவதில் பாதிப்பை ஏற்படுத்தும். கார்களின் விலையைப் பொறுத்தவரை, பொதுவாக பெட்ரோல் கார்கள் குறைந்த விலையில் கிடைக்கும். டீசல் கார்கள் சற்று அதிக விலையில் கிடைக்கும்.

மின்சார கார்கள் இரண்டையும் விட அதிக விலை கொண்டவை. ஆனால் மின்சார வாகனங்களுக்கு பராமரிப்புச் செலவு குறைவாக இருக்கும். பெட்ரோல், டீசல் கார்களுக்கு பராமரிப்புச் செலவு அதிகமாக இருக்கும். 
 

டாடா மோட்டார்ஸ் (Tata Motors), ஹூண்டாய் (Hyundai), மஹிந்திரா (Mahindra), வோக்ஸ்வேகன் (Volks Wagen), எம்ஜி மோட்டார்ஸ் (MG Motors) போன்ற நிறுவனங்கள் பெட்ரோல், டீசல் கார்களுடன் மின்சார வாகனங்களையும் தயாரிக்கின்றன. டொயோட்டா (Toyota) நிறுவனம் ஹைப்ரிட் மாடல்களுடன் மின்சார வாகனங்களையும் தயாரிக்கிறது. 
 

விலையில் லட்சக்கணக்கில் வித்தியாசம்

மின்சார வாகனங்களுடன் ஒப்பிடும்போது, பெட்ரோல், டீசல் கார்கள் குறைந்த விலையில் கிடைக்கின்றன. உதாரணமாக, டாடா நெக்ஸான் காரை எடுத்துக் கொண்டால் பெட்ரோல் வகை அடிப்படை மாடலின் விலை ரூ.8 லட்சம். அதே நிறுவனத்தின் டீசல் காரின் அடிப்படை மாடல் ரூ.10 லட்சம். அதே மின்சார காரின் விலை ரூ.12.5 லட்சம். இந்த விலைகளைக் கணக்கில் கொண்டால், யாரும் பெட்ரோல் வகையை வாங்கத் தான் நினைப்பார்கள். ஆனால் பராமரிப்புச் செலவுகளையும் சேர்த்து கணக்கிட்டால் தான் எதை வாங்குவது என்பதில் தெளிவு கிடைக்கும். 
 

பராமரிப்புச் செலவுகள் எப்படி?

மின்சார வாகனங்களை விட பெட்ரோல், டீசல் கார்கள் குறைந்த விலையில் கிடைத்தாலும், அவற்றின் பராமரிப்புச் செலவுகள் அதிகம். அதாவது, ஒரு லிட்டர் பெட்ரோல் தற்போது ரூ.107. டீசல் ரூ.96. பெட்ரோல் கார்கள் லிட்டருக்கு 17 முதல் 21 கி.மீ வரை மைலேஜ் தரும். டீசல் கார்கள் 20 முதல் 25 கி.மீ வரை மைலேஜ் தரும். இந்தக் கணக்கின்படி, ஒரு கி.மீக்கு பெட்ரோல் காரில் ரூ.6 முதல் ரூ.7 வரை அதிகம் செலவாகும். டீசல் காரில் ரூ.4 வரை செலவாகும். மின்சார வாகனங்களில் ஒரு கி.மீக்கு 50 பைசா முதல் 80 பைசா வரை மட்டுமே செலவாகும். 
 

மின்சார வாகனங்களுடன் ஒப்பிடும்போது, பெட்ரோல், டீசல் கார்களுக்கு பராமரிப்பு அதிகம். சர்வீஸ், ஆயில் மாற்றுதல் போன்ற செலவுகள் அதிகமாக இருக்கும். மின்சார வாகனங்களில் இந்த சிக்கல் இல்லை. ஆனால் ஒரு முறை பேட்டரி பழுதடைந்தால், லட்சக்கணக்கில் செலவாகும்.

உத்தரவாதம், காப்பீடு உள்ள வாகனங்களை வாங்கினால் உங்களுக்கு நல்லது. மின்சார வாகனங்களுக்கு சார்ஜிங் பாயிண்டுகள் அதிகம் இல்லை. சார்ஜ் செய்ய குறைந்தது 4, 5 மணி நேரம் ஆகும். பெட்ரோல், டீசல் கார்களுக்கு எந்த பெட்ரோல் பங்க்கிலும் எரிபொருள் நிரப்பிக் கொள்ளலாம்.

மின்சார வாகனங்களுக்கு இந்த வசதி இல்லை. எனவே, இந்த விஷயங்கள் அனைத்தையும் கருத்தில் கொண்டு, உங்கள் பட்ஜெட், பராமரிப்பு, எதிர்கால மாற்றங்கள் ஆகியவற்றை ஆராய்ந்து, பெட்ரோல், டீசல், மின்சார வாகனங்களில் உங்களுக்குப் பயனுள்ளதாக இருப்பதை வாங்குவது நல்லது.