- Home
- Auto
- Car Price Hike: பண்டிகை சீசனில் கார் வாங்க பிளானா? இன்று முதல் ரூ.25,000 வரை விலை எகிறியது; விலையேறும் டாப் மாடல்கள் இதோ!
Car Price Hike: பண்டிகை சீசனில் கார் வாங்க பிளானா? இன்று முதல் ரூ.25,000 வரை விலை எகிறியது; விலையேறும் டாப் மாடல்கள் இதோ!
Car Price Hike: பண்டிகைக் காலம் தொடங்கியுள்ள நிலையில், உதிரிபாகங்கள் தயாரிப்பு மற்றும் செயல்பாட்டுச் செலவுகள் அதிகரித்துள்ளதைக் காரணம் காட்டி, முன்னணி வாகன உற்பத்தி நிறுவனங்கள் அக்டோபர் 1, 2026 முதல் கார்களின் விலையை உயர்த்தியுள்ளன.
அக்.1 முதல் கார்களின் விலை அதிரடி உயர்வு!
இந்தியாவில் பண்டிகைக் காலம் களைகட்டத் தொடங்கியுள்ள நிலையில், புதிய கார் வாங்கத் திட்டமிட்டிருக்கும் வாடிக்கையாளர்களுக்குச் சற்றே அதிர்ச்சியளிக்கும் வகையில் முன்னணி வாகன உற்பத்தி நிறுவனங்கள் அக்.1 முதல் கார்களின் விலையை உயர்த்த நடவடிக்கை எடுத்து வருகின்றன. சில நிறுவனங்கள் இந்த விலை உயர்வை முன்கூட்டியே அதிகாரப்பூர்வமாக அறிவித்துள்ள நிலையில், மேலும் சில நிறுவனங்களும் விரைவில் விலை உயர்வை அறிவிக்க வாய்ப்புள்ளது.
கார்களுக்கான உதிரிபாகங்களின் தயாரிப்புச் செலவு மற்றும் நிறுவனங்களின் செயல்பாட்டுச் செலவீனங்கள் தொடர்ந்து அதிகரித்து வருவதே இந்த விலை உயர்வுக்கு முக்கியக் காரணமாகக் கூறப்படுகிறது. அதன்படி, அக்.1 முதல் எந்தெந்த நிறுவனங்களின் கார்களின் விலை உயர்கிறது, என்னென்ன மாடல்கள் இதனால் பாதிக்கப்படும் என்பது குறித்த முழு விவரங்கள் இதோ!
ஸ்கோடா ஆட்டோ இந்தியா: அதிகபட்சமாக ரூ.20,000 வரை உயர்வு
சிறந்த கட்டுமானத் தரம் கொண்ட கார்களுக்குப் பெயர் பெற்ற ஸ்கோடா ஆட்டோ இந்தியா (Skoda Auto India) நிறுவனம் விலை உயர்வு அறிவிப்பை அதிகாரப்பூர்வமாக வெளியிட்டுள்ளது. அக்.1 முதல் தனது அனைத்துக் கார் மாடல்களின் எக்ஸ்ஷோரூம் விலையையும் 1.2% வரை உயர்த்தவுள்ளதாகத் தெரிவித்துள்ளது.
மூலப்பொருட்களின் விலை உயர்வு உள்ளிட்ட காரணங்களால் இந்த முடிவு தவிர்க்க முடியாததாக அமைந்தாலும், வாடிக்கையாளர்களுக்கு அதிக சுமையை ஏற்படுத்தாத வகையில் மிகக் குறைவான விலை உயர்வே நிர்ணயிக்கப்பட்டுள்ளதாக அந்நிறுவனம் குறிப்பிட்டுள்ளது. இதன்படி அதிகபட்சமாக ரூ.20,000 வரை கார்களின் விலை உயரக்கூடும். இந்த விலை உயர்வு ஸ்கோடா நிறுவனத்தின் கைலாக் (Kylaq), குஷாக் (Kushaq), ஸ்லாவியா (Slavia) மற்றும் கோடியாக் (Kodiaq) உள்ளிட்ட அனைத்து மாடல்களுக்கும் பொருந்தும். வாடிக்கையாளர்கள் தேர்வு செய்யும் வேரியண்ட், எஞ்சின் தேர்வைப் பொறுத்து இந்த விலையேற்றம் மாறுபடும். பண்டிகைக் காலத்தில் புது கார் வாங்கத் திட்டமிடுவோருக்கு இது கூடுதல் செலவை ஏற்படுத்தக்கூடும்.
கியா இந்தியா: கியா சைரோஸ் விலை உயர்கிறதா?
