ஒரே சார்ஜில் 792 கிமீ ரேஞ்ச்.. சென்னை டூ நெல்லை நான்-ஸ்டாப் பயணம்.. EV கிங் Mercedes CLA
Mercedes CLA EV கார் 100 கிமீ வேகத்தை வெறும் 6.7 வினாடிகளில் எட்டி விடும். மணிக்கு 210 கிமீ வேகத்தில் செல்லும். 800 வோல்ட் சிஸ்டம் இருப்பதால் வெறும் 20 நிமிடங்கள் சார்ஜில் 400 கிமீ செல்ல முடியும்.
மெர்சிடிஸ் பென்ஸ் சிஎல்ஏ எலெக்ட்ரிக் கார்
இந்தியாவில் பெட்ரோல் விலை ராக்கெட் வேகத்தில் சென்று வருவதால் மக்கள் மின்சார கார்களை வாங்குவதில் ஆர்வம் காட்டி வருகின்றனர். இதனால் கார் உற்பத்தி நிறுவனங்கள் போட்டி போட்டு இந்திய சந்தையில் எலெக்ட்ரிக் கார்களை களமிறக்கி வருகின்றன. அந்த வகையில் சொகுசு கார் தயாரிப்பு நிறுவமான மெர்சிடிஸ் பென்ஸ் (Mercedes-Benz) மெர்சிடிஸ் பென்ஸ் சிஎல்ஏ (Mercedes-Benz CLA) எலெக்ட்ரிக் காரை இந்தியாவில் இன்று (பிப்ரவரி 24 காட்சிப்படுத்தியுள்ளது.
ஒரே சார்ஜ் செய்தால் 792 கிமீ ரேஞ்ச்
அதிநவீன வசதிகள் நிறைந்த இந்த பிரம்மாண்டமான சொகுசு எலெக்ட்ரிக் கார் ஏப்ரல் மாதம் இந்தியாவில் விற்பனைக்கு வரும் என எதிர்பார்க்கப்படுகிறது. மெர்சிடிஸ் பென்ஸ் சிஎல்ஏ கார் ஒருமுறை சார்ஜ் செய்தால் சுமார் 792 கிமீ ரேஞ்ச் கொடுக்கும். இதற்கான WLTP சான்றிதழ் பெற்றுள்ளது. அதாவது ஒரே ஒரு முறை சார்ஜ் செய்தால் நீங்கள் சென்னையில் இருந்து நெல்லைக்கு இடையில் நிற்காமல் பயணம் செய்ய முடியும். இந்தியாவில் நீண்ட தூரம் செல்லும் எலெக்ட்ரிக் கார்களில் ஒன்றாக இது இருக்கும்.
6.7 வினாடிகளில் 100 கிமீ வேகம்
மணிக்கு 210 கிமீ வேகத்தில் செல்லும் இந்த கார் 100 கிமீ வேகத்தை வெறும் 6.7 வினாடிகளில் எட்டி விடும். 800 வோல்ட் சிஸ்டம் இருப்பதால் வெறும் 20 நிமிடங்கள் சார்ஜில் 400 கிமீ செல்ல முடியும். Mercedes-Benz CLA மாடலில் 10.25-இன்ச் டிஜிட்டல் டிரைவர் டிஸ்ப்ளே கொடுக்கப்பட்டுள்ளது. 14 இன்ச் மெகா டச்ஸ்கிரீன் இன்போடெயின்மென்ட் சிஸ்டமும் உள்ளது. மேலும் AI அம்சங்களான சாட்ஜிடிபி மற்றும் கூகுள் ஜெமினி கொடுக்கப்பட்டுள்ளதால் வாய்ஸ் மூலம் காரை கட்டுப்படுத்த முடியும்.
விலை என்ன?
மேலும் முன்பக்க சொகுசு இருக்கைகளில் மசாஜ் வசதி, ஹீட்டிங் மற்றும் வென்டிலேஷன், 16 ஸ்பீக்கர்கள் கொண்ட Burmester 3D சவுண்ட் சிஸ்டம் உள்ளிட்ட ஏராளமான வசதிகள் கொட்டிக்கிடக்கின்றன. இதுமட்டுமின்றி பெரிய பானரோமிக் கிளாஸ் ரூஃப், , 100W பாஸ்ட் USB-C சார்ஜிங் போர்ட்கள் என வசதிகளுக்கு பஞ்சமில்லை. இந்த காரின் விலை அதிகாரப்பூர்வமாக அறிவிக்கப்படவில்லை. இந்த மாடலின் பேசிக் வேரியண்ட் விலை ரூ.45 லட்சத்தில் இருந்தும், டாப் வேரியண்ட் விலை ரூ.55 லட்சத்தில் இருந்தும் தொடங்கும் என எதிபார்க்கப்படுகிறது.
