Maruti Fronx 2026: தலைகீழாக மாறும் ஃபிரான்க்ஸ்.. வரப்போகும் மாஸ் அப்டேட்கள்.. முழு விவரம்!
மாருதி சுஸுகி நிறுவனம் ஃபிரான்க்ஸ் ஃபேஸ்லிஃப்ட் மாடலை மெகா அப்டேட் செய்ய உள்ளது. இடுஹ் தொடர்பான முழு விவரங்களை இந்த செய்தியில் பார்க்கலாம்.
புதிய ஃபிரான்க்ஸ் ஃபேஸ்லிஃப்ட்
மாருதி சுஸுகி நிறுவனம் தனது புதிய ஃபிரான்க்ஸ் ஃபேஸ்லிஃப்ட் மாடலுக்கான சோதனை ஓட்டங்களை நடத்தி வருகிறது. இந்த காரின் ஸ்பை படங்கள் சமீபத்தில் வெளியாகி, இது விரைவில் அறிமுகமாகலாம் என்ற எதிர்பார்ப்பை ஏற்படுத்தியுள்ளது.
லேட்டஸ்டாக வெளியான படங்களில், இந்த கார் முழுவதுமாக மறைக்கப்பட்ட நிலையில் காணப்படுகிறது. இருந்தாலும், 2026-ல் வரவிருக்கும் இந்த புதிய மாருதி ஃபிரான்க்ஸ் ஃபேஸ்லிஃப்ட்டில், முன்பக்க கிரில், பம்பர் மற்றும் ஹெட்லேம்ப்களில் சில மாற்றங்கள் செய்யப்பட்டு, முன்பக்கத் தோற்றம் சற்று புதுப்பிக்கப்படும் என எதிர்பார்க்கப்படுகிறது. மேலும், விக்டோரிஸ் மிட்சைஸ் எஸ்யூவி-யின் சில டிசைன் அம்சங்களும் இதில் இருக்கலாம்.
முக்கிய அப்டேட்டாக ADAS வசதி
இதுவரை அதிகாரப்பூர்வ தகவல்கள் எதுவும் வெளியாகவில்லை. ஆனாலும், புதிய மாருதி ஃபிரான்க்ஸ் 2026 ஃபேஸ்லிஃப்ட்டில் லெவல் 2 ADAS (Advanced Driver Assistance System) வசதி இடம்பெறும் என எதிர்பார்க்கப்படுகிறது. இதற்கு முன்பு சோதனை செய்யப்பட்ட ஒரு மாடலின் பின்பக்க பம்பரில் LIDAR (Light Detection and Ranging) யூனிட் பொருத்தப்பட்டிருந்தது. இது லேசர் துடிப்புகளைப் பயன்படுத்தி தூரத்தை அளந்து, சுற்றுப்புறத்தின் துல்லியமான 3D மாடலை உருவாக்கும் தொழில்நுட்பம் ஆகும்.
மாருதி ஃபிரான்க்ஸ் ஹைப்ரிட் வேரியன்ட்
புதிய ஃபிரான்க்ஸ் காரின் உயர் வேரியன்ட்களில் வென்டிலேட்டட் சீட்கள், சன்ரூஃப் போன்ற அம்சங்களுடன், அப்ஹோல்ஸ்டரி ஆப்ஷன்களையும் மாருதி நிறுவனம் வழங்க வாய்ப்புள்ளது. மற்ற அம்சங்கள் தற்போதைய மாடலில் இருந்து அப்படியே தொடரும்.
புதிய ஹைப்ரிட் பவர்டிரெய்ன் அறிமுகம் குறித்து அதிகாரப்பூர்வ உறுதிப்படுத்தல் இன்னும் வரவில்லை. ஆனால், 2026 மாருதி ஃபிரான்க்ஸ் ஃபேஸ்லிஃப்ட்டில், மாருதி நிறுவனமே சுயமாக உருவாக்கிய சீரிஸ் ஹைப்ரிட் தொழில்நுட்பம் அறிமுகப்படுத்தப்படும் என எதிர்பார்க்கப்படுகிறது. இந்த ஹைப்ரிட் சிஸ்டத்தில், பெட்ரோல் இன்ஜின் நேரடியாக சக்கரங்களுக்கு சக்தி அளிக்காது. அதற்கு பதிலாக, அது ஒரு ஜெனரேட்டராக செயல்பட்டு பேட்டரி பேக்கை சார்ஜ் செய்யும். எலக்ட்ரிக் மோட்டார்கள் தான் சக்கரங்களுக்கு சக்தியளிக்கும்.
அதிக மைலேஜ் தரும் ஹைப்ரிட் தொழில்நுட்பம்
வழக்கமான ஸ்ட்ராங் ஹைப்ரிட் பவர்டிரெய்ன்களுடன் ஒப்பிடும்போது, மாருதி சுஸுகியின் இந்த புதிய ஹைப்ரிட் தொழில்நுட்பம் அதிக மைலேஜ் தருவதாகவும், விலை குறைவாகவும் இருக்கும் என எதிர்பார்க்கப்படுகிறது. நிறுவனம் தனது 1.2L Z12E நேச்சுரலி ஆஸ்பிரேட்டட் பெட்ரோல் இன்ஜினை இந்த ஹைப்ரிட் சிஸ்டத்துடன் இணைக்க வாய்ப்புள்ளது.
இந்த தொழில்நுட்பம், மாருதியின் மற்ற மாஸ்-மார்க்கெட் கார்களுக்கும் பயன்படுத்தப்படலாம். 2027-ல் வரவிருக்கும் அடுத்த தலைமுறை பலேனோ மற்றும் சுஸுகி ஸ்பேஷியாவை அடிப்படையாகக் கொண்ட புதிய சப்-4 மீட்டர் எம்பிவி ஆகியவற்றிலும் மாருதியின் இந்த சீரிஸ் ஹைப்ரிட் பவர்டிரெய்ன் இடம்பெறலாம்.
ஃபிரான்க்ஸில் AWD வருமா?
புதிய மாருதி ஃபிரான்க்ஸ் 2026 ஃபேஸ்லிஃப்ட்டில் AWD (ஆல்-வீல் டிரைவ்) சிஸ்டமும் கிடைக்கும் என்று பரவலாகப் பேசப்படுகிறது. காரணம், சோதனை செய்யப்பட்ட ஒரு மாடலின் பின் ஆக்சிலில் கூடுதல் ஹார்டுவேர் பொருத்தப்பட்டிருந்தது கண்டுபிடிக்கப்பட்டது.