கியா (Kia India) நிறுவனமும் அக்டோபர் மாதத்திலிருந்து தனது குறிப்பிட்ட வாகனங்களின் விலையை உயர்த்த ஆயத்தமாகி வருகிறது. குறிப்பாக, சமீபத்தில் சந்தையில் அறிமுகப்படுத்தப்பட்டு வாடிக்கையாளர்களிடையே நல்ல வரவேற்பைப் பெற்று வரும் 'கியா சைரோஸ்' (Kia Syros) காரின் விலை அதிகரிக்கப்பட உள்ளதாகத் தகவல்கள் தெரிவிக்கின்றன.
இதனிடையே, கியா சைரோஸ் காருக்கு அதிக எண்ணிக்கையிலான வாடிக்கையாளர்கள் முன்பதிவு செய்துள்ளனர். திடீர் விலை உயர்வால் வாடிக்கையாளர்கள் முன்பதிவை ரத்து செய்ய வாய்ப்பு இருப்பதால், செப்.30 வரை முன்பதிவு செய்த வாடிக்கையாளர்களுக்குப் பழைய விலையிலேயே காரை வழங்குவதற்கான வாய்ப்பைத் தருமாறு கியா டீலர்கள் அந்நிறுவனத்திற்கு கோரிக்கை வைத்துள்ளதாகவும் கூறப்படுகிறது.
இருப்பினும், இதுகுறித்த அதிகாரப்பூர்வ உறுதிப்படுத்தல் எதுவும் இதுவரை வெளியாகவில்லை. எனவே, ஏற்கனவே கியா சைரோஸ் கார் முன்பதிவு செய்திருந்தால், சம்பந்தப்பட்ட டீலரைத் தொடர்புகொண்டு இந்த விலை உயர்வால் உங்கள் புக்கிங்கிற்குப் பாதிப்பு ஏற்படுமா என்பதைத் தெளிவுபடுத்திக் கொள்வது அவசியம்.
டாடா மோட்டார்ஸ்: ரூ.25,000 வரை உயர வாய்ப்பு
இந்தியாவின் முன்னணி வாகன உற்பத்தியாளரான டாடா மோட்டார்ஸ் (Tata Motors), தனது குறிப்பிட்ட பெட்ரோல், டீசல் மற்றும் மின்சார (EV) கார் மாடல்களின் விலையை அக்.1 முதல் அதிகரிக்க உள்ளதாகத் தகவல்கள் வெளியாகியுள்ளன.
மாடல்களுக்கு ஏற்ப அதிகபட்சமாக ரூ.25,000 வரை இந்த விலை உயர்வு இருக்கக்கூடும் எனத் தெரிகிறது. குறிப்பாக நெக்ஸான் (Nexon), பன்ச் (Punch) மற்றும் சமீபத்தில் அறிமுகமான மாடல்கள் இந்த விலை உயர்வுப் பட்டியலில் இடம்பெற வாய்ப்புள்ளது.
மாருதி சுஸுகி மற்றும் ஹூண்டாய் நிலை என்ன?
வழக்கமாகப் பண்டிகைக் காலத் தொடக்கத்தில் முன்னணி நிறுவனங்கள் ஒன்றன்பின் ஒன்றாக விலை உயர்வை அறிவிப்பது வழக்கம். நாட்டின் முன்னணி நிறுவனங்களான மாருதி சுஸுகி, ஹூண்டாய், மஹிந்திரா, டொயோட்டா ஆகியவை அக்டோபர் 1-க்கான புதிய அதிகாரப்பூர்வ விலைப்பட்டியலை இதுவரை வெளியிடவில்லை.
இருப்பினும், தயாரிப்புச் செலவு உயர்வைக் கருத்தில் கொண்டு, வரும் நாட்களில் இந்த நிறுவனங்களும் தங்களது மாடல்களின் விலையை உயர்த்த வாய்ப்பிருப்பதாகவே ஆட்டோமொபைல் துறை வட்டாரங்கள் கருதுகின்றன.
வாடிக்கையாளர்களுக்கு என்ன பாதிப்பு?
ஒரு காரின் எக்ஸ்ஷோரூம் விலை அதிகரிக்கும் போது, அதனடிப்படையில் கணக்கிடப்படும் சாலை வரி (Road Tax) மற்றும் வாகனக் காப்பீட்டுக் கட்டணங்களும் (Insurance) தானாகவே சிறிதளவு அதிகரிக்கும். இதன் காரணமாக, காரின் இறுதி ஆன்ரோடு விலையில் (On-road price) சில ஆயிரம் ரூபாய் வரை கூடுதல் செலவு ஏற்படும்.
எனவே, இந்த பண்டிகைக் காலத்தில் புதிய கார் வாங்கத் திட்டமிட்டிருப்பவர்கள், அக்.1 விலை உயர்வு முழுமையாக அமலுக்கு வரும் முன்பே அல்லது நடப்பு செப்டம்பர் மாதச் சலுகைகள் மற்றும் முன்பதிவு பாதுகாப்புச் சலுகைகளைப் (Price Protection) பயன்படுத்தி உடனடியாக வாகன முன்பதிவு செய்துகொள்வது சிறந்ததாக இருக்கும்.
